Азьло ми озьы малпаськомы вал, Еврейёслы 12:16 кылъёсты лыдӟыса. Со кылбурын верамын, Исав святойзэ ӧз дунъя но «одӥг тусьты сиён понна нырысь пи луон праволэсь куштӥськиз» шуыса. Ми малпаськомы вал, нырысь пи луон правоен ӵош Иаковлы дан сётэмын вал, солэн выжыысьтыз Мессия мед вордӥськоз шуыса (Матф. 1:2, 16; Лука 3:23, 34).

Нош Библия возьматэ, пиосмуртлы одно ик нырысь вордскем пи луоно ӧй вал, солэн выжыысьтыз Мессия мед вордӥськоз шуыса. Эскеромы куд-ог учыръёсты.

Иаковлэн, яке Израильлэн, нырысь вордскем пиез вал Рувим, кудзэ Лия вордӥз. Берлогес Рахильлэн но, Иаковлэн яратоно кышноезлэн, Иосиф пиез вордӥськиз. Куке Рувим секыт сьӧлыказ, солэн нырысь вордскем пи луыны правоез басьтэмын но Иосифлы сётэмын вал (Ул.-выл. 29:31—35; 30:22—25; 35:22—26; 49:22—26; 1 Пар. 5:1, 2). Озьы ке но, Рувим выжыысь но, Иосиф выжыысь но Мессия ӧз вордӥськы. Со вордӥськиз Иудалэн выжыысьтыз, Иаковлэн ньылетӥ пиезлэн выжыысьтыз, кудзэ солы Лия вордӥз (Ул.-выл. 49:10).

Лукалэсь 3:32 гожтэмын эшшо вить адямиос сярысь, кудъёсызлэн выжыысьтызы Мессия вордӥськиз. Соос ваньзы нырысь вордскем пиос вал, шӧдске. Кылсярысь, Воозлэн вордӥськиз Овид пиез, кудӥз Иессейлэн атаез луиз (Руфь 4:17, 20—22; 1 Паралипоменон 2:10—12).

Нош Иессейлэн Давид пиез нырысь вордскем пи ӧй вал. Со тямыс пиос пӧлысь пичиез вал. Озьы ке но, Мессия солэн выжыысьтыз  вордскиз (1 Экс. 16:10, 11; 17:12; Матф. 1:5, 6). Озьы ик Соломон но, мукетыз, кин выжыысь Христос вордӥськиз, Давидлэн нырысь вордскем пиез ӧй вал (2 Экс. 3:2—5).

Но вераны уг луы, нырысь пи луон праволы саклык ӧз висъяськы шуыса. Нырысь вордскем пи атаез кулэм бере семьялэн йырыз луэ вал. Со сяна, нырысь вордскем пилы семьялэн ваньбурез пӧлысь кык полэс сётӥське вал (Ул.-выл. 43:33; К. Зак. 21:17; Иис. Н. 17:1).

Со дыре ик нырысь пи луон право одӥг муртлэсь мукет муртлы сётэмын луыны быгатэ вал. Кылсярысь, Авраам Измаил пизэ дорысьтыз кошкыны куриз но солэсь нырысь пи луон правозэ Исаак пиезлы сётӥз (Ул.-выл. 21:14—21; 22:2). Со сяна, кызьы верамын вал ини, Рувимлэн но нырысь пи луон правоез басьтэмын но Иосифлы сётэмын вал.

Табере ойдолэ берытскомы Еврейёслы 12:16 кылбур доры. Отын верамын: «Тӥляд пӧлады нокыӵе азыса-калгыса улӥсь яке Исав кадь сьӧлыклэсь кышкасьтэм мурт медаз луы, уго со одӥг тусьты сиён понна нырысь пи луон праволэсь куштӥськиз». Мае возьмато та кылъёс?

Апостол Павел ӧз вера, кыӵе выжыысь Мессия вордӥськиз. Со ӧтиз христианъёсты: «Шонер вамышъялэ». Солэсь кылзӥськыса, соос Инмарлэн дэлетэзтэк ӧй кыльысалзы. Нош озьы луыны быгатысал, соос азон-калгон сьӧлыке пырысалзы ке (Евр. 12:12—16). Соку соос Исав кадь луысалзы, кудӥз святойзэ ӧз дунъя, нош нырысь ик аслаз мыл потонъёсыз сярысь малпаськиз.

Исав улӥз со дыръёсы, куке семья йыръёс семьязылы священник луо вал. Соин ик, вылды, Исавлы куддыръя дан усе вал Инмарлы курбон сётыны (Ул.-выл. 8:20, 21; 12:7, 8; Иов 1:4, 5). Но со нырысь ик аслаз мыл потонъёсызлы саклык висъяз. Соин ик со вань дано ужъёсты, кудъёсыз нырысь пи луонэн герӟаськемын вал, одӥг тусьты сиёнэн воштӥз! Оло нош, солэн палэнскемез потӥз со курадӟонъёслэсь, кудъёсыз сярысь Инмар азьло ик вераз, Авраам выжыысь потэмъёс соосты чидано луозы шуыса (Ул.-выл. 15:13). Озьы ик Исав возьматӥз, святойзэ уг дунъя шуыса, куке аслыз кык кышно басьтӥз мукет калыкысь, кудӥз Иеговалы уг йыбыртъя вал. Соин сэрен солэн атаез но анаез туж ӝоже усизы (Ул.-выл. 26:34, 35). Нош Иаков аслыз кышнолы бырйиз зэмос Инмарлы йыбыртъясь нылмуртэ (Ул.-выл. 28:6, 7; 29:10—12, 18).

Озьыен, кыӵе йылпумъян лэсьтыны луоз со пиосмуртъёс сярысь, кудъёсызлэн выжыысьтызы Мессия вордӥськиз? Тросэз соос пӧлысь нырысь вордскем пиос вал, нош мукетъёсыз ӧй вал. Еврейёс сое тодӥзы, но со соослы паймымон ӧз поты. Соос тодо вал, Христос Давид выжыысь вордӥськиз шуыса, Иессейлэн пичи пиезлэн выжыысьтыз (Матф. 22:42).