1. Кызьы абзацын вераськись учыръёсын Иеговалэн Адӟись-Ивортӥсьёсыз Инмарлы оскымон кылё?

 ПУКТЭ син азяды куинь учырез. 1) Дышетӥсь вера класслы, кудаз егит сузэрмы дышетске, ӝоген праздник луоз но вань дышетскисьёс сое пусъёзы шуыса. Сузэрмы вала: со праздник Инмарлы ярамон ӧвӧл. Соин ик со лякытэн вера, отчы уз пыриськы шуыса. 2) Возьдаськись егит агай коркась корка ветлыса тодытэ. Со тодэ, мукетаз коркан солэн ӵош дышетскисез улэ шуыса, кудӥз Иеговалэсь Адӟись-Ивортӥсьёссэ мыскылля. Озьы ке но со отчы мынэ но ӧсаз йыгаське. 3) Агайлы, семьязэ сюдон понна, трос ужано луэ. Одӥг пол кузёез сое шонертэм уж лэсьтыны яке катэз тӥяны косэ. Агай вала, ужтэк кыльыны быгатэ шуыса, но кузёезлы валэктэ, со озьы уз лэсьты шуыса, малы ке шуоно Инмарлэн потэ, солэн ужась-тыршисьёсыз пӧяськытэк мед улозы но катэз мед гажалозы шуыса (Рим. 13:1—4; Евр. 13:18).

2. Кыӵе юанъёсты ми эскеромы но малы?

² Кыӵе сямзы адӟиськиз та христианъёслэн? Тӥ соослэсь кышкасьтэм но пӧяськисьтэм луэмзэс пусйиды, дыр. Но одӥг сям, кудзэ соос возьматӥзы, тужгес но дуно. Со дун-шектэм, яке дун-чылкыт, луон. Куинь учыръёсын ик христианъёс Иеговалы оскымон кылизы но Инмарлэсь катъёссэ тӥяны пумит луизы. Соос озьы лэсьтӥзы, малы ке шуоно Инмарлэн син азяз дун-чылкыт кылемзы потэ вал. Зэм но, Иегова котькудӥныз соос пӧлысь данъяське. Милям но потэ, Инмысь Атаймы милемын мед данъяськоз шуыса. Соин ик ойдолэ эскеромы куинь юанъёсты: мар со сыӵе дун-чылкыт луон? Малы со туж кулэ луэ? Мар милемлы юрттоз дун-чылкыт луыны та секыт дыръёсы?

3. а) Кытысь адӟыны луэ Инмарлэн ужась-тыршисьёсызлэсь дун-чылкыт луэмзэс? б) Кыӵе примеръёс валаны юртто, мар со сыӵе быдэс, шектэм но тыр луон?

³ Вераськон мынэ ке ми сярысь, Инмарлэн ужась-тыршисьёсыз сярысь, дун-чылкыт луон возьматэ, ми Иеговаез вань сюлмынымы яратӥськомы но солы быдэсак оскымон луиськомы шуыса. Соин ик ми солэсь эриксэ котьку лыдэ басьтӥськомы. Еврей кыл, кудӥз Библиын «дун-шектэм» яке «дун-чылкыт» шуыса берыктӥське, возьматэ быдэс, шектэм но тыр луэмез. Озьы, пудо-животъёс, кудъёссэ израиль калык Иеговалы курбонлы вайылӥз, Законъя «шектэм» b луыны кулэ вал (Лев. 22:21, 22). Закон уг лэзьы вал Инмарлы курбонлы вайыны висись пудо-животэз яке пыдтэм, пельтэм но синтэм пудо-животэз. Иеговалы кулэ вал, со висисьтэм но нокыӵе изъянтэк мед луоз шуыса (Мал. 1:6—9). Но та куронын номыр паймымонэз ӧвӧл. Малы ке шуоно ми ноку но ум басьтэ сисьмем емышез, ишкалтэм бамъёсын книгаез яке ужан тӥрлыкез, кудаз кыӵе ке но люкетэз уг тырмы. Милемлы нокыӵе изъянтэк арбери кулэ. Озьы ик Иегова но учке сое яратэммы но солы оскымон луэммы шоры: отын изъянэз луыны кулэ ӧвӧл.

4. а) Быгато-а тырбыдэстэм адямиос дун-чылкыт луыны? Валэктэ. б) Мае возьма милесьтым Иегова, кызьы адӟиське Псалтирьысь 102:12—14?

⁴ Шонер-а малпаны, тырбыдэс адямиос гинэ дун-чылкытэсь луыны быгато шуыса? Шонер ӧвӧл, малы ке шуоно валаськомы, ми котьма ласянь умоесь ӧвӧл но милям трос тырмымтэосмы шуыса. Ойдолэ кык мугъёсты эскеромы, малы озьы малпаны шонертэм луэ. Нырысь ик, Иегова тырмымтэосмылы но янгышъёсмылы трос саклык уг висъя. Солэн Кылаз вераське: «Кузё-Инмаре, законлы пумит улэмъёсмес тодад возид ке,— Кузё-Инмаре! Кин пумозяз чидалоз?» (Пс. 129:3). Со тодэ, ми тырбыдэстэмэсь, сьӧлыкоесь шуыса, но гажаса-жаляса милемыз простить каре (Пс. 85:5). Кыкетӥез, Иегова тодэ, мае ми быгатӥськомы лэсьтыны, нош мае ум, соин ик лэсьтыны луымтэзэ милесьтым уг возьма. (Лыдӟе Псалтирез 102:12—14.) Соку мае возьматэ Инмарлэн син азяз дун-чылкыт луон?

5. Малы, дун-чылкыт луон понна, милемлы Иеговаез яратоно?

⁵ Инмарлэн син азяз дун-чылкыт луон понна, туж кулэ сое яратыны. Милемлы Инмарез вань сюлмысьтымы яратоно, сыӵе яратонмес уж вылын возьматоно но солы котьку оскымон луоно. Шуг-секытъёс дыръя но вань сюлмысьтымы яратонмес возьматӥськомы ке, ми Инмарлэн син азяз дун-чылкыт луиськомы (1 Пар. 28:9; Матф. 22:37). Нош ик малпаськомы статьялэн кутсконаз вераськись куинь христианъёс сярысь. Уг поты-а егит сузэрмылэн ӵош дышетскисьёсыныз дырзэ шулдыр ортчытэмез? Кельше-а егит агайлы мыскыл каронъёсты кылзыны? Но уг сюлмаськы-а агай, кудӥзлэн семьяез вань, ужзэ ыштоз шуыса? Соос тодо, Иеговалэн шонерлыко эсэпъёсыз вань шуыса, но соослэн инмысь Атайзылэсь сюлэмзэ шумпоттэмзы потэ. Иеговаез яратон соослэсь мылкыдзэс ӝутэ солэсь малпанъёссэ лыдэ басьтыны но шонер ужпум кутыны. Озьы соос возьмато, Инмарлэн син азяз дун-чылкытэсь луо шуыса.

6. а) Малы милемлы дун-чылкыт луоно? б) Малы Адам но Ева дун-чылкыт кыльыны ӧз быгатэ?

⁶ Малы вань христианъёслы туж кулэ дун-чылкыт луыны? Малы ке шуоно одӥг бугыръяськись кылчин Инмарлы но котькудмылы пумит султӥз. Едем садын ини со  Шайтан, яке «пумитъяськись» луиз. Со Инмарлэсь ӟеч нимзэ саптаз, куке вераны тыршиз, Иегова урод, ассэ гинэ яратӥсь но пӧяськись кивалтӥсь шуыса. Жаляса верано луэ, Адам но Ева, Шайтан пала кариськыса, Инмарлы пумит мынӥзы (Ул.-выл. 3:1—6). Едем садын соослэн Иеговаез яратонзэс юнматыны трос луонлыксы вал. Нош куке Шайтан Иеговалы пумит султӥз, тодмо луиз, соос Инмарез вань сюлмысьтызы уг ярато шуыса. Берлогес, Иов улон нуналъёсы, эшшо одӥг юан ӝутэмын вал: одӥг ке но адями, Иеговаез яратыса, солы оскымон кылёз-а? Мукет сямен вераса, быгато-а адямиос Инмарлэн син азяз дун-чылкытэсь луыны?

7. Мар малпаз Иегова Иов сярысь, нош мар — Шайтан, кызьы адӟиське Иов книгаысь 1:8—11?

⁷ Иов улӥз со дыре, куке Израиль калык Египетын вал. Соку Иов кадь Инмарлы оскымон одӥг адями но ӧй вал. Ми сямен ик, Иов тырбыдэстэм адями вал но янгышъёс лэсьтылӥз. Но Иегова Иовез дун-чылкыт луэмез понна яратӥз. Шайтан со дырозь но Иеговаез сантэмаз ини, вылды, адямиослэн дун-чылкыт луэмзы сярысь юанэз ӝутыса. Соин ик Иегова Шайтанлэсь саклыксэ Иовлы висъяз. Та адямилэн улэмез возьматӥз, бугыръяськись кылчин пӧяське шуыса. Шайтан Иовез эскерыны ӵектӥз. Иегова быдэсак оске вал Иов эшезлы, соин ик Шайтанлы сое эскерыны лэзиз. (Лыдӟе Иов книгаез 1:8—11.)

8. Кызьы Шайтан Иовлэсь оскымон луонзэ тӥяны тыршиз?

⁸ Шайтан туж лек. Со адями виылӥсь. Со басьтӥз Иовлэсь ваньзэ, маиз солэн вал: ваньбурзэ, ляльчиоссэ, озьы ик ӟеч нимзэ но. Куректонэн пумиськиз Иовлэн семьяез но: Шайтан вииз Иовлэсь дас нылпиоссэ, кудъёссэ со туж яратӥз. Нош Иовез туж секыт  висёнэн курадӟытӥз: быдэс мугорыз — пыдтышкысеныз йырпыдэсозяз — туж лек гижло чер висёнэн шобырскиз. Иовлэн кышноез, туж зол кайгырыса, вераз: «Инмарез курла-сантэма но кул». Иовлэн аслаз но кулэмез потэ вал, озьы ке но со Иеговалэн син азяз дун-чылкыт кылиз. Соку Шайтан мукет амалэз кутыны малпаз. Со Иовлэсь куинь эшъёссэ кутӥз. Соос лыктӥзы со доры но трос нуналъёс ӵоже соин ӵош вал. Нош Иовез соос ӧз буйгатэ. Шӧдонъёсыз сярысь сюлмаськытэк, соос Иовез визьноданы но лек кылъёсын янгыше уськытъяны кутскизы. Соос веразы, курадӟонъёсты со вылэ Инмар лэзиз шуыса но солы Иовлэн дун-чылкыт луэмез нокыӵе но уг поты шуыса. Со сяна, соос веразы, Иов сьӧлыкъёсыз понна курадӟонъёсын пумиськиз шуыса (Иов 1:13—22; 2:7—11; 15:4, 5; 22:3—6; 25:4—6).

9. Мае ӧз лэсьты Иов, шуг-секытъёсын пумиськыса но?

⁹ Кызьы Иов курадӟонъёсыз шоры учкиз? Со тырбыдэстэм вал, но ӧрекчи буйгатӥсьёсыныз лек кылъёсын вераськиз. Иов аслаз шонерлыкез сярысь тросгес сюлмаськиз, Инмарлэн шонерлыкез интые (Иов 6:3; 13:4, 5; 32:2; 34:5). Но туж секыт дыръёсы но Иов Иеговалэсь ӧз палэнскы. Со ӧрекчи эшъёсызлэн пӧяськемзылы ӧз оскы но соослы вераз: «Тӥ шонер лэсьтӥсьёс шуыса, мон чик но уг малпаськы, кулытозям мон аслэсьтым дун-шектэм луонме ватыса уг возьы» (Иов 27:5). Та кылъёс возьмато, Иов, номыр шоры учкытэк, дун-чылкыт кыльыны ужпум кутӥз шуыса. Иов Инмарлы оскымон кылиз бере, ми но быгатомы.

10. Кызьы милемын герӟаськемын юан, кудзэ Шайтан Иов улон нуналъёсы ӝутӥз?

¹⁰ Юан, кудзэ Шайтан ӝутӥз Иов улон нуналъёсы, милемын но герӟаськемын. Шайтан вера, ми Иеговаез ум яратӥське, улонмес утён понна, ми солы ужам-тыршемысь дугдомы но дун-чылкыт ум кыле шуыса (Иов 2:4, 5; Усьт. 12:10). Сыӵе янгыше уськытонъёс вӧсь каро. Но малпаське: Инмар милемлы туж оске, соин ик со паймымон луонлык сётэ. Иегова Шайтанлы дун-чылкыт луэммес эскерыны лэзе. Иегова оске: ми солы оскымон луомы но возьматомы, Шайтан пӧяське шуыса. Но со милемлы юрттыны кыл сётэ (Евр. 13:6). Милемлы ачиз Дунне Кутӥсь оске. Макем со бадӟым дан! Валаськоды-а тӥ, малы Инмарлэн син азяз туж кулэ дун-чылкыт луыны? Малы ке шуоно озьы ми возьматомы, Шайтанлэн янгыше уськытонъёсыз шонертэм луо шуыса, Инмарлэсь ӟеч нимзэ утёмы но солэн кивалтэтэз пала кариськомы. Мар милемлы кароно, Инмарлэн син азяз дун-чылкыт кылён понна?

11. Малы дышетэ милемыз Иовлэн примерез?

¹¹ Та дуннелэн берпум нуналъёсаз Инмарлэсь ужась-тыршисьёссэ Шайтан эшшо но зол зӥбыны тырше (2 Тим. 3:1). Кытысь милемлы кужым басьтоно, Инмарлэн син азяз дун-чылкыт кылён понна? Нош ик тросэзлы дышетскыны луэ Иовлэн примерысьтыз. Шуг-секытъёсын пумиськемезлэсь азьло со трос пол Инмарлы оскымон луэмзэ возьматылӥз. Солэн примерысьтыз куинь пайдаё малпанъёсты шедьтыны луэ, кудъёсыз юрттозы милемлы Инмарлы оскымон кыльыны. Ойдолэ соосты эскеромы.

12. а) Малы луыса Иов Иеговаез сӥлы кариз но гажаз, кызьы адӟиське Иов книгаысь 26:7, 8, 14? б) Мар юрттоз милемлы Иегова шоры Иов сямен учкыны?

¹² Иеговаез сӥлы карон Иовлы Инмарез эшшо но юнгес яратыны юрттӥз. Иов дыр шедьтэ вал паймымон кылдытэмъёс сярысь малпаськыны. (Лыдӟе Иов книгаез 26:7, 8, 14.) Куке со малпаськиз музъем, инбам, пилемъёс но гудыри сярысь, солэн сюлмыз Иеговаез сӥлы карон мылкыдын пачылме вал. Озьы ке но со вала вал,  Инмарлэн кылдытэмъёсыз сярысь туж ӧжыт тодэ шуыса. Озьы ик со Иеговалэсь кылъёссэ дунъяз. Со соос сярысь вераз: «Солэсь верам кылъёссэ золгес ути» (Иов 23:12). Иов Иеговаен данъяськиз но сое мур гажаз. Со аслэсьтыз Атайзэ яратӥз но сое шумпоттэмез потэ вал. Ваньмыз со юрттӥз солы Инмарлы оскымон кыльыны. Милемлы Иовлэсь адӟем кароно. Иов дыръёсы улӥсь адямиосын ӵошатыса, ми Инмарлэн кылдытэмъёсыз сярысь тросгес тодӥськомы. Со сяна, милям Инмарлэн кивалтэмез улсын гожтэм Библиямы вань, кудӥзлы луыса ми Иеговаез умой тодыны быгатӥськомы. Соин ик ми Кылдытӥсьмес сӥлы кариськомы но сое гажаськомы. Нош со мылкыдмес ӝутэ сое яратыны, солэсь кылзӥськыны но солэн син азяз котьку дун-чылкыт луыны (Иов 28:28).

13, 14. а) Кыӵе удысын Иов Инмарлэсь кылзӥськыса улӥз, кызьы адӟиське Иов книгаысь 31:1? б) Кызьы ми Иовлэсь адӟем карыны быгатӥськомы?

¹³ Иеговалэсь кылзӥськон Иовлы дун-чылкыт кыльыны юрттӥз. Иов валаз: Инмарлэсь кылзӥськытэк, дун-чылкыт луыны уг луы. Куке ми Иеговалэсь кылзӥськиськомы, солэн син азяз дун-чылкыт луон мылкыдмы юнма. Иов пӧртэм удысъёсын Инмарлэсь кылзӥськыны тыршиз. Кылсярысь, со ужпум кутӥз, кышномуртъёсын вераськыкуз, ассэ чакласькыса возьыны. (Лыдӟе Иов книгаез 31:1.) Иов кышнояськемын вал, но со тодӥз, аслад кышноед интые, мукет кышномуртъёс шоры ӝуатскем мылкыдын учкыны шонертэм шуыса. Туннэ ми улӥськомы сыӵе дуннеын, кудӥз милемыз азон-калгон сьӧлыке пыртыны тырше. Иовлэсь адӟем карыса, кузпалмы луисьтэм адямилы мултэс саклык висъяны уг яра. Озьы ик милемлы палэнсконо порнографилэсь но юрӟым суредъёслэсь, кудъёссэ туннэ котькытысь адӟыны луэ (Матф. 5:28). Ми котькуд нунал та удысын асьмемыз киямы возиськомы ке, милемлы Инмарлэн син азяз дун-чылкыт луыны капчигес луоз.

¹⁴ Озьы ик Иовлэн кылзӥськемез адӟиськиз отысь, кызьы со ваньбур шоры учке вал. Иов  валаз, узырлыкез вылэ оскиськыса улӥз ке, со секыт сьӧлык лэсьтоз но со понна кыл кутытэмын луоз шуыса (Иов 31:24, 25, 28). Туала дуннеын адямиос арбериослы но коньдонлы туж бадӟым саклык висъяло. Библиысь визь-кенешъёсты лыдэ басьтыса, ми коньдон но ваньбур шоры шонер учкиськомы ке, соку Инмарлэн син азяз дун-чылкыт кылёмы (Мад. 30:8, 9; Матф. 6:19—21).

15. а) Малы оскиз Иов но кызьы со солы дун-чылкыт кыльыны юрттӥз? б) Малы милемлы но сыӵе ик оскон кулэ?

¹⁵ Инмарлэсь кузьым басьтыны оскон Иовлы дун-чылкыт кыльыны юрттӥз. Иов оскиз, Инмар солэсь дун-чылкыт луэмзэ адӟе шуыса (Иов 31:6). Солы секыт вал ке но, со оскиз, Иегова сое бакель кароз шуыса. Зэм но, со оскон Иовлы дун-чылкыт кыльыны юрттӥз. Иегова туж шумпотӥз Иовлэн дун-чылкыт кылемезлы, соин ик со аслэсьтыз ужась-тыршисьсэ котьма ласянь бакель кариз, Иов озьы ик тырбыдэстэм вал ке но (Иов 42:12—17; Иак. 5:11). Нош азьланяз Иовез эшшо но трос бакель каронъёс возьмало на. Юн оскиськоды-а тӥ, Иегова дун-чылкыт луэмды понна тӥледыз бакель кароз шуыса? Милям Инмармы уг вошъяськы (Мал. 3:6). Тодамы возиськомы ке, Иегова оскымон луэммес дунъя шуыса, ми паймымон азьпал улонлы осконмес ноку но ум ыштэ (1 Фес. 5:8, 9).

16. Мар карыны юн мылкыдмы луыны кулэ?

¹⁶ Инмарлэн син азяз котьку дун-чылкыт кыльыны юн мылкыдды мед луоз! Куддыръя тӥ малпаны быгатоды, тӥ сяна, дун-чылкыт луыны нокин но уг тыршы шуыса. Но эн вунэтэ: тӥ огнады ноку но уд луэ. Тӥ Иеговалы ужалоды-тыршоды трос миллион вын-агайёсын но сузэр-апайёсын валче, кудъёсыз солэн син азяз дун-чылкытэсь кылё, озьы ик соосын но, кинъёс азьвыл солы оскымон кылизы, кулонлэсь кышкатэк но (Евр. 11:36—38; 12:1). Ойдолэ тодамы возёмы Иовлэсь кылъёссэ: «Дун-шектэм луонме ватыса уг возьы». Дун-чылкыт луонмы Иеговаез котьку мед данъялоз!