Мынам атае, Джон Миллз, пылатӥськиз 1913-тӥ арын Нью-Йоркын, куке солы 25 арес вал. Пылатӥськон сярысь речез Рассел агай вераз. Ӝоген атае Тринидад шормуӵе кошкиз. Отын со Констанс Фармер сузэрез кышно басьтӥз, кудӥз Библиез Эскерись вал но ӟырдыт мылкыдын тодытон уже пыриськиз. Атае но солэн Уильям Браун a эшез «Кылдытон сярысь фотодрамаез» возьматъязы. Соос та ужен выризы 1923-тӥ арозь, Браун агаез но солэсь кышнозэ Шундыпуксёнпал Африкае мыныны курытозязы. Нош мынам атае но анае, кудъёсызлэн инмын улыны осконзы вал, Тринидадын ужан-тыршонзэс азьланьтӥзы.

Семьяямы укмыс нылпиос вал. Нырысетӥ пизэс атае но анае Рутерфорд шуыса нимазы, Возьмаськон Башнялэн обществоезлэсь президентсэ кадь. Нош 1922-тӥ арын 30-тӥ толсуре вордӥськи мон, но монэ Вудворт шуыса нимазы, Клейтон Вудворт агайлэн нимызъя, кудӥз «Зарни даур» (али «Сайкалэ!») журналлэн редакторез вал. Ми шоръёзо школаез быдтӥмы, но анай-атаймы нырысь ик ужан-тыршонэн герӟаськем ужпумъёс пуктыны мылкыдмес ӝутӥзы. Анае туж быгатӥз адямиосын, Библия вылэ пыкиськыса, вераськыны, нош атае Библиысь учыръёсты вераны яратӥз, но со учыръёсысь адямиос син азямы улӟылӥзы кадь.

Анай-атаелэн тыршемзы юнме ӧй вал. Вить агайёс пӧлысь куинез Галаад школаез быдтӥзы, нош ньыль сузэръёс пӧлысь куинез трос аръёс ӵоже Тринидадын но Тобагоын пионеръёс луыса ужазы-тыршизы. Милемыз дышетыса но милемлы адӟем карон возьматыса, атае но анае милемыз «Кузё-Инмарлэн корказ» мерттӥзы шуыны луоз. Соослэн юрттэмзылы луыса ми «Инмармылэн азбаръёсаз» сяськаямы (Пс. 91:14).

Ми доры куное ӵем дыръя пионеръёс ветлӥзы. Соос ярато вал вераськыны Джордж Янг агай  сярысь, Канадаысь миссионер сярысь, кудӥз Тринидадэ лыктылӥз. Атае но анае ӝутскем мылкыдын верало вал Браун кузпалъёс сярысь, кудъёсыныз соос ӵош тодытӥзы но кудъёсыз Шундыпуксёнпал Африкае кошкизы. Ваньмыз та мынэсьтым, дас аресъем пияшлэсь, мылкыдме ӝутӥз кутскыны ӟеч иворез вераны.

Со дыре милям журналъёсмы зэмос луисьтэм религилэсь, тырмостэм вуз карон системалэсь но политикалэсь кырсь ужъёссэс шараязы. Соин сэрен 1936-тӥ арын, священникъёслэн ӵектэмзыя, Тринидадлэн кивалтӥсез Возьмаськон Башнялэн обществоезлэсь вань литературазэ уже кутыны ӧз лэзьы. Ми литературамес ватыса возимы, но бырытозяз сое лушкемен уже кутӥмы. Ми тодытон маршъёсы пыриськимы, пыдын но велосипедъёсын мыныса. Отын ми листокъёсты но плакатъёсты уже кутӥмы. Тунапуна карысь тодытӥсьёсын ӵош ми быдэс Тринидадэз ортчимы машинаен, кудаз рупор пуктэмын вал. Кыӵе со умой дыр вал! Духовной адямиосын эшъяськон мынэсьтым мылкыдме ӝутӥз 16 арес дыръям пылатӥськыны.

Анай-атаелэн дышетэмзы но егит дыръям ужаме-тыршеме мынэсьтым мылкыдме ӝутӥз миссионер луыны. Со мылкыды ӧз пуксьы соку но, куке мон 1944-тӥ арын Аруба шормуӵе кошки, кытын мон Эдмунд Каммингс агаен ӵош ужай-тырши. Ми туж шумпотӥмы, куке 1945-тӥ арын Ӝытанэ 10 адями лыктӥз. Вуонояз арын Арубаын нырысетӥ кенеш кылдӥз.

Со берегес ик мон Орис Уильямс ӵош ужаселы тодытыны кутски. Со, аслэсьтыз осконзэ утён вылысь, мур малпанъёс вералляз. Нош Библиез дышетыса, Орис тодӥз, малы зэмзэ ик дышетэ Инмарлэн Кылыз, но 1947-тӥ арын 5-тӥ толшоре со пылатӥськиз. Дыр ортчыса, ми ог-огмес яратӥмы но кузпалъяськимы. 1950-тӥ арын шуркынмон толэзьысен Орис пионер луыса ужаны-тыршыны кутскиз. Орисэн ӵош мынам улонэ мукет сямен мынӥз.

1955-тӥ арын милемыз Галаад школалэн 27-тӥ классаз дышетскыны ӧтизы. Со понна ми Орисэн ужмес кельтӥмы, коркамес но мукет ваньбурмес вузамы но Арубаысь кошкимы. Дышетсконмы йылпумъяськиз 1956-тӥ арын 29-тӥ пӧсьтолэзе, но ми Нигерие ужаны-тыршыны кошкимы.

Орис тодаз вайылӥз: «Иеговалэн духез потыны юрттэ шуг-секытъёс пыр, кудъёсыз миссионер луыса ужан-тыршонэн герӟаськемын. Картэным ӵошатоно ке, мынам миссионер луэме ноку но уг поты вал. Мон малпасько вал: умойгес луысал аслад коркад улыны но нылпиосты будэтыны. Нош куке мон валай, тодытон ужез берлолы кельтыны уг яра шуыса, мон учконъёсме воштӥ. Куке ми Галаад школаын дышетсконмес йылпумъямы, мынам юн мылкыды вал миссионер луыны. Нигерие ми „Куин Мэри“ лайнерен кошкимы. Милемыз келяны лыктӥз Уэрт Торнтон агай, кудӥз Норр агаен ӵош ужаз. Со милемлы шудо сюрес сӥзиз но вераз, ми Вефильын ужаломы-тыршомы шуыса. Тае кылыса, мынам мылкыды кӧня ке куашказ. Но мон малпанъёсме ӝог воштӥ но Вефилез яратӥ, кытын пӧртэм ужъёсты быдэсъяй. Тужгес но мыным кельше вал Вефиле лыктэм куноосты пумитаны. Мон адямиосты яратӥсько, но отын мон Нигериысь агайёслы но сузэръёслы юрттыны быгатӥ. Тросэз соос пӧлысь жадьыса, сиемзы-юэмзы потыса, тузонэсь луыса экскурсие вуо вал. Мыным кельше вал соосты утялтыны, соослы сиён сётыса но мукет кулэяськонъёссы сярысь сюлмаськыса. Ваньмыз та Иеговалы дун-чылкыт ужан-тыршон пӧлы пыре вал но мыным шумпотон вайылӥз».

1961-тӥ арын ми Тринидадэ вуимы ӵыжы-выжыосынымы адӟиськыны. Со пумиськонын Браун агай но вал. Со куд-ог тунсыко учыръёсты вераз, кудъёсыз Африкаын ужакуз-тыршыкуз луизы. Мон но верай, кызьы Нигериын тодытӥсьёслэн лыдзы йылэ. Соку Браун агай монэ ӟыгыртӥз но атаелы шуиз: «Джони, тон Африкае вуыны ӧд быгаты, нош Вудворт быгатӥз!» Собере атае вераз: «Азьланяз но озьы ик тыршы, пие!» Юнматӥсь кылъёс, кудъёссэ веразы трос аръёс ӵоже ужась-тыршисьёс, мылкыдме ӝутӥзы ужме эшшо но умойгес быдэсъяны.

1962-тӥ арын монэ нош ик дышетскыны ӧтизы Галаад школае 37-тӥ классаз. Со дышетскон 10 толэзь кыстӥськиз. Нигериысь филиаллэн чакласез Уилфред Гуч агай дышетскиз Школалэн  38-тӥ классаз, но сое Англие ыстӥзы. Со интые филиаллэн чакласез мон луи. Браун агай сямен, мон шаертӥ ӵем ветлылӥ. Со ветлонъёсы дыръя мон Нигериысь агайёсты умойгес тодӥ но соосты юнгес яратӥ. Соослэн ӧй вал трос ваньбурзы, кудӥз вал узыргес шаеръёсын улӥсьёслэн. Озьы ке но та христианъёс шумпотыса улӥзы. Со яркыт возьматӥз, шудо улон ваньбурен но коньдонэн герӟаськемын ӧвӧл шуыса. Лыдэ басьтоно ке соослэсь югдуръёссэс, паймоно кадь, кызьы соос быгатӥзы пумиськонъёсы чылкыт но ӝикыт дӥськутэн ветлыны. Ӵем дыръя агайёс но сузэръёс конгрессъёсы ветлӥзы грузовикъёсын но болекаджаен b (со интыысь автобусъёсын). Со автобусъёс вылын ӵемысь тунсыко кылъёс гожтэмын луо вал, кылсярысь, «Океан — со туж трос шапыкъёс».

Макем шонер луо та кылъёс! Бадӟым ужын котькудӥзлэн тыршемез туж дуно. Ми но та ужын тыршимы. 1974-тӥ арын, Огазеяськем Штатъёсты лыдэ басьтытэк, Нигерия нырысетӥ шаер луиз, кытын тодытӥсьёслэн лыдзы 100 000-озь вуиз. Эксэйлык сярысь тодытон уж азинскиз!

1967-тӥ арысен 1970-тӥ арозь, куке тодытӥсьёслэн лыдзы йылэ вал, Нигериын граждан ож мынӥз. Трос толэзьёс ӵоже Биафра интыысь агайёс, кудӥз Нигер шурлэн мукет ярдураз вал, филиалэн герӟаськыны ӧз быгатэ. Ми соосты духовной сиёнтэк нокызьы но кельтыны ӧм быгатэ. Кызьы кутсконаз верамын вал ини, ми кӧня ке пол шур вамен потылӥмы, быдэсак Иеговалэн юрттэмезлы оскиськыса.

Мон туж умой тодӥсько на Нигер шур вамен кышкыт потанъёсмес. Милемыз ыбыны быгато вал яке ми кыӵе ке висёнлэсь кулыны быгатӥськомы вал. Со сяна, вал мукет но кышкытлыкъёс. Туж кышкыт вал шаерлэн ожгарчиосыз пыр потыны, нош эшшо но кышкытгес вал мукет ярдурысь бугыръяськисьёс пыр потыны. Одӥг уе мыным Асаба карысь Онича каре бадӟым но ӝог бызись Нигер шур вамен пыжен мыноно луиз. Отысен мон Энугу каре мынӥ, тӧроослэсь мылкыдзэс ӝутон понна. Мукет дыръя, агайёсты юнматон понна, мон Аба каре лыктӥ, кытын уйин тыл ӝуатъяны уг яра вал. Нош Порт-Харкорт карын милемлы пумиськонэз вӧсяськонэн дыртыса йылпумъяно луиз, малы ке шуоно шаерлэн ожгарчиосыз кар котырысь бугыръяськисьёсты уллязы.

Со пумиськонъёс агайёсмылы туж кулэ вал. Соослы луыса агайёс Иеговалэсь яратыса сюлмаськемзэ адӟизы но дырыз дыръя визь-кенешъёс басьтӥзы, кызьы огкылысь но нокин пала кариськытэк улыны. Со кышкыт ож дыръя Нигериысь агайёс Инмарлы оскымон кыльыны быгатӥзы. Соос возьматӥзы яратонзэс, кудӥз адӟемпотостэм каронэз ворме, но мукет христианъёсын огкылысь улыны быгатӥзы. Мон понна туж бадӟым дан вал, агайёсты со секыт дыръёсы юнматыны.

1969-тӥ арын Нью-Йоркын «Янки» стадионын «Музъем вылын каньыллык» калыккуспо конгресс ортчытӥськиз. Со конгрессын Милтон Хеншель агай председатель вал, нош мон солы юрттылӥ но тросэзлы солэсь дышетски. Со туж дырыз дыръя вал, малы ке шуоно 1970-тӥ арын Лагос карын (Нигерия) «Адямиос, кудъёсызлы ӟеч мылкыд возьматӥське» калыккуспо конгресс ортчиз. Лыдэ басьтоно ке, граждан ож али гинэ быриз шуыса, вераны луоз, Иеговалэн юрттэменыз гинэ, конгресс ортчиз шуыса. Отын 121 128 адями вал, но конгрессын верам речьёс нырысьсэ 17 кылъёсы берыктӥськизы. Норр но Хеншель агайёс, озьы ик мукет куноос Огазеяськем Штатъёсысь но Англиысь самолётъёсын лыктӥзы. Ваньзы соос учкизы, кызьы 3 775 адямиос пылатӥсько. Со одӥгез конгресс, кудаз Витьтонэтӥ Нунал бере тужгес но трос адямиос пылатӥськизы. Мон со конгрессэз радъяны юрттӥ, но сокем трос уже мынам ноку но ӧй вал на, дыр. Нигериын тодытӥсьёслэн лыдзы туж ӝог йылэ вал.

Ми Нигериын 30 арлэсь тросгес ужамы-тыршимы. Дырын-дырын мон Шундыпуксёнпал Африкаын ёросэз чакласьлэсь но зональной ужась-тыршисьлэсь ужзэ быдэсъяй. Макем миссионеръёс шумпото вал, куке мон соослы саклыкме висъяй но соослэсь мылкыдзэс ӝутылӥ. Мон шумпотыса соосты оскытӥсько вал, соос сярысь ӧз вунэтэ но соосты дунъяло шуыса. Та уж дышетӥз монэ: агайёслы но сузэръёслы нимысьтыз саклык висъяно, соку соос Иеговалы ужаны-тыршыны, солэсь организацизэ юнматыны но огкылысь улыны быгатозы.

 Иеговалэн юрттэменыз гинэ, ми ожен но висёнэн герӟаськем вань шуг-секытъёс пыр потыны быгатӥмы. Ми котьку шӧдӥмы Иеговалэсь бакель каремзэ.

Тани мае Орис тодаз вайылӥз: «Ми кӧня ке пол малярияен висимы. Одӥг пол Вудворт йырсазьзэ ыштӥз, но сое Лагосэ эмъюртэ вайизы. Мыным веразы, со кулыны но быгатэ шуыса, озьы ке но со улэп кылиз! Сайкамез бере ик со Эксэйлык сярысь тодытыны кутскиз эмъюртын ужась пиосмуртлы, кудӥз сое утялтэ вал. Берлогес ми со пиосмуртэн адӟиськимы на, Библиез тодыны мылкыдзэ будэтон понна. Со пылатӥськиз но, дыр ортчыса, Аба карын тӧро луыса ужаз-тыршиз. Мон но трос адямиослы, юн оскись мусульманъёслы но, юрттыны быгатӥ улонзэс Иеговалы сӥзьыны. Озьы ик ми туж шумпотӥськомы, Нигериын улӥсь адямиосты умойгес тодыны но соослэсь сям-йылолъёссэс но кылзэс яратыны быгатӥмы шуыса».

Ми эшшо мае ке валамы на: кунгож сьӧрын ужаку-тыршыку азинлыко луон понна, агайёсты но сузэръёсты яратыны дышетсконо но сям-йылолъёсмылэн пӧртэмлыксы шоры учконо ӧвӧл.

1987-тӥ арын милемлы выль уж сётэмын вал — Кариб зарезьысь Сент-Люсия чебер шормуӵын миссионеръёс луыса ужаны-тыршыны. Со уж туж умой вал, но со выль шуг-секытъёс вайиз. Африкаысь шаеръёсын пиосмурт кӧня ке кышно басьтыны быгатэ вал, нош та шормуӵын пиосмурт но кышномурт гожтӥськытэк ӵош уло вал. Инмарлэн Кылыз тросэзлэсь адямиослэсь, кудъёсыныз ми Библиез дышетӥмы, улонзэс воштыны мылкыдзэс ӝутӥз.

Аръёс ортчемъя кужыммы ӧжытгес луиз, но 2005-тӥ арын Кивалтӥсь кенеш яратыса ми сярысь сюлмаськиз но милемыз Бруклинэ (Нью-Йорк) Дунневыл валтӥсь кивалтонние ыстӥз. Мон котькуд нунал Иеговалы тау карисько, мынам Орис кышное вал шуыса. Со 2015-тӥ арын кулӥз, но вераны ик уг луы, кыӵе вӧсь вал сое ыштыны. Орис туж умой эш но яратӥсь кышно вал. Ми 68 ар ӵош улӥмы, но вань со аръёс ӵоже мон сое туж яратӥ. Ми валамы, мар милемлы кароно семьяын но, кенешын но шудо луон понна: йыр луон возетэз лыдэ басьтоно, ог-огдэ вань сюлмысьтыд простить кароно, зӥбыт-востэм луоно но духлэн емышез пӧлы пырись сямъёсты возьматоно.

Куке милям сюлмаськонъёсмы вал яке мылкыдмы куашкамын вал, ми Иеговаез куримы, со ужан-тыршонмы вылын медаз шӧдӥськы шуыса. Ми котьку тыршимы янгышъёсмы вылын ужаны но воштӥськыны, но адӟимы, кызьы Инмарлэн организацияз умой пала воштӥськонъёс ялан луыло. Нош самой умоез азьпалан на! (Ис. 60:17; 2 Кор. 13:11).

Иегова атаелэсь но анаелэсь Тринидадын но Тобагоын ужам-тыршемзэс бакель кариз, но берпум отчётъя али отын 9 892 тодытӥсьёс ужало-тыршо. Арубаын агайёс туж тыршизы юнматыны нырысетӥ кенешез, кудаз мон ужай-тырши, но али со шормуӵын 14 азинлыко кенешъёс. Нигериын тодытӥсьёслэн лыдзы туж паймымон — 381 398. Нош Сент-Люсия шормуӵын Эксэйлык сярысь иворез тодыто 783 адямиос.

Мыным 90 ареслэсь тросгес ини. Соос сярысь, кинъёс Иеговалэн корказ мерттэмын шуыны луоз, Псалтирьын 91:15 гожтэмын: «Пересьмыса но соос емыш вайисесь, куасьмисьтэмесь, шуясьтэмесь луо». Мон Иеговалы туж тау карисько улонэ понна, кудзэ мон солы ужаса-тыршыса ортчытӥ. Со, малы мон егит дыръям дышетэмын вал, мылкыдме ӝутӥз быдэс улонме Иеговалы ужан-тыршонлы сӥзьыны. Со мыным оскиськымон яратонзэ возьматӥз но азбаръёсаз сяськаяны луонлык сётӥз (Пс. 91:14).