1, 2. Малы Левит книга туала христианъёслы тунсыко луэ?

 АПОСТОЛ Павел тодаз вайытӥз Тимофей эшезлы, «быдэс Священной Гожтэм Инмарлэн Духеныз вордскытэмын» но пайда вае шуыса (2 Тим. 3:16). Священной Гожтэмъёс пӧлы Левит книга но пыре. Мар тӥ со сярысь малпаськоды? Куд-огъёсыз малпало, та книгаын гожтэмын законъёс, кудъёссэ туала улонын кутыны уг луы шуыса. Нош зэмос христианъёс мукет сямен малпало.

² Левит книга ог 3 500 аръёс талэсь азьло гожтэмын вал. Озьы ке но Иегова сюлмаськиз, со ми дырозь мед вуоз шуыса, «асьмемыз визьман-дышетон понна» (Рим. 15:4). Со юрттэ милемлы Иеговалэсь малпанъёссэ валаны, соин ик милемлы сое мур эскерыны туж кулэ. Та книгаын трос пайдаё урокъёс вань. Ойдолэ эскеромы соос пӧлысь ньыльзэ.

3. Малы Чылкытатӥськон-сузяськон нуналэ курбонъёсты вайылоно вал?

³ Нырысетӥ урок. Иегова курбонъёсмес мед басьтоз шуыса, ми солы ярамон луыны кулэ. Котькуд ар, Чылкытатӥськон-сузяськон нуналэ, вань израиль калык ӵош люкаськылӥз, но быдӟым священник пудо-животъёсты курбонлы вайылӥз. Та курбонъёс израиль калыклы тодаз вайытылӥзы, солы сьӧлыкезлэсь чылкытатӥськыны кулэ шуыса. Быдӟым священниклы курбонэ ваем пудо-животлэн вирыныз Святойлэсь но святой интые пыроно вал. Нош, калыкез сьӧлыкезлэсь чылкытатон понна, солы нырысь ик мукет кулэгес ужез лэсьтоно вал.

4. Левитэз 16:12, 13 лыдэ басьтыса, мар каре вал быдӟым священник, Чылкытатӥськон-сузяськон нуналэ Святойлэсь но святой интые нырысетӥзэ пырыкуз? (Учке вылбамысь суредэз.)

 ⁴ Лыдӟе Левитэз 16:12, 13. Ойдолэ син азямы пуктомы сое, кызьы ортче вал Чылкытатӥськон-сузяськон нунал. Быдӟым священник скинияе пыре. Та нуналэ солы куинь пол Святойлэсь но святой интые пыроно, но таиз — нырысетӥез. Одӥг кияз солэн ческыт зын поттӥсь фимиамен сосуд, нош мукетаз — ӝуась эгыръёсын тырмытэм зарни лопатка. Со дугдэ катанчи азьын, кудӥз Святойлэсь но святой интые пырон азьын ошемын. Священник Святойлэсь но святой интые мур гажанэн пыре но сӥзён-косонэн ковчег азе дугдэ. Вераны луоз, быдӟым священник ачиз Иегова азьын сылэ! Священник священной фимиамез ӝуась эгыръёс вылэ каллен кисьтэ, но омыр ческыт зынэн тырме b. Берлогес со Святойлэсь но святой интые нош ик пыроз пудо-животъёслэн вирынызы, кудъёсыз сьӧлык понна курбонлы ваемын вал. Висъялэ саклыктэс: священник фимиамез эгыръёс вылэ кисьтэ курбонлы ваем вирез ваён азьын.

5. Малы милемыз дышетыны быгатэ Чылкытатӥськон-сузяськон нуналэ быдӟым священниклэн фимиамез ӵындытэмез?

⁵ Малы милемыз дышетыны быгатэ Чылкытатӥськон-сузяськон нуналэ быдӟым священниклэн фимиамез ӵындытэмез? Библиын фимиамен ӵошатӥсько Иеговалэн оскымон ужась-тыршисьёсызлэн вӧсяськонъёссы (Пс. 140:2; Усьт. 5:8). Кызьы гожтэмын вал ини, быдӟым священник фимиамез Иегова азьын мур гажанэн ӵындытэ вал. Сыӵе ик гажанэн ми но Иеговалы вӧсяськыкумы вазиськиськомы. Ми сое сӥлы кариськомы. Ми туж шумпотӥськомы: Дуннеез Кылдытӥсь лэзе милемлы соин матысь кусыпъёс возьыны, озьы ик, кызьы нылпиослэн атаенызы матысь кусыпъёс луо (Иак. 4:8). Со милемыз аслаз эшъёсыныз лыдъя! (Мад. 3:32). Та кусыпъёс милемлы туж дуно пото, соин ик милям Иеговаез ноку но ӝоже уськытэммы уг поты.

6. Малы ми дышетскыны быгатӥськомы, быдӟым священник фимиамез пудо-животъёсты курбонлы ваемезлэсь азьло ӵындытэ вал шуыса?

⁶ Со сяна, быдӟым священниклы фимиамез ӵындытоно вал пудо-животъёсты курбонлы ваемезлэсь азьло. Солы луыса со юн оскиз, ваёно курбонэз Иеговалы ярамон луоз шуыса. Озьы ик Иисуслы музъем вылын дыръяз, улонзэ курбонлы сётэмезлэсь азьло, мае ке кулэзэ лэсьтоно вал — сое, мар адямиосты утёнлэсь кулэгес луэ вал. Иисуслэн курбонэз Иеговалы ярамон мед луоз шуыса, Иисуслы быдэс улонэз ӵоже дун-чылкыт луоно но Инмарлэсь кылзӥськоно вал. Озьы Иисус возьматысал, Иеговалэсь эриксэ быдэсъян — со тужгес но шонер улон сюрес шуыса но Атаезлэн гинэ кивалтыны правоез вань шуыса.

7. Малы Иисуслэн музъем вылын улонэз Иеговаез шумпоттӥз?

⁷ Быдэс улонэз ӵоже Иисус котьку Иеговалэсь кылзӥськиз. Со визь сынаськонъёс но шуг-секытъёс пыр потӥз ке но, озьы ик со тодӥз ке но, туж курадӟыса кулоз шуыса, Иисуслэн юн мылкыдыз вал возьматыны, Атаезлэн кивалтон амалэз тужгес но умой луэ шуыса (Флп. 2:8). Бадӟым шуг-секытъёсын пумиськыса, «Иисус викышъяса, синкылиен» Иеговалы вӧсяськиз (Евр. 5:7). Иисуслэн ӟырдыт вӧсяськонъёсыз Иеговалы быдэсак оскымон луэмзэ возьматӥзы но Иеговалэсь кылзӥськыны мылкыдзэ юнматӥзы. Иисуслэн вӧсяськонъёсыз Иеговалы ческыт зыно фимиам кадь пото вал. Иисуслэн быдэс улонэз  солэсь Атайзэ туж шумпоттӥз но возьматӥз, Инмарлэн кивалтыны правоез вань шуыса.

8. Кызьы ми Иисуслэсь адӟем карыны быгатӥськомы?

⁸ Кызьы ми Иисуслэсь адӟем карыны быгатӥськомы? Милемлы вань кужмысьтымы тыршоно Иеговалэсь кылзӥськыны но солы оскымон луыны. Милям Иеговаез шумпоттэммы потэ, соин ик, шуг-секытъёсын пумиськыкумы, юрттэт курыса, ми солы вань сюлмысьтымы вӧсяськиськомы. Озьы ми Иеговалэн кивалтэтэзлы дурбасьтӥськомы. Ми валаськомы: лэсьтӥськомы ке сое, мае Иегова адӟемпотостэм каре, со милесьтым вӧсяськонъёсмес уз кылзы. Нош ми лэсьтӥськомы ке сое, мае Иегова яратэ, юн оскыны луэ, сюлмысь вӧсяськонъёсмы солы ческыт зыно фимиам кадь потозы шуыса. Со сяна, ми юн оскиськомы: кылзӥськеммы но оскымон луэммы инмысь Атаймес шумпотто (Мад. 27:11).

9. Малы израиль калык тупаса улонлы сӥзем курбонъёсты вайылӥз?

⁹ Кыкетӥ урок. Ми Иеговалы ужаськомы-тыршиськомы, малы ке шуоно солы тау кареммы потэ. Тае умойгес валан понна, ойдолэ эскеромы тупаса улонлы сӥзем курбонъёсты, кудъёссэ израиль калык вайылӥз c. Левит книгаысь ми тодӥськомы, израиль калык тупаса улонлы сӥзем курбонъёсты «тау карыса» вайылӥз шуыса (Лев. 7:11—13, 16—18). Та курбонъёсты одно ик ваёно ӧй вал. Соосты адямиос ас мылкыд каремзыя, Иегова Инмарзэс яратыса, вайылӥзы. Адями пудо-животэз курбонлы вайылӥз, нош собере со, солэн семьяез  но священникъёс та пудо-животлэсь сӥльзэ сиё вал. Нош пудо-животлэсь куд-ог люкетъёссэ Иеговалы гинэ сётоно вал. Кыӵе люкетъёссэ?

10. Кызьы тупаса улонлы сӥзем курбонъёс, кудъёсыз сярысь Левитын 3:6, 12, 14—16 вераське, валаны юртто, мар Иисуслэсь мылкыдзэ ӝутылӥз Атаезлэсь эриксэ быдэсъяны?

¹⁰ Куинетӥ урок. Ми Иеговаез яратӥськомы, соин ик солы тужгес но умойзэ сётӥськомы. Иегова кӧез пудо-животлэн тужгес но умой люкетэныз лыдъяз. Озьы ик со вераз, пудо-животлэн куд-ог люкетъёсыз, кылсярысь пекляос, тужгес но дуноесь вал шуыса. (Лыдӟе Левитэз 3:6, 12, 14—16.) Соин ик Иеговалы туж кельше вал, куке израиль калык пудо-животъёслэсь та люкетъёссэ но кӧйзэ ас мылкыд каремезъя вайылӥз. Сыӵе курбонъёсты вайылыса, со возьматӥз, Иеговалы тужгес но умойзэ сётыны юн мылкыдыз вань шуыса. Озьы ик Иисус но Иеговаез яратӥз но, вань сюлмысьтыз ужаса-тыршыса но дась луыса, солы тужгес но умойзэ сётылӥз (Иоанн 14:31). Иисус Иеговалэсь эриксэ быдэсъяны туж шумпотэ вал (Пс. 39:9). Инмарлэсь законзэ со туж яратэ вал. Иегова туж шумпотӥз адӟыны, кызьы Иисус дась луыса солы ужаз-тыршиз!

11. Маин кельшо тупаса улонлы сӥзем курбонъёс но милям ужан-тыршонмы? Малы со милемыз буйгатэ?

¹¹ Тупаса улонлы сӥзем курбонъёсты ваем кадь ик, ми Иеговалы ас мылкыд кареммыя ужаськомы-тыршиськомы. Ми солы тужгес но умойзэ сётӥськомы, малы ке шуоно вань сюлмысьтымы сое яратӥськомы. Пуктэ син азяды, макем шумпотэ Иегова, куке адӟе трос миллион ужась-тыршисьёссэ, кудъёсыз сое но солэсь курон-косонъёссэ ярато! Иегова адӟе но дунъя ужъёсмес, нош озьы ик сое, малы ми соосты лэсьтӥськомы. Та малпан милемыз туж буйгатыны быгатэ. Кылсярысь, тӥ егитэсь ӧвӧл ни ке но ужан-тыршонын азьвыл мында лэсьтыны уд ке быгатӥське, эн вунэтэ, Иегова тӥледыз туж умой вала шуыса. Тӥ малпаны быгатӥськоды, Иегова понна трос лэсьтыны уд быгатӥське шуыса. Нош Иегова адӟе: яратон тӥлесьтыд мылкыддэс ӝутэ ас югдуръёсады лэсьтыны ваньзэ, мае быгатӥськоды. Со шумпотэ, тӥ солы вань сюлмысьтыды ужаськоды-тыршиськоды шуыса.

12. Мар шӧдӥз Иегова, куке тупаса улонлы сӥзем курбонъёсты вайылӥзы, но малы со милесьтым мылкыдмес ӝутэ?

¹² Малы милемыз дышетыны быгатэ тупаса улонлы сӥзем курбонъёсты ваён? Куке тыл пушкын курбонэ ваем пудо-животлэн тужгес но умой люкетъёсыз ӝуало вал но ӵын инме ӝутске вал, со Иеговаез шумпоттылӥз. Оске: ужан-тыршонын тӥ тужгес но умойзэ сётӥськоды ке, со но Иеговаез туж шумпоттэ (Кол. 3:23). Пуктэ син азяды, кызьы, тӥ шоры учкыса, Иегова пальпотэ. Иегова саклыксэ уг висъя солы, кӧня тӥ ужаны-тыршыны быгатӥськоды — трос-а яке ӧжыт-а. Со дунъя тыршемдэс но ноку сое уз вунэты (Матф. 6:20; Евр. 6:10).

13. Левитэз 9:23, 24 лыдэ басьтыса, кызьы Иегова возьматӥз, пуктэм священникъёсты бакель каре шуыса?

¹³ Ньылетӥ урок. Иегова аслэсьтыз калыксэ бакель каре. Ойдолэ вераськомы со сярысь, мар луиз асьме вакытлэсь азьло 1512-тӥ арын, куке Сӥнай гурезь улын скиния пуктэмын вал (Пот. 40:17). Моисей одӥг ужрадэз ортчытӥз, кудӥз дыръя Аарон но солэн пиосыз священникъёс луыса пуктэмын вал. Израиль калык люкаськиз учкыны, кызьы священникъёс пудо-животъёсты нырысетӥзэ курбонлы ваёзы (Лев. 9:1—5). Кызьы Иегова возьматӥз, пуктэм священникъёсты бакель каре шуыса? Куке Моисей но Аарон калыкез бакель каризы, Иеговалэн эрикезъя инмысь тыл васькиз но сутӥз сое, мар  курбон сётон ӝӧк вылын вал. (Лыдӟе Левитэз 9:23, 24.)

14. Малы милемлы тунсыко потэ, Иеговалы Аарон но солэн пиосыз ярамонэсь вал шуыса?

¹⁴ Мае возьматӥз инмысь васькем тыл? Озьы Иегова возьматӥз, Аарон но солэн пиосыз, кудъёссэ со священникъёс луыса пуктӥз, солы быдэсак ярамон луо шуыса. Куке израиль калык адӟиз, соос Иеговалы ярамон луо шуыса, калык валаз: со но священникъёслы котьку юрттыны кулэ. Герӟаськемын-а со милемын? Одно ик герӟаськемын. Израильын священникъёсты пуктон возьматэ вал тужгес но Быдӟым священникез пуктонэз — Иисус Христосэз но 144 000 эксэйёсты но священникъёсты, кудъёсыз соин ӵош инмын кивалтозы (Евр. 4:14; 8:3—5; 10:1).

15, 16. Кызьы Иегова возьматэ, «оскиськымон, визьмо ляльчилы» юрттэ шуыса?

¹⁵ Иисус 1919-тӥ арын куд-ог зырӟем вын-агайёсты «оскиськымон, визьмо ляльчи» луыса пуктӥз. Та ляльчи тодытон ужен кивалтэ но Христос сьӧры мынӥсьёслы «ас дыраз сиён» сётэ (Матф. 24:45). Адӟиськомы-а ми валамон оскытонъёсты, кудъёсыз возьмато, оскиськымон но визьмо ляльчи Иеговалы ярамон луэ шуыса?

¹⁶ Шайтан но солэн ки улаз возиськись дунне оскымон ляльчилы вань кужмысьтызы люкетыны тыршо Христослэсь ужзэ быдэстыны. Иеговалэн юрттэмезтэк оскымон ляльчи сое быдэстыны ӧз быгатысал. Мар гинэ медаз люкеты — кык дунневыл ожъёс, коньдонэн герӟаськем быдэс дунне вылысь шуг-секытъёс, зэмос христианъёсты ялан кыстӥськись уйылон-уллянъёс но адямиослэн соосын асьсэды шонерлыктэм воземзы,— оскымон но визьмо ляльчи духовной сиён сётыны азьланьтэ. Малпаське, макем трос милям туннэ Библия вылэ пыкиськыса  гожтэм публикациосмы вань. Соос 900-лэсь но тросгес кылъёсын поттӥсько, но котькудӥз сое чик но дун тырытэк басьтыны быгатэ. Ваньмыз таиз валамон возьматэ, Иегова ляльчилы юрттэ шуыса! Со сяна тодытон уж но возьматэ, Иегова оскымон ляльчиез бакель каре шуыса. Ӟеч иворез зэм но «быдэс дунне вылын» тодыто (Матф. 24:14). Оскыны луэ: Иегова организациеныз кивалтэ но сое жалятэк бакель каре.

17. Кызьы возьматоно, ми Иеговалэн организацияз пыриськомы шуыса?

¹⁷ Умой луысал аслэсьтыд юаны: «Вань-а мынам тау карон мылкыды, мон Иеговалэн организацияз пырисько шуыса?» Озьы ик, кызьы Моисей но Аарон нуналъёсы инмысь тыл васькиз, туннэ но ми валамон адӟиськомы, Иегова милемлы юрттэ шуыса. Милям трос мугъёсмы вань Иеговалы тау карыны (1 Фес. 5:18, 19). Кызьы ми возьматыны быгатӥськомы, Иеговалэн организацияз пыриськомы шуыса? Со понна милемлы быдэсъяно Библиысь курон-косонъёсты, кудъёссэ ми публикациосысьтымы шедьтӥськомы, озьы ик кенешлэн пумиськонъёсаз но конгрессъёсын кылӥськомы. Со сяна, ми тодытон уже ӟырдыт мылкыдын пыриськиськомы но выль дышетскисьёсты дасяськомы (1 Кор. 15:58).

18. Мар карыны тӥляд юн мылкыдды вань?

¹⁸ Юн мылкыдмы мед луоз уже кутыны сое, мае ми тодӥмы Левит книгаысь. Милям потэ, курбонъёсмы Иеговалы ярамонэсь мед луозы шуыса. Ми Иеговалы ужаськомы-тыршиськомы, малы ке шуоно милям солы тау кареммы потэ. Ми Иеговалы тужгес но умойзэ сётӥськомы, малы ке шуоно вань сюлмысьтымы сое яратӥськомы. Ми лэсьтӥськомы ваньзэ, мае быгатӥськомы, солэн организациезлы юрттон понна. Озьы ми Иеговалы возьматӥськомы, солэн Адӟись-Ивортӥсьёсыз луыны ми понна бадӟым дан шуыса!