1. Малы дышето милемыз Екклесиастын 3:7 гожтэм кылъёс?

 МИ ПӦЛЫСЬ куд-огъёсыз ярато вераськыны, нош мукетъёсыз — шып улыны. Кызьы гожтэмын статьямылэн валтӥсь кылбураз, шып улонлэн аслаз дырыз но вераськонлэн аслаз дырыз. (Лыдӟе Екклесиастэз 3:7.) Нош куддыръя милям потэ, дыр, куд-ог вын-агайёс но сузэр-апайёс тросгес мед вераськысалзы шуыса, нош мукетъёсыз — ӧжытгес.

2. Кин быгатэ курон-косонъёс пуктыны со пумысен, ку но кызьы милемлы вераськоно?

² Вераськон — со Иеговалэн кузьымез (Пот. 4:10, 11; Усьт. 4:11). Аслаз Кылыз пыр со дышетэ милемыз та кузьымез шонер уже кутыны. Та статьяын ми эскеромы Библиысь кык учыръёсты, кудъёсыз милемлы валаны юрттозы, ку вераськоно, нош ку шып улоно. Озьы ик ми тодомы, кызьы Иегова учке со шоры, мае ми мукетъёсызлы вераськомы. Нош нырысь эскеромы, ку вераськонлэн дырыз.

3. Римъёслы 10:14 лыдэ басьтыса, ку милемлы дась луоно Иегова сярысь но солэн Эксэйлыкез сярысь вераськыны?

³ Ми котьку дась луыны кулэ Иегова сярысь но солэн Эксэйлыкез сярысь вераны (Матф. 24:14; лыдӟе Римъёслы 10:14). Озьы ми Иисуслэсь адӟем каромы. Одӥгез валтӥсь муг, малы Иисус музъем вылэ лыктӥз,— Атаез сярысь зэмлыкез вераны (Иоанн 18:37). Со сяна, чакланы кулэ сое, кызьы ми вераськомы. Соин ик, адямиосын Иегова сярысь вераськыкумы, милемлы «востэмен, гажась мылкыдын» вераськоно но лыдэ басьтоно соослэсь шӧдонъёссэс но учконъёссэс (1 Пётр 3:15). Соку, адямиен огшоры гинэ вераськем сяна, ми  сое малы ке дышетомы но сюлэмзэ вырӟытомы, дыр.

4. Мадёнъёсты 9:9 лыдэ басьтыса, кызьы милям вераськонмы мукетъёсызлы юрттыны быгатэ?

⁴ Тӧроослы шып улоно ӧвӧл, куке соос адӟо, вын-агайлы яке сузэр-апайлы визь-кенеш кулэ шуыса. Зэм но, соос медаз кепыралэ шуыса, тӧроос вераськыны тупась дыр быръёзы. Оло нош, соослы возьмано луоз, куке котыразы мукет адямиос уз луэ. Тӧроос вын-агайёсын но сузэр-апайёсын котьку но, гажамзэс возьматыса, вераськыны тыршо. Нош со дыре ик тӧроос кышкатэк возьмато соослы Библиысь возетъёсты, кудъёсыз юрттозы визьмо ужпум кутыны. (Лыдӟе Мадёнъёсты 9:9.) Малы мукетъёсызлы вераны кышкано ӧвӧл, соос шонертэм лэсьто шуыса? Эскеромы кык пӧртэм учыръёсты: Инмарлэн одӥг ужась-тыршисез пиоссэ тупатыны кулэ вал, нош мукетыз — вераськыны соин, кинлы эксэй луоно вал.

5. Мае вераны кышказ Илий аслаз пиосызлы?

⁵ Быдӟым священник Илий кык пиоссэ туж яратӥз, нош соос Иеговаез нокӧня но ӧз гажалэ. Соослы сётэмын вал дано уж — скинияын священникъёс луыса ужаны-тыршыны. Нош соос асьсэды шонертэм возизы но чик но ӧз гажалэ курбонъёсты, кудъёссэ Иеговалы вайылӥзы. Озьы ик соос нокыӵе возьыттэк азон-калгонэн выризы (1 Экс. 2:12—17, 22). Моисейлэн законэзъя Илийлэсь пиоссэ виыны кулэ вал. Нош Илий соослэн сьӧлыкъёссылы сокем трос саклыксэ ӧз висъя, соосты лякытэн гинэ алӥз но лэзиз соослы азьланяз но скинияын ужаны-тыршыны (К. Зак. 21:18—21). Кызьы та учыр шоры учкиз Иегова? Со Илийлы вераз: «Малы тон аслэсьтыд пиостэ Мынэсьтым вылӥе пуктӥськод?» Иегова ужпум кутӥз быдӟым священниклэсь кылзӥськисьтэм пиоссэ виыны (1 Экс. 2:29, 34).

6. Малы дышетэ милемыз Илийлэн учырез?

⁶ Илийлэн учырез милемлы алон луэ. Ми тодӥмы ке, эшмы яке ӵыжы-выжымы Инмарлэсь катсэ тӥяз шуыса, милемлы соин вераськоно но Иеговалэсь курон-косонъёссэ тодаз вайытоно. Собере валаны кулэ, Иеговаен пуктэм тӧроос солы юрттӥзы-а шуыса (Иак. 5:14). Милям Илий кадь луэммы уг поты. Соин ик ми ум лэзе, эшъёсынымы но ӵыжы-выжыосынымы кусыпъёсмы Иеговаен кусыпъёсмылэсь дуногес мед луозы шуыса. Зэм но, милемлы кышкасьтэм луоно, вераськон понна соин, кинлы визь-кенеш сётыны кулэ, но тыршеммы умой емышъёс  вайыны быгатэ. Табере саклыкмес висъяломы чылкак мукет учырлы — израиль калыкысь Авигея нимо кышномуртлы.

7. Малы Авигея ужпум кутӥз Давидэн вераськыны?

⁷ Авигеялэн картэз, Навал, узыр пиосмурт вал. Куке Давид но солэн адямиосыз Саул эксэйлэсь пегӟизы, соос кӧня ке дыр ӵоже Наваллэн ыж возьмасьёсыныз огазьын улӥзы но солэсь уллёоссэ таласьёслэсь утьылӥзы. Тау кариз-а Навал соослэн юрттэмзы понна? Ӧз. Куке Давид ас калыкезлы кӧня ке сиён но ву куриз, Наваллэн вожез потӥз, но со соосты ултӥяны кутскиз (1 Экс. 25:5—8, 10—12, 14). Собере Давид ужпум кутӥз Наваллэн коркаысьтыз вань пиосмуртъёсты виыны (1 Экс. 25:13, 22). Луэ-а вал та кышкыт учырлэсь палэнскыны? Авигея валаз, вераськыны дыр вуиз шуыса. Со кышкатэк 400 сютэм но лекомем ожгарчиослэн пумитазы потӥз, Давидэн вераськон понна.

8. Малы дышетэ милемыз Авигеялэн учырез?

⁸ Куке Авигея Давидэн пумиськиз, со соин кышкатэк, туж гажаса вераськиз, но Давидлэн мылкыдыз ӝутскиз лэсьтыны сое, мар сярысь та кышномурт вераз. Авигея кылдэм югдурын янгыш ӧй вал ке но, со Давидлэсь прощенизэ куриз. Со Давидлэн умой сямъёсызлы саклыксэ висъяз но оскемзэ возьматӥз, Давид шонер ужпум кутоз шуыса. Озьы ик Авигея оскиз, Иегова солы юрттоз шуыса (1 Экс. 25:24, 26, 28, 33, 34). Та кышкасьтэм кышномурт кадь ик, ми но шып ум улэ, куке адӟомы, кызьы кин ке но кышкыт сюрес вылэ султэ (Пс. 140:5). Милемлы соин гажаса вераськоно, но со дыре ик кышкасьтэм луоно. Сое лякытэн алыса, ми возьматомы, солэн зэмос эшъёсыз луиськомы шуыса (Мад. 27:17).

9, 10. Мар сярысь тӧроослы тодазы возёно, куке соос вын-агайёсты но сузэр-апайёсты тупато?

⁹ Тӧроослы тужгес но кулэ кышкасьтэм луыны,  куке соос верасько вын-агаен яке сузэр-апаен, кудӥз «кыӵе ке но сьӧлык» лэсьтӥз (Гал. 6:1). Тӧроос зӥбыт-востэмен валало, соос но тырбыдэстэмесь шуыса, озьы ик соослы но куке но визь-кенеш кулэ луоз шуыса. Но со тӧроослы люкетыны кулэ ӧвӧл тупатыны соосты, кинъёслы юрттэт кулэ (2 Тим. 4:2; Тит. 1:9). Куке тӧроос сыӵе вын-агайёсын но сузэр-апайёсын верасько, соос тыршо соослы кузьмам вераськыны быгатонлыкез шонер уже кутыны, соосты чидаса дышетон понна. Вын-агайёсты но сузэр-апайёсты яратон тӧроослэсь мылкыдзэс ӝутэ соослы юрттыны (Мад. 13:25). Но соос понна валтӥсез — Иеговаез данъян, солэн эсэпъёсызъя улыса но кенешез кышкытлыкъёслэсь утьыса (Ап. уж. 20:28).

¹⁰ Озьыен, ми эскеримы, ку вераськонлэн дырыз. Но луо учыръёс, куке умойгес луысал шып улыны. Соин сэрен кыӵе шуг-секытъёс кылдыны быгато?

11. Кыӵе ӵошатон сярысь вераз Иаков но кызьы со сое герӟаз асьмелэн вераськонэнымы?

¹¹ Куддыръя капчи ӧвӧл чакланы сое, мае вераськомы. Иаков со сярысь тазьы гожтӥз: «Кин кылыныз уг сьӧлыка, со дун-шектэм, быдэс мугорзэ но кортнаны со быгатэ. Тани, асьмеос валлэн ымаз, асьмелэсь мед кылзӥськоз шуыса, кортнэт понӥськомы ке, соку солэн быдэс мугорыныз кивалтӥськомы» (Иак. 3:2, 3). Валэз кортнало, вал вылын пукись, серметэз кутыса, сое нуыны но кулэ дыръяз дугдытыны мед быгатоз шуыса. Вал вылын пукись серметэз киысьтыз лэзиз ке, вал быгатэ ворттыса кошкыны, озьы ик аслыз но, со вылын пукисьлы но вӧсь карыны. Озьы ик ми но ӧм чаклалэ ке сое, мае вераськомы, со трос шуг-секытъёс вайыны быгатоз. Ойдолэ эскеромы куд-ог учыръёсты, куке, серметэз кутэм кадь, шып улыны кулэ.

12. Кыӵе учыръёсын тужгес но шып улыны кулэ?

 ¹² Кызьы тӥ асьтэды возиськоды вын-агаен яке сузэр-апаен, кудӥз тодэ сое, мае мукетъёсызлы вераны уг яра? Кылсярысь, куке тӥ пумитаськоды христиан муртэ, кудӥз улэ сыӵе шаерын, кытын кивалтӥсьёс ужмес нуыны уг лэзё, кылдэ-а тӥляд мылкыдды пыр-поч юалляськыны со сярысь, кызьы соослэн тодытон ужзы радъямын? Зэм но, малпанъёсты тӥляд умой. Тӥ вын-агайёсты яратӥськоды но соос понна сюлмаськиськоды. Озьы ик тӥляд потэ соос понна пыр-поч вӧсяськемды. Озьы ке но та сыӵе дыр, куке «серметэз кутоно» но мултэс юанъёс сётъяно ӧвӧл. Ми со христиан муртлэсь ёртыса юалляськимы ке, со возьматоз, ми туж ик зол ум яратӥське шуыса та адямиез, озьы ик вын-агайёсты но сузэр-апайёсты, кудъёсыз оско, со нокинлы ужан-тыршонзы сярысь уз вера шуыса. Зэм но, ми пӧлысь нокинлэн но шуг-секытъёс ватсамез уг поты вын-агайёслы но сузэр-апайёслы со шаеръёсысь, кытын ужмес нуыны уг лэзё. Ми асьмеос сыӵе шаеръёсын ужаськомы-тыршиськомы ке, соку пыр-поч ум вералэ со сярысь, кызьы радъямын тодытон ужмы, кенешмылэн пумиськонъёсыз но мукетыз.

13. Мадёнъёсты 11:13 лыдэ басьтыса, мар карыны кулэ тӧроослы но малы?

¹³ Тӧроослы тужгес но уже кутоно возетэз, кудӥз гожтэмын Мадёнъёсын 11:13 (лыдӟе). Соос тодэмзэс уг верало соослы, кинъёслы сое тодыны кулэ ӧвӧл. Со тужгес но секыт луыны быгатэ, куке тӧро кышнояськемын. Матысь кусыпъёс возён понна, кузпалъёс ог-огенызы ӵем верасько но сюлмысь малпанъёссы, шӧдонъёссы но сюлмаськонъёссы сярысь верало. Но со дыре ик тӧроос валало, соос кышнооссылы вераны кулэ ӧвӧл шуыса сое, мае вын-агайёс но сузэр-апайёс соослы оскыса веразы. Тӧроос озьы ӧз лэсьтэ ке, соослы оскемысь дугдозы но соос ӟеч нимзэс сапталозы. Вын-агайёс, кудъёсызлы кенешын дано ужъёс оскемын, «кык пумо вераськисесь» луыны кулэ ӧвӧл (1 Тим. 3:8). Со возьматэ, тӧроослы пӧяськыны но кыл нуллыса ветлыны уг яра шуыса. Яратӥсь карт кышноезлы уз вера сое, мае солы тодыны кулэ ӧвӧл.

14. Кызьы тӧроослэн кышнооссы юрттыны быгато картъёссылэсь ӟеч нимзэс утьыны?

¹⁴ Кышно картэзлэсь ӟеч нимзэ утьыны юрттоз, куке ёртыса уз юалляськы со сярысь, мае картэз нокинлы вераны кулэ ӧвӧл. Сыӵе учырын кышно, картэзлы юрттэм сяна, озьы ик гажамзэ возьматоз соослы, кинъёс картэзлы сюлэмзэс усьтӥзы. Нош тужгес но кулэез, со Иеговаез шумпоттоз, малы ке шуоно озьы со кенешысь тупаса но огкылысь улонэз утёз (Рим. 14:19).

15. Кызьы Иегова учкиз Елифаз, Вилдад но Софар шоры но малы?

¹⁵ Иов книга милемыз дышетыны быгатэ солы, ку но кызьы вераськоно. Куке Иов трос шуг-секытъёсын пумиськиз, ньыль адямиос лыктӥзы сое буйгатыны но визь-кенешен юрттыны. Кема дыр ӵоже соос шып улӥзы. Кылъёс, кудъёссэ берлогес веразы соос пӧлысь куинез — Елифаз, Вилдад но Софар, возьматӥзы: вань со дыр ӵоже соос ӧз малпаське, кызьы Иовлы юрттыны, нош со сярысь, кызьы солэсь янгыш луэмзэ возьматыны. Соослэн кылъёсазы шонерез но вал ке но, тросэз, мар соос веразы Иов но Иегова сярысь, лек пӧяськон вал. Соос Иовез янгыше уськытӥзы, со урод адями шуыса (Иов 32:1—3). Кызьы та учыр шоры учкиз Иегова? Солэн та куинь пиосмуртъёслы вожез потӥз. Инмар шуиз, соос шонер ӧз вераське шуыса, но Иовез соос понна вӧсяськыны куриз (Иов 42:7—9).

16. Кыӵе йылпумъянъёс лэсьтыны луэ Елифазэн, Вилдадэн но Софарен луэм учырысь?

 ¹⁶ Кыӵе йылпумъянъёс лэсьтыны луэ эскерем учырысь? Нырысетӥез, вын-агайёсмес судъяны кулэ ӧвӧл (Матф. 7:1—5). Мае ке верамлэсь азьло, соосты сак кылзоно. Соку гинэ ми валаны быгатомы, мар пыр соослы потоно луиз (1 Пётр 3:8). Кыкетӥез, вын-агайёсынымы но сузэр-апайёсынымы лякытэн вераськоно, но милям кылъёсмы зэм луыны кулэ (Еф. 4:25). Но куинетӥез, Иегова саклыксэ висъя солы, мае ми ог-огмылы вераськомы.

17. Малы дышетэ милемыз Елиуйлэн учырез?

¹⁷ Ньылетӥез адями, кудӥз Иов доры лыктӥз, Елиуй вал, Авраамлэн ӵыжы-выжыез. Со сак кылзӥз Иовез, озьы ик Елифазэз, Вилдадэз но Софарез. Малы ми сыӵе йылпумъян лэсьтыны быгатӥськомы? Малы ке шуоно берлогес со лякытэн, но со дыре ик шонерак тупатыны быгатӥз Иовлэсь малпаськон амалзэ (Иов 33:1, 6, 17). Елиуйлэн нырысь ик Иеговаез данъямез потэ вал, нош ассэ яке кинэ ке мукетсэ уг (Иов 32:21, 22; 37:23, 24). Елиуйлэн учырез милемыз дышетэ, вераськонлэн но шып улонлэн аслаз дырыз вань шуыса (Иак. 1:19). Озьы ик солэн учырез возьматэ: куке ми кинэ ке тупатӥськомы, ми понна валтӥсез — Иеговаез данъян, нош асьмемыз ӧвӧл.

18. Кызьы ми возьматыны быгатӥськомы, милемлы кузьмам вераськыны быгатонлыкез дунъяськомы шуыса?

¹⁸ Ми возьматӥськомы, милемлы кузьмам вераськыны быгатонлыкез дунъяськомы шуыса, куке уже кутӥськомы Библиысь визь-кенешез со сярысь, ку но кызьы вераськоно. Визьлыко Соломон эксэй святой духлэн валтэмез улсын гожтӥз: «Азвесьлэсь лэсьтэм пыр адӟиськись сосудъёсын возиськись зарни улмоос — со ӟечен верам ӟеч кыл» (Мад. 25:11). Ми сак кылзӥськомы ке сое, мае мукетъёсыз верало, но мае ке верамлэсь азьло малпаськиськомы ке, милям кылъёсмы зарни улмоос кадь ик дуноесь но чебересь луозы. Соку, трос-а ми вераськомы яке ӧжыт-а, милям кылъёсмы мукетъёссэ юнматозы, но Иегова милемын данъяськоз (Мад. 23:15; Еф. 4:29). Та тужгес но умой амал Инмарлы тау каронмес возьматыны кузьымез понна!