ЭСКЕРОН ПОННА СТАТЬЯ 44
Вуоноезлы осконды юн мед луоз
«Кузё-Инмарлы оскиськы» (ПС. 26:14).
144-ТӤ КЫРӞАН Учкы осконэн!
ТА СТАТЬЯЫН a
1. Кыӵе оскон кузьмаз милемлы Иегова?
ИЕГОВА милемлы пырак улыны оскон кузьмаз. Кин ке но оске пырак дауръёс ӵоже инмын улыны (1 Кор. 15:50, 53). Нош тросэз адямиос оско пырак дауръёс ӵоже улыны музъем вылын, кытын соос уз висе ни но шудоесь луозы (Усьт. 21:3, 4). Кыӵе гинэ осконмы милям медам луы — инмын яке музъем вылын улыны,— со милемлы туж дуно потэ.
2. Кыӵе мугъёсмы милям вань вуоноезлы оскыны но малы озьы вераны луоз?
2 Куке Библиын вуоноезлы оскон сярысь гожтэмын, отын вераське мае ке умойзэ возьман сярысь. Ми оскиськомы, вуоноезлы осконмы быдэсмоз шуыса, малы ке шуоно сыӵе осконэз ачиз Иегова сётэ (Рим. 15:13). Нош со сётэм кылъёссэ котьку но быдэстэ (Лыд. 23:19). Ми тодӥськомы: Иеговалэн потэ но, со быгатэ но вань сётэм кылъёссэ быдэстыны. Соин ик вуоноезлы оскыны милям мугъёсмы вань.
3. Мае ми эскеромы та статьяын? (Псалтирь 26:14).
3 Инмысь Атаймы милемыз туж яратэ. Солэн потэ, ми солы мед оскомы шуыса. (Лыдӟе Псалтирез 26:14.) Ми Иеговалы оскимы ке, соку быгатомы шуг-секытъёс пыр потыны но азьпала шумпотыса учкыны. Соин ик ойдолэ эскеромы, кызьы оскон милемыз утьыны быгатэ. Нырысь тодомы, малы сое якорен но корт изьыен ӵошатыны луэ. Собере учкомы, мар кароно, сое юнматон понна.
ВУОНОЕЗЛЫ ОСКОНМЫ ЯКОРЬ ВЫЛЛЕМ
4. Малы вуоноезлы осконэз якорен ӵошатыны луэ? (Еврейёслы 6:19).
4 Еврейёслы гожтэтаз апостол Павел вуоноезлы осконэз якорен ӵошатӥз. (Лыдӟе Еврейёслы 6:19.) Павел кораблен зарезь вылтӥ ӵем ветлылӥз. Соин ик со тодӥз, макем кулэ якорь, кораблез тӧлын палэнэ медаз нуы шуыса. Огпол зарезь вылын кужмо сильтӧл дыръя со адӟиз, кызьы морякъёс, «ву пушкысь изъёс борды шуккиськонлэсь утиськыса, корабль берысь ньыльзэ якорез куштӥзы» (Ап. уж. 27:29, 39—41). Бадӟым шуг-секытъёс дыръя милемлы но вуоноезлы оскон, якорь кадь, Иеговалэсь палэнскытэк улыны юрттэ. Юн осконмы луиз ке, ми быгатомы бадӟым шуг-секытъёс пыр потыны, малы ке шуоно ми оскиськомы, азьланяз ваньмыз умой луоз шуыса. Иисус азьло ик вераз, милемыз уйылозы-уллялозы шуыса (Иоанн 15:20). Соин ик малпаськоно вуоноезлы осконмы сярысь, кудзэ кузьмаз милемлы Иегова. Та юрттоз милемлы христиан сюрес вылтӥ мыныны.
5. Кызьы вуоноезлы оскон Иисуслы юрттӥз кулытозяз ик Иеговалы оскымон кыльыны?
5 Иисус тодӥз, сое курадӟытыса виёзы шуыса. Кызьы вуоноезлы оскон солы юрттӥз Иеговалы оскымон кыльыны? Асьме вакытысь 33-тӥ арын Витьтонэтӥ нуналэ апостол Пётр вераз Мессия сярысь азьпалзэ ивортонэз, кудӥз Псалтирьын гожтэмын вал. Отын чебер кылъёсын вераське, кызьы Иисус каньыл сюлмын но юн осконэн улӥз: «Лулмугоры но оскиськыса каньылэн улоз. Тон мынэсьтым лулме адэ уд кельты уго, дун-чылкыт улӥседлы сисьмонэз уд адӟыты... Аслад син азяд Тон монэ шумпотонэн тыр карод» (Ап. уж. 2:25—28; Пс. 15:8—11). Иисус тодӥз, солы кулоно луоз шуыса. Озьы ке но со юн оскиз: Инмар сое улӟытоз но со выльысь инмысь Атаеныз ӵош шумпотыса улоз (Евр. 12:2, 3).
6. Мар вераз вуоноезлы оскон сярысь одӥг агаймы?
6 Вуоноезлы оскон трос вын-агайёсмылы но сузэр-апайёсмылы шуг-секытъёсты чиданы юрттӥз. Тани Англиысь Ленард Чинн оскымон агаймылэн учырез. Нырысетӥ дунневыл ож дыръя сое пытсэтэ пуктӥзы, малы ке шуоно со армие ӧз мыны. Кык толэзь ӵоже со камераын огназ пукиз. Собере сое секыт ужатыса возизы. Берлогес со шуиз: «Ваньмыз, мар пыр мон потӥ, мыным валаны юрттӥз: чидан понна, вуоноезлы оскон туж кулэ. Ми быгатӥськомы Иисуслэсь, апостолъёслэсь но пророкъёслэсь адӟем карыны, озьы ик Библиысь кылсётонъёс вылын малпаськыны. Ваньмыз та юрттэ милемлы вуоноезлы оскыны но ваньзэ чиданы». Ленард агай понна вуоноезлы оскон якорь кадь вал. Сыӵе оскон милемлы но юрттыны быгатэ.
7. Кызьы шуг-секытъёс вуоноезлы осконмес юнмато? (Иаков 1:12; Римъёслы 5:3—5).
7 Шуг-секытъёсты чидаса, озьы ик Иеговалэсь юрттэмзэ но бакель каремзэ адӟыса, вуоноезлы осконмы эшшо но юнгес луэ. (Лыдӟе Иаковлэсь 1:12; Римъёслы 5:3—5.) Ӵошатоно ке со дырен, куке ми ӟеч иворез нырысьсэ кылӥмы, али вуоноезлы осконмы эшшо но юнгес. Шайтанлэн потэ, секыт дыръя осконмы мед лябӟоз шуыса. Но мар гинэ медам луы, Иеговалэн юрттэменыз ми ваньзэ чидаломы.
ВУОНОЕЗЛЫ ОСКОНМЫ КОРТ ИЗЬЫ ВЫЛЛЕМ
8. Малы вуоноезлы осконмес корт изьыен ӵошатыны луэ? (1 Фессалоникаослы 5:8).
8 Со сяна, Библия вуоноезлы осконмес корт изьыен ӵошатэ. (Лыдӟе 1 Фессалоникаослы 5:8.) Корт изьы ожгарчилэсь йырзэ тушмонъёсызлэн вӧсь каремзылэсь утьылӥз. Духовной ожмаськонын но милемлы визьмес Шайтанлэсь утёно. Малпаськон амалмес суран-пожан понна, солэн трос амалъёсыз вань. Кызьы корт изьы ожгарчилэсь йырзэ утьылӥз, озьы ик вуоноезлы оскон милесьтым малпаськон амалмес уте. Соку милемлы капчигес луоз Иеговалы оскымон кыльыны.
9. Кызьы уло адямиос, кудъёсызлэн вуоноезлы осконзы ӧвӧл?
9 Вуоноезлы оскон юрттоз милемлы визьмо ужпумъёс кутыны. Осконмы лябӟиз ке, озьы ик ас мылпотэммыя улыны кутскимы ке, милям пырак улыны осконмы лябӟоз. Тодамы ваёмы, мар луиз Коринф карысь куд-ог христианъёсын. Соос улӟытонлы оскемысь дугдӥзы (1 Кор. 15:12). Павеллэн верамезъя, соослэн, кинъёслэн вуоноезлы осконзы ӧвӧл, туннэ нуналэн гинэ уло (1 Кор. 15:32). Али но тросэз адямиос, кудъёсыз Инмарлэн кылсётонъёсызлы уг оско, ас мылпотонъёссэс быдэсъяса но шулдыръяськыса гинэ уло. Нош милям азьпал улонлы осконмы вань. Сыӵе оскон, корт изьы выллем, милесьтым малпаськон амалмес уте, ми ас мылпотэммыя гинэ медам улэ шуыса. Озьы ми быгатӥськомы Иеговаен кусыпъёсмес утьыны (1 Кор. 15:33, 34).
10. Кызьы вуоноезлы оскон юрттоз милемлы шонертэм малпанъёсты палэнтыны?
10 Вуоноезлы оскон юрттоз милемлы визьмес утьыны таӵе малпанлэсь: ми Иеговалы ярамон луыны ноку ум быгатэ. Кылсярысь, кин ке но тазьы малпаське, дыр: «Пырак улыны мон ярамон ӧвӧл. Мон ноку уг быгаты Иеговалэсь кылзӥськыса улыны». Тодады вае, кызьы таӵе ик малпанъёсты Елифаз Иовлы вераз. Со Иовлэсь юаз: «Мар со адями — кызьы со дун-чылкыт луыны быгатоз?» Озьы ик Инмар сярысь Елифаз шуиз: «Со Аслаз святойёсызлы но уг оскы, Солэн син азяз инъёс но дун-шектэмесь ӧвӧл» (Иов 15:14, 15). Та пӧяськон вал! Эн вунэтэ, сыӵе шонертэм малпанъёс Шайтан бордысь пото шуыса. Со тодэ: тӥ озьы малпаськиды ке, вуоноезлы осконды лябӟоз. Соин ик сыӵе пӧяськонэз палэнтэ но тырше Иеговалэн кылсётонъёсыз сярысь тросгес малпаськыны. Юн оске: инмысь Атаймылэн потэ, тӥ пырак мед улоды шуыса. Та ужпумез быдэстыны со одно ик тӥледлы юрттоз (1 Тим. 2:3, 4).
ВУОНОЕЗЛЫ ОСКОНДЫ ЮН МЕД ЛУОЗ
11. Малы милемлы чидаса возьмано, ку Инмар аслэсьтыз кылсётонъёссэ быдэстоз?
11 Вуоноезлы оскыны котьку ик капчи ӧвӧл. Куддыръя Инмарлэн кылсётонъёсызлэсь быдэсмемзэс возьманы чидан уг тырмы. Но Иегова пумтэм вапумъёс ӵоже улэ. Соин ик со понна дыр мукет сямен мынэ (2 Пётр 3:8, 9). Аслэсьтыз малпанъёссэ со одно ик быдэстоз самой умой амалэн но самой тупась дыре, соку, куке ми ӧм но возьмалэ, вылды. Мар юрттоз милемлы вуоноезлы осконмес юн возьыны но чидаса возьманы, ку Инмар аслэсьтыз кылсётонъёссэ быдэстоз? (Иак. 5:7, 8).
12. Кызьы герӟаськемын вуоноезлы оскон но Инмарен матысь кусыпъёс? (Еврейёслы 11:1, 6).
12 Вуоноезлы осконмы юн мед луоз шуыса, Иеговаен матысь кусыпъёс возёно. Малы ке шуоно со гинэ вуоноезлы осконмес быдэстыны быгатэ. Сыӵе осконмы мед луоз шуыса, милемлы осконо, Инмар зэм но вань но со «Ассэ утчасьёслы.... мед-кузьым сётэ» шуыса. (Лыдӟе Еврейёслы 11:1, 6.) Ми оскимы ке, Иегова зэм но вань шуыса, соку эшшо но золгес оскомы, со аслэсьтыз кылсётонъёссэ одно ик быдэстоз шуыса. Ойдолэ эскеромы куд-ог пайдаё визь-кенешъёсты, кудъёсыз Иеговаен кусыпъёсмес юнматозы. Нош Иеговаен матысь эшъяськон юрттоз милемлы вуоноезлы эшшо но золгес оскыны.
Вӧсяськон но малпаськон юртто милемлы вуоноезлы осконмес юн возьыны (Учке 13—15-тӥ абзацъёсты.) b
13. Мар кароно, Инмарен эшъяськон понна?
13 Иеговалы вӧсяське но солэсь Кылзэ лыдӟе. Иеговаез адӟыны уг луы ке но, ми быгатӥськомы соин эшъяськыны. Вӧсяськон пыр ми соин вераськиськомы но быдэсак оскиськомы, со милемыз кылзэ шуыса (Иер. 29:11, 12). Нош кызьы ми Инмарез кылзӥськомы? Солэсь Кылзэ лыдӟыса но со вылын малпаськыса. Куке ми тодӥськомы, кызьы Иегова вашкала дыръя оскымон ужась-тыршисьёсыз сярысь сюлмаськиз, вуоноезлы осконмы эшшо но юнма. Инмарлэн Кылыз «гожтэмын асьмемыз визьман-дышетон понна. Чидан пыр, Священной Гожтэм пыр мылкыддэс ӝутыса, асьмеос оскиськыса мед уломы шуыса» (Рим. 15:4).
14. Малы пайдаё луоз малпаськыны со сярысь, мар Иегова кариз мукетъёсыз понна?
14 Малпаське со сярысь, кызьы Иегова аслэсьтыз кылсётонъёссэ быдэстэ. Тодамы ваёмы, мар Иегова кариз Авраам но Сарра понна. Пинал ваён понна, соос туж пересесь вал ини. Озьы ке но Иегова кылзэ сётӥз, соослэн пиналзы вордскоз шуыса (Ул.-выл. 18:10). Оскиз-а Авраам та кылсётонлы? Со оскиз, трос калыкъёслы атай луоз шуыса (Рим. 4:18). Адями синмын учкыса, та кылсётон быдэсмонтэм кадь потэ вал. Но Авраам оскиз, Инмар сётэм кылзэ быдэстоз шуыса. Кӧня ке дыр ортчыса, со зэм но быдэсмиз (Рим. 4:19—21). Таӵе учыръёс осконмес юнмато, кыӵе гинэ югдур медам кылды, Иегова сётэм кылзэ котьку быдэстэ шуыса.
15. Малы малпаськоно со сярысь, мар Инмар лэсьтӥз ми понна?
15 Тодады вае, мар Иегова кариз тӥ понна. Малпаське, кыӵе пайда тӥледлы вайиз Иеговалэн кылсётонъёсызлэн быдэсмемзы. Кылсярысь, Иисус вераз, солэн Атаез милемлы улон понна ваньзэ кулэзэ сётоз шуыса (Матф. 6:32, 33). Озьы ик, Иисуслэн верамезъя, ми Иеговалэсь святой духсэ куримы ке, со милемлы сое одно ик сётоз (Лука 11:13). Ми адӟиськомы, Иегова та кылсётонъёссэ быдэстэ шуыса. Со сяна, тӥ адӟиськоды, дыр, мар эшшо Иегова тӥ понна каре. Кылсярысь, со милемлы духовной сиён сётэ, милемыз простить каре но буйгатэ (Матф. 6:14; 24:45; 2 Кор. 1:3). Ми малпаськимы ке, кызьы Иегова ми сярысь азьло сюлмаськиз, ми эшшо но золгес оскомы, со милемыз вуонояз но уз кельты шуыса.
«ОСКИСЬКОНДЫ ВАНЬЛЫ ШУМПОТЭ»
16. Малы вуоноезлы оскон — со дуно кузьым?
16 Пырак улыны оскон — со Инмарлэсь дуно кузьым. Ми туж возьмаськомы азьпал улонэз но оскиськомы, со одно ик вуоз шуыса. Якорь выллем, вуоноезлы оскон юрттэ милемлы Иеговалэсь палэнскытэк улыны. Нош соку ми быгатомы шуг-секытъёс пыр потыны, уйылон-уллянъёсты чиданы, со понна кулоно ке но луиз. Корт изьы выллем, вуоноезлы оскон визьмес уте. Озьы ик со юрттэ милемлы уродзэ-лексэ палэнтыны но ӟеч ужъёс лэсьтыны. Сыӵе оскон Инмарен кусыпъёсмес юнматэ но возьматэ, макем зол со милемыз яратэ. Азьланяз но юн осконэн улӥмы ке, со милемлы бадӟым пайда ваёз.
17. Малы вуоноезлы оскон шумпотон вае?
17 Римысь христианъёслы апостол Павел гожтӥз: «Оскиськонды ваньлы шумпотэ» (Рим. 12:12). Павеллы вуоноезлы оскон шумпотон вае вал, малы ке шуоно со оскиз, Инмарлы оскымон кылиз ке, пырак дауръёс ӵоже инмын улоз шуыса. Вуоноезлы оскон милемлы но шумпотон вае, малы ке шуоно ми оскиськомы, Иегова сётэм кылзэ котьку но быдэстэ шуыса. Псаломъёсты гожъясь туж умой шуиз: «Шудо со мурт, кинлэн... оскиськонэз Инмар Кузё-Инмар вылын улэ... пумтэм вапумъёсы оскиськымон Со» (Пс. 145:5, 6).
139-ТӤ КЫРӞАН Адӟы астэ выль дуннеын
a Иегова милемлы вуоноезлы оскон кузьмаз. Со юрттэ милемлы шумпотыса улыны но оскыны, номыр шоры учкытэк, ваньмыз умой луоз шуыса. Вуоноезлы оскон милемлы кужым сётэ туж секыт дыръя но Иеговалы оскымон кыльыны. Солы луыса ми быгатӥськомы шонертэм малпанъёсты палэнтыны. Ваньмыз та юрттэ милемлы юн осконэн улыны.
b СУРЕДЫН: Корт изьы ожгарчилэсь йырзэ уте. Якорь корабльлы одӥг интыяз сылыны юрттэ. Ӵапак озьы ик вуоноезлы оскон милесьтым визьмес уте но шуг-секытъёс дыръя Иеговалэсь палэнскытэк улыны юрттэ. Сузэр Иеговалы вӧсяське но быдэсак оске, со сое кылзэ шуыса. Агай малпаське, кызьы Инмар Авраамлы сётэм кылъёссэ быдэстӥз. Мукетыз агай тодаз вае, кызьы Иегова сое бакель карылӥз.
