1, 2. Малы ми котькуд аре Ӝытанэ ветлӥськомы?

 ОГ 2 000 ар талэсь азьло Иисус ми понна кулӥз, ми пырак улыны мед быгатомы шуыса. Кулон азяз ӝытэ со дышетскисьёссэ косӥз, нянез но винаез басьтыса, огшоры ужрадэз ортчытыны. Озьы соос тодазы вайыны кулэ вал, кызьы Иисус адямиослы яратонзэ возьматӥз (1 Кор. 11:23—26).

² Ми Иисуслэсь курон-косонзэ быдэсъяськомы, малы ке шуоно сое туж яратӥськомы (Иоанн 14:15). Котькуд ар Ӝытанэз пусъён вакытэ ми Иисуслы тау каронмес возьматӥськомы. Со понна ми вӧсяськиськомы но малпаськиськомы, кыӵе пайда вае адямиослы солэн кулонэз. Озьы ик ми шумпотӥськомы эшшо но тросгес тодытыны, адямиосты та пумиськонэ ӧтьыса. Со сяна, ми асьмеос но туж тыршиськомы Ӝытанэ лыктыны.

3. Мае ми эскеромы та статьяын?

³ Иеговалэн ужась-тыршисьёсыз лэсьто ваньзэ, мае быгато, Иисус Христослэсь кулонзэ тодэ ваён понна. Та статьяын ми эскеромы, кызьы соос: 1) Ӝытанэз Иисуслэн верамезъя пусъё, 2) Ӝытанэ мукет адямиосты ӧтё  но, 3) шуг-секытъёссы шоры учкытэк, асьсэос но Ӝытанэ лыктыны тыршо.

4. Кыӵе зэмлыкъёс арлы быдэ Ӝытанын эскерисько но малы ми соос понна тау карыны кулэ? (Лука 22:19, 20).

⁴ Арлы быдэ Ӝытанын ми кылзӥськомы Библия вылэ пыкиськыса дасям речез, кудаз кулэ луись юанъёслы валэктонъёс сётӥсько. Отын валэктӥське, малы адямиос понна дун тыроно вал но кызьы одӥг адями мукетъёсты сьӧлыкъёссылэсь мозмытыны быгатэ. Милемлы тодамы вайыто, кин Ӝытанын нянь сиыны но вина юыны кулэ, озьы ик мае возьмато та символъёс. (Лыдӟе Лукалэсь 22:19, 20.) Со сяна, ми малпаськиськомы, кыӵе улон возьма соосты, кинъёс пырак дауръёс ӵоже музъем вылын улозы (Ис. 35:5, 6; 65:17, 21—23). Милемлы та зэмлыкъёс понна тау кароно. Трос миллиард адямиос уг валало та зэмлыкъёсты но, сое но, макем дуно луэ Иисуслэн курбонэз. Озьы ик соос Ӝытанэз Иисуслэн косэмезъя уг пусъё. Малы?

5. Тросэз апостолъёс кулэм бере кызьы адямиос Иисуслэсь кулонзэ пусйыны кутскизы?

⁵ Тросэз апостолъёс кулэм бере кенешын зэмос луисьтэм христианъёс кылдӥзы (Матф. 13:24—27, 37—39). Соос «ӧрекчи дышетонъёссы пыр асьсэ бӧрсьы дышетскисьёсты» нуыны кутскизы (Ап. уж. 20:29, 30). Кылсярысь, Библиын вераське, «Христос но, тросэзлэсь сьӧлыкъёссэс быдтон понна Ассэ одӥг пол курбонлы сётӥз» шуыса (Евр. 9:27, 28). Нош зэмос луисьтэм христианъёс дышетӥзы, та курбонэз выльысь но выльысь ваёно шуыса. Туннэ но тросэз адямиос та шонертэм дышетонлы оско. Куд-ог религиосын адямиос ялан — куд-огъёсаз нуналлы быдэ — черке ветло, литургие b пыриськон понна. Мукет религиосын адямиос Христослэсь кулонзэ тодазы туж ик уг вайыло. Соос рос-прос уг валало, малы та курбонэз ваёно вал. Куд-огъёсыз малпало: «Зэм ик-а Христослэн курбонэз монэ сьӧлыкъёсылэсь мозмытыны быгатэ?» Малы адямиослэн таӵе юанзы кылдэ? Малы ке шуоно соосты оскытӥзы, Иисуслэн кулонэз сьӧлыкъёслэсь мозмытыны уг быгаты шуыса. Кызьы Иисуслэн зэмос дышетскисьёсыз адямиослы та юанэз валаны юртто?

6. Мае валазы Библиез эскерисьёс 1872-тӥ арын?

⁶ 1870-тӥ арын Чарлз Тейз Расселл но Библиез эскерисьёс кутскизы Священной Гожтэмез пыр-поч эскерыны. Соослэн тодэмзы потэ вал, мае возьматэ Иисуслэн курбонэз но кызьы солэсь кулонзэ тодэ ваёно. 1872-тӥ арын соос валазы, Иисус вань адямиос понна кулӥз шуыса. Басьтэм тодон-валанзэс соос ӧз ватэ. Книгаос, газетъёс но журналъёс пыр соос мукет адямиосты но таин тодматыны кутскизы. Та бере ӝоген, нырысетӥ даурысь христианъёс сямен, соос но Ӝытанэз араз одӥг пол пусйылыны кутскизы.

7. Кыӵе пайда милемлы вае со, мае тодӥзы Библиез эскерисьёс?

⁷ Со, мае трос аръёс талэсь азьло Библиез эскерисьёс тодӥзы, милемлы но пайда вайыны быгатэ. Кыӵе? Иегова юрттӥз милемлы валаны Иисуслэн курбонэз сярысь зэмлыкез но сое, мае со сётыны быгатэ (1 Иоанн 2:1, 2). Озьы ик ми тодӥмы,  куд-ог адямиос кулытэк инмын улозы, нош трос миллион мукет адямиос пырак дауръёс ӵоже рай музъем вылын улозы шуыса. Милям Иеговаен кусыпъёсмы юнмало, куке малпаськиськомы, макем зол со милемыз яратэ но кыӵе пайда милемлы вае Иисуслэн кулонэз (1 Пётр 3:18; 1 Иоанн 4:9). Соин ик, Библиез эскерисьёс сямен, ми но мукетъёсты Ӝытанэ ӧтиськомы, кудӥз ортчытӥське ӵапак озьы ик, кызьы Христос косӥз.

8. Мар каре Иеговалэн калыкез, адямиосты Тодэ ваён ӝытанэ ӧтён понна? (Учке суредэз.)

⁸ Трос дасо аръёс ӵоже ини Иеговалэн Адӟись-Ивортӥсьёсыз Ӝытанэ мукет адямиосты ӧтё. 1881-тӥ арын Огазеяськем Штатъёсысь Аллеге́йни карын (Пенсильвания штат) агайёс но сузэръёс одӥг коркан люкаськизы, та пумиськонэз ортчытон понна. Берлогес котькуд кенеш Ӝытанэз нимаз пусйылӥз. 1940-тӥ арын южтолэзе ялэмын вал: ивортӥсьёс Ӝытанэ ӧтьыны быгато соос палан улӥсь вань адямиосты, кудъёсызлэн зэмлыкез тодэмзы потэ. 1960-тӥ арын кенешъёсы Вефильысь нырысьсэ ыстэмын вал печатлам ӧтёнъёс. Со дырысен трос миллиард ӧтёнъёс вӧлмытэмын ини. Малы ми сомында дырмес но кужыммес сётӥськомы, адямиосты Ӝытанэ ӧтён понна?

9, 10. Кинэ ми тыршиськомы Ӝытанэ ӧтьыны но малы? (Иоанн 3:16).

⁹ Милям потэ: Ӝытанэ нырысетӥзэ лыктэмъёс мед тодозы, мар соос понна лэсьтӥзы Иегова но Иисус. (Лыдӟе Иоаннлэсь 3:16.) Ми оскиськомы: со, мае соос  Ӝытанын кылозы но адӟозы, соослэсь мылкыдзэс ӝутоз эшшо но тросгес тодон-валан басьтыны но Иеговалэн ужась-тыршисьёсыз луыны. Но ми ум ӧтиське соосты гинэ, кинъёс зэмлыкез уг тодо.

¹⁰ Озьы ик ми ӧтиськомы со агайёсты но сузэръёсты, кудъёсыз куке но ӟырдыт мылкыдын тодытӥзы. Милям соосты оскытэммы потэ, Инмар соосты азьло сямен ик яратэ шуыса. Тросэз, Ӝытанэ лыктыса, туж шумпото. Ӝытан соослы тодазы вайытэ, кызьы соос куке но шумпотыса Иеговалы ужазы-тыршизы. Тани Моника c сузэрлэн учырез. COVID-19 пандемия дыръя со нош ик кенешен ӵош тодытыны кутскиз. 2021-тӥ арын Ӝытанэ ветлэмез бере со вераз: «Та Ӝытанэз мон ноку уг вунэты. Берло 20 аръёс куспын мон нырысетӥзэ адямиослы тодытӥ но соосты Ӝытанэ ӧтьылӥ. Мон вань сюлмысьтым ужай-тырши, малы ке шуоно Иеговалы но Иисуслы тау кареме потэ вал» (Пс. 102:1—4). Адямиос ӧтеммылы вазисько-а, уг-а, ми туж тыршиськомы соосты Ӝытанэ ӧтьыны, малы ке шуоно тодӥськомы, Иегова тыршеммес дунъя шуыса.

11. Кызьы Иегова бакель каре, куке ми адямиосты Ӝытанэ ӧтьыны тыршиськомы? (Аггей 2:7).

¹¹ Адямиосты Ӝытанэ ӧтьыны тыршеммес Иегова туж бакель каре. Кылем аръёсын ӵошатыса, 2021-тӥ арын пандемия вал ке но, Ӝытанэ самой трос адямиос лыктӥзы — 21 367 603. Со кык но ӝыны поллы тросгес быдэс дунне вылысь Иеговалэн Адӟись-Ивортӥсьёсызлэсь! Но лыдпусъёс сярысь, адямиос Иеговалы дуногес пото (Лука 15:7; 1 Тим. 2:3, 4). Соин ик ми оскиськомы, мукетъёсты Ӝытанэ ӧтьыкумы, Иегова милемлы ӟеч сюлэмо адямиосты шедьтыны юрттэ шуыса. (Лыдӟе Аггейлэсь 2:7.)

12. Малы Ӝытанэ лыктыны секыт луэ? (Учке суредэз.)

¹² Иисус азьло ик вераз, берпум нуналъёсы ми шуг-секытъёсын пумиськыломы шуыса. Кылсярысь, милемлы семьямы пумитъяськыны быгатэ, уйылон-уллянъёс, ожъёс, висёнъёс вӧлмыны быгато яке мукетыз (Матф. 10:36; Марк 13:9; Лука 21:10, 11). Таин сэрен Ӝытанэ лыктыны секыт луэ. Мар каро агайёсмы но сузэръёсмы, та шуг-секытъёс пыр потон понна, но кызьы соослы Иегова юрттэ?

13. Кызьы Иегова Артёмез бакель кариз, пытсэтын Ӝытанэз ортчытыны дӥсьтэмез понна?

¹³ Пытсэтэ сюрон. Вын-агайёс, кудъёсыз осконзы понна пытсэтын пуко, туж тыршо Иисуслэсь кулонзэ пусйыны. Тани Артём агайлэн учырез. 2020-тӥ арын тулыс, Ӝытанэз пусъён вакытэ, со пуке вал 17 квадратной метръем камераын. Соин ӵош эшшо ньыль пиосмуртъёс пукизы. Артём пытсэтын вал ке но, со быгатӥз Ӝытанлы символъёсты дасяны. Озьы ик со малпаз ачиз аслыз речь вераны. Но соин ӵош пукисьёс ялан тамак кыско но кырсь кылъёсын верасько вал. Мар кариз Артём? Со соосты куриз одӥг час ке но тамак кыскытэк но урод кылъёсын вераськытэк улыны. Туж паймоно кадь, но соос соглаш кариськизы. Артём соослэсь юаз, потэ-а соослэн Ӝытанлы дасям речез кылзэмзы. Соос веразы, уг поты шуыса. Но куке соос адӟизы но кылӥзы, кызьы агаймы Ӝытанэз ортчытэ, соос трос юанъёс сётъяны кутскизы.

14. Мар каремын вал, COVID-19 пандемия дыръя Ӝытанэз ортчытон понна?

 ¹⁴ COVID-19 пандемия. Пандемия кутскем бере Иеговалэн ужась-тыршисьёсыз Эксэйлык юртъёсын пумиськылыны ӧз быгатэ ини. Но та ӧз люкеты соослы Ӝытанэз ортчытыны d. Куд-ог кенешъёсын Ӝытанэз интернет пыр ортчытӥзы. Нош кызьы сое пусйизы трос миллион адямиос, кудъёсызлэн интернетсы ӧй вал? Куд-ог шаеръёсын агайёс тыршизы, Ӝытанлы дасям речез адямиос телевизор но радио пыр кылзыны мед быгатозы шуыса. Со сяна, мукетъёсызлэсь палэнын улӥсь адямиос но Ӝытанэз пусйыны мед быгатозы шуыса, филиалъёс та речез 500-лэсь но тросгес кылъёсын гожтӥзы но собере сыӵе адямиослы сётӥзы.

15. Малы дышетскыны луэ Сью кышномуртлэсь?

¹⁵ Семьялэн пумитъяськемез. Куд-огъёсызлы семьязы пумитъяське. Тани Сью кышномуртлэн учырез. 2021-тӥ арын Ӝытанлэн азьвыл нуналаз со вераз сузэрмылы,  кудӥз соин Библиез дышетэ, семьяезлэн пумитъяськеменыз сэрен, Ӝытанэ лыктыны уз быгаты шуыса. Сузэрмы лыдӟиз солы Лукалэсь 22:44 но валэктӥз, секыт дыръя, Иисус сямен, Иеговалы вӧсяськоно но солы быдэсак оскиськоно шуыса. Мукет нуналаз Сью символъёсты дасяз но jw.org сайтысь Ӝытан азьын ӵукна йыбырттонэз учкиз. Со нуналэ ик аслаз комнатаысьтыз телефонэз пыр со Ӝытанэз кылзӥз. Собере та кышномурт сузэрмылы гожтӥз: «Толон, тонэн вераськыса, мынам мылкыды ик ӝутскиз. Мон лэсьтӥ ваньзэ, мае быгатӥ, Ӝытанэз пусъён понна, нош кылемзэ Иегова лэсьтӥз. Кылъёс ик уг шедё вераны, макем мон шумпотӥсько но тау карисько!» Кызьы тӥ малпаськоды, тӥ но та выллем учыре сюриды ке, Иегова тӥледлы юрттоз-а?

16. Малы ми оскиськомы, Ӝытанэз пусйыны тыршеммес Иегова бакель кароз шуыса? (Римъёслы 8:31, 32).

¹⁶ Иегова туж дунъя Иисуслэсь кулонзэ пусйыны тыршеммес. Ми оскыны быгатӥськомы: ми тау кариськомы ке ваньмыз понна, мае Инмар милемлы лэсьтӥз, со милемыз бакель кароз. (Лыдӟе Римъёслы 8:31, 32.) Ойдолэ тыршомы та арын Ӝытанэ лыктыны но та нимысьтыз вакытэ Иегова понна эшшо но тросгес лэсьтыны.