1, 2. а) Малы ми ум паймиське, куке шуг-секытъёсын пумиськылӥськомы? б) Мае ми эскеромы та статьяын?

 МИЛЕМЫЗ шуг-секытъёс уг паймыто, малы ке шуоно Библиын вераське: «Трос куректон-кайгуос пыр Инмар Эксэйлыке асьмелы пыроно луоз» (Ап. уж. 14:22). Озьы ик ми тодӥськомы: куд-ог шуг-секытъёсмы бырозы выль дуннеын гинэ, кытын «кулон уз ни луы, бӧрдон но, викышъян но, висён но уз ни луэ» (Усьт. 21:4).

² Иегова милемыз куректон-кайгуослэсь уг утьы. Со милемлы соосты чиданы юрттэ. Учке, мар гожтӥз апостол Павел Римын улӥсь христианъёслы. Нырысь со вераз, кыӵе шуг-секытъёсын со но солэн вын-агайёсыз пумиськылӥзы. Собере Павел гожтӥз: «Ваньзэ тае асьмемыз Яратӥсьлэн кужыменыз вормиськомы» (Рим. 8:35—37). Озьыен, шуг-секытты быремлэсь азьло ик Иегова тӥледлы юрттыны быгатэ вормисе потыны. Ойдолэ эскеромы, кызьы Иегова юрттӥз Иосифлы но кызьы со юрттыны быгатэ тӥледлы.

3. Кызьы малпамтэ шорысь Иосифлэн улонэз воштӥськиз?

³ Патриарх Иаков туж яратэ вал Иосиф пизэ (Ул.-выл. 37:3, 4). Таин сэрен Иосифлэн агайёсыз солы вожъяськыны кутскизы. Куке тупась учыр кылдӥз, соос Иосифез мадиан вузчиослы вузазы. Нош вузчиос сое нуизы Египетэ,  трос сю иськем кеме. Египетын Иосифез вузчиос вузазы Потифарлы, фараон юртысь кузёйырлы. Иосифлэн улонэз туж ӝог воштӥськиз: али гинэ со атаезлэн яратоно пиез вал, нош табере Египетысь пиосмуртлэн ляльчиез луиз! (Ул.-выл. 39:1).

4. Кыӵе шуг-секытъёсын ми пумиськыны быгатӥськомы?

⁴ Библия верамъя, куректон-кайгуэн котькуд адями пумиськыны быгатэ (Екк. 9:11). Куддыръя ми пумиськылӥськомы сыӵе шуг-секытъёсын, кудъёссэ вань адямиос чидано луо (1 Кор. 10:13). Нош куддыръя ми курадӟиськомы, Христослэн дышетскисьёсыз луэменымы сэрен. Кылсярысь, осконмы понна милемыз серекъяло, милемлы пумитъясько яке уйыло-улляло (2 Тим. 3:12). Но кыӵе гинэ шуг-секытъёсын тӥ медад пумиське, Иегова юрттоз тӥледлы вормисе потыны. Кызьы Инмар юрттӥз Иосифлы?

5. Мае валаз Потифар, Иосиф шоры учкыса? (Улон-вылон 39:2—6).

⁵ Лыдӟе Улон-вылонэз 39:2—6. Потифар адӟиз, Иосиф быгатыса но тыршыса ужаз шуыса. Со валаз, «Кузё-Инмар... [Иосифлы] ужъёсаз азинлык сётэ» шуыса b. Дыр ортчыса, Потифар Иосифез аслаз ляльчиеныз кариз но юртэныз кивалтыны пуктӥз. Собере Иегова Потифарез бакель карыны кутскиз.

6. Кызьы Иосиф аслаз югдурез шоры учкиз, вылды?

⁶ Нош табере учке та югдур шоры Иосифлэн синмыныз. Мар солэн потэ вал? Потифарлы ярамон луэмез? Иосифлэн мозмытскемез но атаез доры берытскемез потэ вал, дыр. Малы ке шуоно, Потифарлэн юртаз солы вылӥ инты сётӥзы ке но, со азьло сямен ик ляльчи вал. Иегова Потифарлэсь мылкыдзэ ӧз ӝуты Иосифез мозмытыны. Со сяна, Иосифез эшшо но бадӟымгес шуг-секытъёс возьмазы.

7. Кызьы Иосифлэн югдурез эшшо но секытгес луиз? (Улон-вылон 39:14, 15).

⁷ Улон-вылонысь 39-тӥ люкетын вераське, Иосифлы Потифарлэн кышноез синмаськиз шуыса. Та кышномурт Иосифлы  кӧня ке пол ӵектӥз соин кӧлыны. Иосиф солэн ӵектонъёсызлы ноку но соглаш ӧз кариськылы. Соин ик Потифарлэн кышноезлэн сокем вожез потӥз, со Иосифез янгыше уськытӥз, со сое эриктэманы турттэ вал шуыса. (Лыдӟе Улон-вылонэз 39:14, 15.) Та сярысь тодэмез бере Потифар Иосифез «пытсэтэ ворсатӥз», отын со кӧня ке аръёс ӵоже пукиз (Ул.-выл. 39:19, 20). Кыӵе пытсэт сярысь татын вераське? Еврей кыл, кудзэ кутӥз Иосиф, возьматыны быгатэ ву возён интыез, гуэз (Ул.-выл. 40:15). Та валаны юрттэ, Иосифез туж кышкыт интые пуктӥзы шуыса. Озьы ик малпан кылдыны быгатэ, отысь нокызьы уд поты ни шуыса. Со сяна, Библия верамъя, Иосифез кӧня ке дыр ӵоже жильыосын дурыса возизы (Пс. 104:17, 18). Озьыен, Иосифлэн улонэз эшшо но секытгес луиз: нырысь сое ляльчие вузазы, нош табере пытсэтэ пуктӥзы.

8. Малы ми юн оскыны быгатӥськомы, югдурмы эшшо но секытгес луэ ке но?

⁸ Вал-а тӥляд сыӵе учырды, куке, ӟырдыт вӧсяськемды шоры учкытэк, эшшо но секытгес луиз? Озьы луыны быгатэ, малы ке шуоно Иегова уг утьы милемыз шуг-секытъёслэсь, кудъёсыныз ми Шайтанлэн дуннеяз пумиськыны быгатӥськомы (1 Иоанн 5:19). Но юн оске: Иегова умой тодэ, маин тӥ пумиськоно луиськоды, но со тӥ понна сюлмаське (Матф. 10:29—31; 1 Пётр 5:6, 7). Со сяна, Инмар кылзэ сётэ: «Уг кельты тонэ, уг кушты тонэ» (Евр. 13:5). Шуг-секытты вормонтэм потэ ке но, Иегова быгатэ тӥледлы юрттыны. Ойдолэ учкомы, кызьы Инмар Иосифлы юрттӥз.

9. Кытысь адӟиське, пытсэтын пукыкуз но, Иегова Иосифен ӵош вал шуыса? (Улон-вылон 39:21—23).

⁹ Лыдӟе Улон-вылонэз 39:21—23. Кышкыт пытсэтын пукыкуз но, Иегова Иосифлы азинлык сётӥз. Кызьы? Азьвыл Иосиф Потифарлы ярамон луыны быгатӥз, нош табере пытсэтэн кивалтӥсь йыр солы оскыны но сое гажаны кутскиз. Берлогес «пытсэтэн кивалтӥсь йыр ваньзэс жильыетын пукисьёсты Иосифлэн киулаз сётӥз». Озьы ик со «ӧз но учкылы, мар солэн киулаз вал». Табере, шуг-секытъёсызлы саклыксэ висъям интые, Иосиф ужезлы саклыксэ висъяны быгатӥз. Солэн югдурез малпамтэ шорысь воштӥськиз! Али гинэ Иосифез янгыше уськытӥзы, со Потифарлэсь кышнозэ эриктэманы турттэ вал шуыса, но со понна пытсэтэ пуктӥзы, нош табере солы дано уж сётӥзы. Кызьы озьы луыны быгатӥз? Кызьы гожтэмын Улон-вылонын 39:23, «Кузё-Инмар Иосифен ӵош вал, мар гинэ со ӧз лэсьтылы, Кузё-Инмар солы азинлык сётылӥз».

10. Валэктэ, малы Иосиф ӧз малпа, дыр, Иегова вань ужъёсаз солы азинлык сётэ шуыса.

¹⁰ Али нош ик учке та югдур шоры Иосифлэн синмыныз. Сое шонертэм янгыше уськытӥзы но пытсэтэ пуктӥзы. Кызьы тӥледлы потэ, малпаз-а со, Иегова вань ужъёсаз солы азинлык сётэ шуыса? Мар потэ вал Иосифлэн? Пытсэтэн кивалтӥсьлы ярамон луэмез? Иосифлэн потэ вал, дыр, сое шонере мед поттозы но мед мозмытозы шуыса. Кытысь со адӟиськиз? Иосифен ӵош пытсэтын пуке вал мукет пиосмурт, кудзэ тани-тани мозмытыны малпало вал. Иосиф куриз та пиосмуртэз фараонэн вераськыны, сое мед лэзёзы шуыса (Ул.-выл. 40:14). Но та пиосмурт Иосифлэн куронэз сярысь вунэтӥз. Соин ик Иосиф пытсэтын эшшо кык ар пукиз на (Ул.-выл. 40:23; 41:1, 14). Озьы ке но Иегова Иосифлы азинлык сётӥз.

11. Мар карыны быгатӥз Иосиф Иеговалэн юрттэменыз но кызьы ваньмыз та юрттӥз Иеговалэсь эриксэ быдэстыны?

 ¹¹ Иосиф пытсэтын пукыку, Иегова Египетысь эксэйлы кык уйвӧт сётӥз. Та уйвӧтъёс фараонэз туж кышкатӥзы. Солэн соосты валамез потэ вал. Куке фараон тодӥз, Иосифлэн уйвӧтъёсты валэктэмез луэ шуыса, со косӥз Иосифез пытсэтысь ас дораз вайыны. Иеговалэн юрттэменыз Иосиф уйвӧтъёсты валэктыны быгатӥз. Фараон талы туж паймиз. Со адӟиз, та пиосмуртэн Иегова шуыса. Соин ик фараон Иосифез «Египет музъемен кивалтыны пуктӥз» (Ул.-выл. 41:38, 41—44). Берлогес Египетэ туж секыт сютэм дыр вуиз. Сиён ӧй вал Ханаанын но, кытын Иосифлэн семьяез улӥз. Иосифлы вылӥ инты сётэмын вал бере, со быгатӥз аслэсьтыз семьязэ утьыны. Талы луыса солэн выжыысьтыз Мессия потыны быгатӥз.

12. Кызьы Иегова Иосифлы азинлык сётӥз?

¹² Малпаське Иосифлэн улонысьтыз учыръёс сярысь. Кин Потифарлэсь мылкыдзэ ӝутӥз огшоры ляльчилы саклыксэ висъяны? Кин пытсэтэн кивалтӥсьлэсь мылкыдзэ ӝутӥз Иосифез пытсэтын пукись мукет адямиослэсь вылӥегес пуктыны? Кин фараонлы кышкыт уйвӧтъёс сётӥз, нош Иосифлы соосты валэктыны юрттӥз? Кин ужпум кутӥз Иосифез Египет музъемен кивалтӥсе пуктыны? (Ул.-выл. 45:5). Вань та учыръёсын Иегова Иосифлы азинлык сётӥз. Иосифлэн агайёсыз сое виыны малпало вал ке но, Иегова лэсьтӥз озьы, солэн эрикез мед быдэсмоз шуыса.

13. Кивалтэ-а Иегова улонысьтымы котькуд учырен? Валэктэ.

¹³ Малы милям дышетскеммы луэ, Иосифлэсь улонзэ эскерыса? Кивалтэ-а Иегова улонысьтымы котькуд учырен? Луэ-а вераны, милемын мар ке уродэз луиз ке, Иегова озьы кивалтӥз шуыса? Уг, Библия талы уг дышеты (Екк. 8:9; 9:11, ВД). Но ми тодӥськомы: шуг-секытэн пумиськыкумы, Иегова сое тодэ но юрттэт курыса вӧсяськонъёсмес кылэ (Пс. 33:16; 54:23; Ис. 59:1). Со сяна, Иегова милемлы юрттыны быгатэ шуг-секытъёсмес чиданы.

14. Кызьы Иегова юрттэ милемлы секыт дыръя?

 ¹⁴ Кызьы Иегова милемлы юрттэ? Кылсярысь, со милемыз буйгатэ но милесьтым мылкыдмес ӝутэ, ӵем дыръя самой кулэ луись дыре (2 Кор. 1:3, 4). Озьы ик вал Туркменистанысь Эзиз агаен но. Осконэз понна сое кык арлы пытсэтэ пуктӥзы. Тани мар со вера: «Ӵукна, суд ортчон нуналэ, одӥг агай возьматӥз мыным Исаиялэн книгаысьтыз таӵе кылъёсты: „Каньыл сюлмын но оскиськыса улон бордын тӥляд кужымды“. Та кылбур юрттӥз мыным котьку но каньыл сюлмын улыны но Иеговалы оскиськыны. Пытсэтын пукыкум, та сярысь малпаськон мыным котьку но юрттэ вал». Быгатӥськоды-а тӥ тодады вайыны, кызьы Иегова юрттӥз тӥледлы ӵапак соку, куке тӥледлы со туж кулэ вал?

15, 16. Малы дышетэ милемыз Тори сузэрлэн учырез?

¹⁵ Ӵем дыръя, шуг-секытмы ортчем бере гинэ, ми адӟиськомы, кызьы Иегова милемлы юрттӥз. Тори сузэр тае ас вылаз шӧдӥз. Мейсон пиез куать ар ӵоже ракен нюръяськиз. Но жаляса верано луэ, висёнэз вормиз но, Мейсон кулӥз. Торилэн сюлмыз чидантэм вӧсь луиз. Со вера: «Нылпилэн кулэмез анайлы самой бадӟым куректон вае». Со ватса на: «Котькуд анай-атай соглаш луоз, дыр: туж секыт адӟыны нылпиедлэсь курадӟемзэ. Со интые ачид курадӟысалыд ке, капчигес луысал, дыр».

¹⁶ Берлогес Тори тодаз вайиз, кызьы Иегова солы вань со секыт дыр ӵоже юрттылӥз. Со вера: «Мон адӟисько, пие висьыку, Иегова котьку монэн вал шуыса. Кылсярысь, куддыръя Мейсон туж лябӟемын вал, соин ик эмъюртэ лыктэм агайёсын но сузэръёсын адӟиськыны солы секыт вал.  Озьы ке но агайёс но сузэръёс эмъюртэ лыкто вал, милемыз юнматон понна. Отчы кык час ӵоже мыноно вал ке но, эмъюртын котьку агайёс но сузэръёс вал. Озьы ик соос сюлмаськизы, семьямылэн ваньмыз кулэез мед луоз шуыса. Самой секыт дыръя но ми номырлы ёрмыса ӧм улэ». Иегова Тори сузэрлы но, Мейсонлы но ваньзэ чиданы юрттӥз. (Учке « Иегова сётылӥз милемлы ӵапак сое, мар милемлы кулэ вал» рамкаез.)

17, 18. Мар юрттоз милемлы секыт дыръя адӟыны но дунъяны Иеговалэсь юрттэмзэ? (Псалтирь 39:6).

¹⁷ Лыдӟе Псалтирез 39:6. Куке кин ке но корка пуктэ, солэн сое быдэстэмез но отын улэмез потэ, дыр. Но пуктыкуз со куддыръя дугдылэ но учке, мае лэсьтыны быгатӥз ини. Озьы ик тӥ но дырын-дырын дугдэ но малпаське, кызьы Иегова секыт дыръя но тӥледлы азинлык сётэ. Котькуд нуналлэн пумаз юалэ асьтэлэсь: «Кызьы Иегова монэ туннэ бакель кариз? Шуг-секытэ ӧз быры ке но, кызьы Иегова юрттӥз мыным ваньзэ чиданы?» Та сярысь малпаськыкуды, тырше Иеговалэсь одӥг ке но бакель каронзэ адӟыны.

¹⁸ Номыр умойтэмез ӧвӧл, куке ми вӧсяськиськомы, шуг-секытмы мед быроз шуыса (Флп. 4:6). Но со дыре ик адӟыны тыршоно, кызьы Иегова милемыз али ик ини бакель каре, малы ке шуоно со кылзэ сётэ: милемыз юнматоз но ваньзэ чиданы юрттоз. Соин ик тау каре, Иегова тӥледлы котькуд нунал юрттэ шуыса. Тазьы лэсьтыса, тӥ адӟоды, кызьы Иегова, Иосифлы сямен ик, тӥледлы но секыт дыръя юрттэ. Соку тӥ азинлыкоесь луоды (Ул.-выл. 41:51, 52).