1, 2. Малы Библиез туж умой кузьым шуыны луоз?

ПУКТЭ син азяды, эшты тӥледлы кузьым кузьма шуыса. Веранэз ӧвӧл, тӥляд сое ӝоггес усьтэмды потэ. Тӥ туж шумпотӥськоды, малы ке шуоно эшты тӥ сярысь малпаськиз.

² Библия — Инмарлэн кузьымез. Отын гожтэмын со, мае мукет интыысь уд тоды ни. Кылсярысь, отын верамын, кызьы Инмар кылдытӥз инмез, музъемез но адямиосты. Озьы ик отын гожтэмын визь-кенешъёс, кудъёсыз юрттозы милемлы шуг-секытъёсмес сэрттыны-пертчыны. Со сяна, отын верамын, кызьы Инмар музъемез райлы пӧрмытыны сётэм кылзэ быдэстоз. Зэмзэ ик, Библия — со туж умой кузьым!

3. Мае тӥ тододы, Библиез дышетыса?

³ Библиез дышетыса, тӥ тододы, Инмарлэн тӥледын эшъяськемез потэ шуыса. Инмар сярысь тросгес тодыса, тӥ быгатоды соин матысь эшъёс луыны.

4. Макем вӧлмемын Библия?

⁴ Библия ог 2 800 кылъёсы берыктэмын. Быдэс дунне вылын печатламын трос миллиард Библиос. Музъем вылын улӥсь адямиос пӧлысь 90 процентлэсь тросгес адямиос сое ас вордскем кылынызы лыдӟыны быгато. Котькуд арняе Библия  миллионлэсь тросгес адямиослэн киосазы вуэ. Зэмзэ ик, та выллем книга ӧвӧл ни!

5. Малы вераны луоз, Библия со Инмарлэсь книга шуыса?

⁵ Библия — со книга, кудзэ Инмар сётӥз. Со Инмарлэн кивалтэмез улсын гожтэмын. (Лыдӟе 2 Тимофейлы 3:16.) Но куд-огъёсыз юаны быгато: «Кызьы Библия Инмарлэсь книга луыны быгатэ, сое адямиос гожъязы ке?» Та юанлы валэктон сётэ ачиз Библия. Отын гожтэмын: «Сое Святой Дух пыр вырӟытэм Инмарлэн дун-чылкыт адямиосыз веразы» (2 Пётр 1:21). Вераломы пример. Кивалтӥсь секретарьзэ гожтэт гожтыны косэ. Гожтэтын кивалтӥсьлэн малпанъёсыз но косонъёсыз гожтэмын. Соин ик со кивалтӥсьлэн гожтэтэз,  секретарьлэн ӧвӧл. Озьы ик Библиен но. Отын Инмарлэн малпанъёсыз но косонъёсыз гожтэмын бере, со Инмарлэн Кылыз, нош сое гожъясь адямиослэн ӧвӧл (1 Фессалоникаослы 2:13; учке 2-тӥ ватсам валэктонэз).

6, 7. Мар вераны луоз Библилэн пуштросэз сярысь?

⁶ Библиез 1 600 арлэсь кемагес гожъязы. Сое гожъясьёс пӧртэм дыре улӥзы. Куд-огъёсыз соос пӧлысь дышетскем адямиос вал: кылсярысь, одӥгез вал эмъясь. Кин ке но музъем бордын ужась вал, кин ке чорыгась, нош кин ке пудо возьмась. Соос пӧлын вал пророкъёс, судьяос но эксэйёс. Библиез пӧртэм адямиос гожъязы ке но, со ачиз аслыз пумит уг луы *. Солэсь вань люкетъёссэ одӥг тема огазея.

⁷ Библилэн нырысетӥ люкетъёсаз верамын со сярысь, мар бордысен адямиослэн вань курадӟонъёссы кутскизы, нош берпуметӥ люкетъёсаз — со сярысь, кызьы Инмар соосты сэрттоз-пертчоз но кызьы музъемез райлы пӧрмытоз. Библиын гожтэмын адямиослэн трос сюрс аръёс ӵоже историзы. Озьы ик, отысь тодыны луэ, Инмар аслэсьтыз сётэм кылзэ котьку быдэстэ шуыса.

8. Кытысь адӟиське, Библия наука удысысь шонер тодон-валан сётэ шуыса?

⁸ Библия наукалы дышетон понна гожтэмын ӧй вал ке но, куке отын вераськон мынэ наука  сярысь, со котьку шонер тодон-валан сётэ. Сое ик ми возьмаськомы книгалэсь, кудзэ Инмар сётӥз. Кылсярысь, Левит книгаын гожтэм косонъёслы луыса, израиль пиос висёнъёслэсь вӧлмемзэс дугдытыны быгато вал. Со косонъёс туж кемалась гожтэмын вал, куке адямиос уг тодо на вал, кызьы висёнъёс вӧлмо. Озьы ик, Библия шонерзэ вера музъем сярысь. Отын верамын, со номыртэм интые ошемын шуыса (Иов 26:7). Со сяна, куке тросэз адямиос шонертэм малпало вал музъемлэн кыӵе луэмез сярысь, Библиын гожтэмын вал, со котырес шуыса (Исаия 40:22).

9. Мар сярысь вера Библиез гожъясьёслэн номыре ватытэк верамзы?

⁹ Куке Библия адямиослэн историысьтызы кыӵе ке учыръёс сярысь вера, соос сярысь со пыр-поч ивортэ. Нош историяя тросэз книгаос ваньзэ уг верало, малы ке шуоно куд-ог гожъясьёс мае ке ватыса кельто. Ӵем дыръя соос уг верало, соослэн калыксы кыӵе ке ожмаськонын вормемын вал шуыса. Нош Библиез гожъясьёс ӧз ватэ, Израиль куд-ог ожъёсын ӧз вормылы шуыса. Со сяна, соос асьсэлэн янгышъёссы сярысь гинэ но, номырзэ ватытэк, гожъяллязы. Кылсярысь, Моисей вераз, бадӟым янгыш лэсьтӥз шуыса, но вераз, кызьы Инмар сое со понна кыл кутытӥз. Со сярысь Лыдпусъёс книгаысь лыдӟыны луоз (Лыдпусъёс 20:2—12). Библиез гожъясьёслэн номыре ватытэк верамзы возьматэ, Библиез гожъянэн Инмар кивалтӥз шуыса. Озьыен, ми солы оскыны быгатӥськомы.

10. Малы Библиысь визь-кенешъёс милемлы юрттыны быгато?

¹⁰ Быдэс Священной Гожтэм, яке Библия, «Инмарлэн Духеныз вордскытэмын. Соин ик Священной Гожтэм дышетэ, сьӧлыкъёсты шарае поттэ, шонер сюрес вылэ султытэ, Инмарлы ярамон улыны дышетыса, со пайда вае» (2 Тимофейлы 3:16). Малы Библиысь визь-кенешъёс милемлы юрттыны быгато? Иегова вала милесьтым малпанъёсмес но шӧдонъёсмес, малы ке шуоно со милемыз кылдытӥз. Со асьмелэсь но умойгес тодэ милемыз, но солэн потэ, ми шудоесь мед луомы шуыса. Со тодэ, мар милемлы пайда ваёз, нош мар уз.

11, 12. а) Кыӵе визь-кенешъёс гожтэмын Матфейлэсь ӟеч иворын, 5-тӥ люкетысен 7-тӥ люкетозь? б) Мае эшшо тодыны луэ на Библиысь?

¹¹ Матфейлэсь ӟеч иворын, 5-тӥ люкетысен 7-тӥ люкетозь, Иисуслэн визьмо визь-кенешъёсыз гожтэмын: кызьы шудо луоно, кызьы мукетъёсыныз умой кусыпъёс возёно, кызьы вӧсяськоно, кызьы коньдон шоры учконо. Со визь-кенешъёс ог 2 000 ар талэсь азьло гожтэмын вал ке но, туннэ нуналэ но соос пайда ваё.

¹² Озьы ик, Библиын возетъёс гожтэмын. Соос пыр Иегова дышетэ милемыз мукет адямиосын тупаса улыны, тыршыса ужаны но семья кусыпъёсмес юнматыны. Библиысь возетъёс котькудмылы юрттыны быгато, кытын гинэ ми медам улэ но кыӵе гинэ шуг-секытъёсын медам пумиське. (Лыдӟе Исаиялэсь 48:17; учке 3-тӥ ватсам валэктонэз.)

13. Мар азьло ик вераз Исаия пророк Вавилон кар сярысь?

¹³ Библиын гожтэм тросэз азьпалзэ ивортонъёс быдэсмизы ини. Кылсярысь, Исаия пророк азьло ик вераз вал, вашкала Вавилон кар куашкатэмын луоз шуыса (Исаия 13:19). Озьы ик, со  вераз, кызьы сое куашкатозы. Карез уте вал бадӟым туж юн капка но кар пыр бызись шур. Исаия вераз, шурез куасьтозы, капкаез ворсатэк кельтозы но кар ожмаськытэк киултэмын луоз шуыса. Со сяна, Исаия Вавилонэз киултӥсьлэсь нимзэ но вераз — Кир. (Лыдӟе Исаиялэсь 44:27—45:2; учке 4-тӥ ватсам валэктонэз.)

14, 15. Кызьы Исаиялэн азьпалзэ ивортонэз быдэсмиз?

¹⁴ Вавилон сярысь азьпалзэ ивортонэз гожтэм бере 200 ар ортчыса, карлэн борддоръёсыз доры тушмонлэн армиез лыктӥз. Кин соин кивалтӥз? Кызьы вераз вал Исаия, со вал Персиялэн Кир эксэез. Нош быгатозы-а Кирлэн ожгарчиосыз Вавилонэ пырыны, кызьы азьло ик вераз вал Исаия пророк?

¹⁵ Со уе Вавилонын улӥсьёс юондыр ортчытӥзы. Соос номырлэсь ӧз кышкалэ, малы ке шуоно карзэс утизы юн борддоръёс но шур. Со куспын карлэн борддоръёсыз сьӧрын Кир аслаз армиеныз, музъемез гудыса, шурез мукет ӧре лэзиз.  Шур лазег луиз но, Персиялэн ожгарчиосыз шур вамен потыны быгатӥзы. Нош кызьы меда соос каре пырозы? Кызьы верамын вал азьпалзэ ивортонын, карлэн капкаез ворсатэк кельтэмын вал, соин ик Кир Вавилонэз ожмаськытэк киултӥз.

16. а) Мар эшшо вераз на Исаия, Вавилон сярысь азьпалзэ ивортыса? б) Кытысь ми тодӥськомы, та азьпалзэ ивортон быдэсмиз шуыса?

¹⁶ Со сяна, Исаия азьло ик вераз, Вавилонын ноку но, нокин но уз улы ни шуыса. Со гожтӥз: «Нокин но отчы улыны уз интыяськы» (Исаия 13:20). Быдэсмиз-а та азьпалзэ ивортон? Быдэсмиз. Со интыын, кытын куке но Вавилон кар вал, Багдад палан (Ирак), али ке но куашкатэм бервылъёс гинэ. Отын нокин уг улы. Иегова вераз Исаия пыр: «Ӵушкась-быдтӥсь исьнерен сое [Вавилонэз] ӵужо» (Исаия 14:22, 23) *.

17. Малы Инмарлэн кыл сётонъёсызлы оскыны луэ?

¹⁷ Библиысь тросэз азьпалзэ ивортонъёс быдэсмизы ини. Озьыен, быдэсмоз со но, мар вера Библия азьпал улон сярысь. Ми оскиськомы, Иегова аслэсьтыз сётэм кылзэ быдэстоз но музъем рай луоз шуыса. (Лыдӟе Лыдпусъёсты 23:19.) Милям «пумтэм вапумъёсы улон басьтонлы» оскиськонмы вань, кудзэ «аслэсьтыз верам кылзэ котьку но быдэсъясь Инмар... вапумъёс кутсконлэсь азьвыл ик сӥзиз» (Титлы 1:2) *.

18. Мар вераз Павел Инмарлэн Кылыз сярысь?

¹⁸ Озьыен, ми тодӥмы, маин Библия мукет книгаослэсь пӧртэм луэ. Со ачиз аслыз пумит ӧвӧл. Куке отын наука яке история сярысь вераськон мынэ, со котьку шонер тодон-валан сётэ. Ми тодӥмы, Библиын визьмо визь-кенешъёс но азьпалзэ ивортонъёс гожтэмын шуыса, кудъёсыз пӧлысь тросэз быдэсмизы ини. Но со ваньмыз ӧвӧл на. Апостол Павел вераз: «Инмарлэн кылыз улэп, со ӝоглыко». Мае со возьматэ? (Лыдӟе Еврейёслы 4:12.)

19, 20. а) Кызьы Библия валаны юрттэ, кыӵеесь ми зэмзэ ик но мар милям сюлмамы мур ватскемын? б) Кызьы тӥ асьтэос возьматыны быгатӥськоды, Инмарлэсь та кузьымзэ дунъяськоды шуыса?

¹⁹ Библия тӥлесьтыд улондэс воштыны быгатэ. Со юрттэ тодыны, кыӵеесь ми зэмзэ ик. Библиез лыдӟыса, ми тодӥськомы, мар милям сюлмамы мур ватскемын. Кылсярысь, ми малпаны быгатомы, Инмарез яратӥськомы шуыса. Но сое яратэммес возьматон понна, милемлы улоно озьы, кызьы дышетэ Библия.

²⁰ Библия — со зэмзэ ик книга, кудзэ Инмар сётӥз. Инмарлэн потэ, ми сое мед лыдӟомы, мед дышетомы но мед яратомы шуыса. Сое эскерыны тыршимы ке, озьы ми Инмарлы кузьымез понна тау кареммес возьматомы. Библиын гожтэмын, кыӵе улон сётэмез потэ Инмарлэн адямиослы азьланяз. Мукетаз люкетын ми со сярысь пыр-почгес вераськомы.