1, 2. Кыӵе юанъёссы ӵем дыръя кылдо адямиослэн?

НЫЛПИОС ярато юанъёс сётъяны. Кылсярысь, тӥ соослы мар ке но верады, нош соос юало: «Малы?» Тӥ валэктыны тыршиды, озьы ке но соос выльысь юало: «Нош малы?»

² Егитэсь-а ми, арлыдоесь-а ини, ваньмылэн асьмелэн юанъёсмы кылдо. Кылсярысь, таӵе юанъёс: мар сиёно? Мар дӥсяно? Мар басьтоно? Яке мукет туж кулэ юанъёс кылдыны быгато, кылсярысь, малы ми улӥськомы но мар луоз азьланяз. Та юанъёслы сюлэммылы кельшись валэктонъёс ум ке шедьтӥське, ӵемысь ми соосты утчамысь дугдӥськомы.

3. Малы тросэз малпало, кулэ луись юанъёслы валэктонъёс шедьтыны уг луы шуыса?

³ Быгатэ-а Библия сюлмаськытӥсь юанъёслы валэктонъёс сётыны? Куд-огъёсыз малпало, быгатэ шуыса, нош валаны Библиез секыт. Соос малпамъя, валэктонъёс сётыны быгато священникъёс гинэ, яке нимысьтыз дышетскем адямиос. Мукетъёсыз, юанъёслы валэктонъёсты уг тодо ке но, юаны возьдасько. Нош тӥ мар малпаськоды?

4, 5. Кыӵе юанъёсты тӥляд кылдо? Малы соослы валэктонъёс утчамысь дугдоно ӧвӧл?

⁴ Тӥ малпаськиськоды, дыр: «Кызьы адямиос кылдӥзы? Мар луэ адямиен кулэм бераз?  Вань-а Инмар? Инмар вань ке, кыӵе со?» Быдӟым дышетӥсь Иисус Христос вераз: «Курелэ — тӥледлы сётэмын луоз; утчалэ — шедьтоды; йыгаське — тӥледлы усьтозы» (Матфей 7:7). Юанъёстылы оскымон валэктонъёс ӧд шедьтэ ке, эн дугдэ утчамысь!

⁵ «Утчалэ» — тӥ соосты одно ик Библиысь шедьтоды (Мадёнъёс 2:1—5). Соосты валаны секыт ӧвӧл. Библиысь тодон-валан улондэс шудогес кароз но азьланяз умой улонлы оскон сётоз. Нош али ойдолэ эскеромы юанэз, кудӥз трос адямиосты сюлмаськытэ.

6. Малы куд-огъёсыз малпало, Инмар адямиосты уг яраты шуыса?

⁶ Тросэз малпало, Инмар адямиосты уг яраты шуыса, малы ке шуоно со яратысал ке, улон чылкак мукет луысал. Но жаляса верано луэ, котыр вӧлмемын ожмаськонъёс, лек ужъёс но куректон. Адямиос висё, курадӟо но куло. Зэмзэ ик, юан кылдэ: «Инмар асьмемыз яратэ ке, малы соку со курадӟонъёсты уг быдты?»

7. а) Малы эшшо адямиос Инмарез лек шуо? б) Малы оскыны луэ, Инмар дорысь лек ужъёс уг пото шуыса?

⁷ Адямиос малпало, Инмар лек шуыса, малы ке шуоно священникъёслэсь озьы верамзэс кыло. Кыӵе ке шудтэм учыр луэ ке, священникъёс верало, Инмарлы озьы кулэ вал шуыса, со солэн эрикез. Озьы вераса, соос Инмарез янгыше уськыто. Но Библиын верамын,  Инмар дорысь лек ужъёс нокызьы но уг пото шуыса. Иаковлэн 1:13 гожтэмын: «Визь сынаськон лыктыку нокин но медаз шуы: „Инмар визьме сына“. Нокыӵе но урод ужлэн Инмарлэсь визьзэ сынамез уг луы, Инмар Ачиз но нокинлэсь визьзэ уг сына». Со возьматэ, Инмар али урод ужъёсты уг быдты ке но, ачиз со урод ужъёсты ноку но уг лэсьты. (Лыдӟе Иов книгаез 34:10, 12.) Ойдолэ эскеромы одӥг примерез.

8, 9. Малы шуг-секытъёсмы понна Инмарез янгыше уськытыны шонертэм луысал? Вералэ пример.

⁸ Пуктэ син азяды егит пиез, кудӥз анай-атаеныз улэ. Атаез пизэ туж яратэ но ас дыраз дышетӥз сое визьмо ужпумъёс кутыны. Но одӥг пол егит пи атаезлы пумитъяськыны кутске но дорысьтыз кошке. Со урод ужъёс лэсьтыны кутске но шуг-секытэ сюре. Янгыше уськытоды-а тӥ атайзэ, со пизэ дорысьтыз кошкыны лэзиз шуыса? Уд! (Лука 15:11—13). Озьы ик Инмар но кутыса ӧз возьы адямиосты, куке соос пумит султӥзы но урод ужъёс лэсьтыны кутскизы. Соин ик, куке мар ке уродэз луэ, тодады возе: Инмар отын янгыш ӧвӧл. Шонертэм луысал сое янгыше уськытыны.

⁹ Инмарлэн мугъёсыз вань, малы со та дырозь музъем вылысь лек ужъёсты ӧз быдты на. Та книгалэн 11-тӥ люкетаз со сярысь пыр-почгес верамын луоз. Эн вунэтэ: Инмар асьмемыз яратэ но со янгыш ӧвӧл, ми шуг-секытъёсын  пумиськиськомы шуыса. Зэмзэ верано ке, Инмар гинэ милесьтым шуг-секытъёсмес сэрттыны-пертчыны быгатэ (Исаия 33:2).

10. Малы ми оскыны быгатӥськомы, Инмар вань уродзэ быдтоз шуыса?

¹⁰ Инмар «Дун-Сьӧлыктэм» (Исаия 6:3). Солэн вань ужъёсыз шонересь но умоесь. Соин ик ми солы оскыны быгатӥськомы. Но адямиос сыӵеесь ӧвӧл. Куддыръя соос урод ужъёс лэсьто. Самой умой кивалтӥсь но уз быгаты быдтыны адямиосын лэсьтэм вань урод ужъёслэсь бервылъёссэс, малы ке шуоно солэн ӧвӧл сомында кужымез, кӧня вань Инмарлэн. Нош Инмарлэн кужымез но, мылкыдыз но вань адямиосын лэсьтэм вань урод ужъёслэсь бервылъёссэс быдтыны. Со пыраклы быдтоз дунне вылысь вань уродзэ. (Лыдӟе Псалтирез 36:9—11.)

11. Кыӵе шӧдонъёсыз кылдо Инмарлэн, милесьтым курадӟеммес адӟыса?

¹¹ Кыӵе шӧдонъёсыз кылдо Инмарлэн, куке со адӟе, кыӵе ужъёс дунне вылын лэсьтӥсько но мае тӥледлы чидано луэ? Библия дышетэ: «Кузё-Инмар шонерлыкез яратэ» (Псалтирь 36:28). Со ӟеч ужъёсты яратэ но лек ужъёсты адӟемпотостэм каре. Солэн уг поты, адямиос мед курадӟозы шуыса. Библиын верамын, Инмарлэн «сюлмыз ӝоже усиз» шуыса, дуннелэсь лек ужъёс пӧлы выемзэ адӟыса (Улон-вылон  6:5, 6). Инмар ӧз воштӥськы (Малахия 3:6). Библиын верамын, со асьме сярысь сюлмаське шуыса. (Лыдӟе 1 Пётрлэсь 5:7.)

12, 13. а) Малы ми яратыны быгатӥськомы но кыӵе шӧдонъёсмы милям кылдо, мукетъёсызлэсь курадӟемзэс адӟыса? б) Малы оскыны луэ, Инмар вань курадӟонъёсты но шонертэм ужъёсты быдтоз шуыса?

¹² Со сяна, Библиын верамын, ми Инмарлы укшатыса кылдытэмын шуыса (Улон-вылон 1:26). Со возьматэ, Инмар милемыз аслаз кадь умой сямъёсын кылдытӥз шуыса. Соин ик, куке ми янгыштэм адямиослэсь курадӟемзэс адӟиськомы, милям сюлэммы вӧсь луэ. Нош Инмарлэн сюлмыз эшшо но вӧсьгес луэ! Кытысь ми сое тодӥськомы?

¹³ Библия вера: «Инмар — со яратон» (1 Иоанн 4:8). Со ваньзэ яратэменыз лэсьтэ. Ми яратыны быгатӥськомы, малы ке шуоно Инмар яратыны быгатэ. Тани мар сярысь малпаське: дунне вылысь вань курадӟонъёсты но шонертэм ужъёсты быдтыны быгатысалды ке, быдтысалды-а тӥ соосты? Одно ик, малы ке шуоно тӥ яратӥськоды адямиосты! Нош Инмар? Инмар но адямиосты яратэ, со сяна, солэн кужымез но вань дунне вылысь вань курадӟонъёсты но шонертэм ужъёсты быдтыны. Соин ик оскыны быгатӥськоды, та книгалэн кутсконаз верам Инмарлэн вань кыл сётонъёсыз одно ик быдэсмозы шуыса! Но солы оскон понна, Инмарез умойгес тодоно.

14. Кызьы Инмарлэн нимыз но малы солы нимызъя вазиськоно?

¹⁴ Тӥляд кинэн ке тодматскемды но бератаз соин эшъяськемды потэ ке, мар тӥ нырысь ик кариськоды? Асьтэлэсь нимдэс вераськоды. Нош Инмарлэн нимыз вань-а? Трос религиосын сое «Инмар» яке «Кузё-Инмар» шуо. Но со нимъёс ӧвӧл. Со «эксэй» яке «азьмурт» выллем кылъёс, кудъёсыз возьмато, кыӵе инты басьтэ адями яке кин ке но мукетыз. Инмар вераз, солэн нимыз — Иегова шуыса. Библиын гожтэмын: «Адямиос мед тодозы, тон, кинлэн нимыз Иегова, Тон одӥгнад быдэс музъем выллы Вылысь Инмар луиськод шуыса» (Псалтирь 83:18, Выль дуннелэн берыктэмез (ВД) [82:19, Библия удмурт кылын (УБ)]). Библиез гожъясьёс Инмарлэсь нимзэ трос сюрс пол гожтӥзы. Удмурт кылэ берыктэм Библиын Инмарлэн нимыз куинь пол пумиське, кылсярысь, Судьяос книгаын  6:24 «Иегова Шалом» веранын, кудӥз еврей кылысь «Иегова — со каньыллык» шуыса берыктӥське. Иеговалэн потэ, ми солэсь нимзэ мед тодомы но солы нимызъя мед вазиськомы шуыса. Со аслэсьтыз нимзэ вераз, ми солэн эшез луыны мед быгатомы шуыса.

15. Мае возьматэ «Иегова» ним?

¹⁵ «Иегова» нимлэн мур пуштросэз. Со возьматэ, Инмар котькуд сётэм кылзэ но малпам ужзэ быдэстыны быгатэ шуыса. Солы номыр но, нокин но люкетыны уг быгаты. Иегова гинэ со нимез нуллыны быгатэ *.

16, 17. Мае возьмато та веранъёс: а) «Ваньмызлэсь Кужмо»? б) «Пумтэм вапумъёсысь Эксэй»? в) «Кылдытӥсь»?

¹⁶ Улон-вылонын 35:11 гожтэмын, Иегова «Ваньмызлэсь Кужмо Инмар» шуыса. Мае возьматэ «Ваньмызлэсь Кужмо» верам? Со возьматэ, быдэс Дуннеын нокин но Иеговалэсь кужмоез ӧвӧл ни шуыса. Озьы ик, 1 Тимофейлы 1:17 Иегова «Пумтэм вапумъёсысь Эксэй» шуыса нимамын. «Пумтэм вапумъёсысь Эксэй» кылъёс возьмато, Иеговалэн кутсконэз но, быронэз но ӧвӧл шуыса, со котьку вал. Псалтирьын 89:3 Иегова сярысь гожтэмын: «Даурысь дауре Тон — Инмар». Со возьматэ, Иегова ноку но уз быры, со котьку улоз шуыса. Со сярысь малпаса, сюлэм ик юн жугиськыны ӧдъя!

 ¹⁷ Иеговаез гинэ Кылдытӥсь шуыса ниманы луоз. Усьтӥськонын 4:11 верамын: «Тон, Кузё-Инмаре, данлыкез, сӥ-данэз, кужымез басьтыны ярась, уго Тон ваньзэ кылдытӥд, ваньмыз Тынад эрикедъя улэ-вылэ, кылдытэмын». Инмысь кылчинъёсты, кизилиосты но планетаосты, писпуосты но сяськаосты, чорыгъёсты но тылобурдоосты — ваньзэ сое Иегова кылдытӥз.

18. Малы куд-ог адямиос малпало, Инмарен эшъяськыны уг луы шуыса? Мар вера Библия Инмарен эшъяськон сярысь?

¹⁸ Куд-ог адямиос, Инмарлэн туж умой сямъёсыз сярысь тодыса, тазьы вераны быгато: «Инмар сокем кужмо, быдӟым, но со туж кыдёкын. Малы со мон сярысь сюлмаськыны кулэ?» Но потэ-а Инмарлэн, ми озьы мед малпаломы шуыса? Уг. Иеговалэн потэ, ми соин эшъёс мед луомы шуыса. Библия вера Инмар сярысь: «Со... ваньмылы асьмелы матын улэ» (Апостолъёслэн ужъёссы 17:27). Инмарлэн потэ, тӥ солы матэ мед кариськоды шуыса, но со кылзэ сётэ, «Со но тӥляд матады лыктоз» шуыса (Иаков 4:8).

19. а) Кызьы тӥ Инмарлэн эшез луыны быгатӥськоды? б) Иеговалэн кыӵе сямъёсыз тӥледлы тужгес но кельшо?

 ¹⁹ Кызьы тӥ Инмарлэн эшез луыны быгатӥськоды? Иисус вераз: «Та быронтэм улон луэ: соос мед тодозы Тонэ, одӥг гинэ зэм Инмарез, но Тонэн ыстэм Иисус Христосэз» (Иоанн 17:3). Инмарлэн эшез луон понна, азьланяз но со сярысь но Иисус Христос сярысь тодон-валан басьтоно. Кызьы верамы вал ини, «Инмар — со яратон» (1 Иоанн 4:16). Со сяна, солэн вань на мукетъёсыз но туж умой сямъёсыз. Библия вера, Иегова «адямиез яратӥсь, гажась-жалясь, кема чидась, туж гажась-жалясь, зэмлыко Инмар» шуыса (Потон 34:6; 2 Пётр 3:9). Со «сьӧлыкъёсты куштыны яратӥсь Инмар, ӟечлыко» (Неемия 9:17б). Инмар «оскиськымон» (Еврейёслы 10:23). Библиез лыдӟыса, тӥ тросгес тодыны быгатоды Инмарлэн туж умой сямъёсыз сярысь.

20—22. а) Кызьы Инмарен эшъяськыны луэ, сое адӟыны уг луы ке? б) Мар кароно, кин ке тӥледыз Библиез дышетэмысь дугдытыны тырше ке?

²⁰ Кызьы Инмарен эшъяськыны луэ, сое адӟыны уг луы ке? (Иоанн 1:18; 4:24). Лыдӟе Библиез, озьы тӥ тододы Иеговалэн малпанъёсыз но шӧдонъёсыз сярысь (Псалтирь 26:4; Римъёслы 1:20). Иегова сярысь тросгес тодыса, тӥ сое юнгес яратоды но пумен солэн эшез луоды.

²¹ Тӥ валалоды, малы Иеговаез Атай шуыны луэ (Матфей 6:9). Со милемлы улон кузьмаз, но  солэн потэ вал, ми шудо мед уломы шуыса. Сое сӥзе котькуд яратӥсь атай аслаз нылпиосызлы (Псалтирь 35:10). Озьыен, Библия дышетэ, ми Инмарлэн эшъёсыз луыны быгатӥськомы шуыса (Иаков 2:23). Малпалэ ай: Иеговалэн, быдэс Дуннеез Кылдытӥсьлэн, потэ, тӥ солы эш мед луоды шуыса!

²² Тӥ сярысь сюлмаськеменызы, куд-ог адямиослэн тӥледыз Библиез дышетэмысь дугдытэмзы потоз. Соос кышкало, вылды, тӥ асьтэлэсь религидэс воштоды шуыса. Но нокинлы но эн лэзе люкетыны тӥледлы Инмарлэн эшез луыны, малы ке шуоно Иегова самой умой эш.

23, 24. а) Малы возьдаськоно ӧвӧл юанъёс сётъяны? б) Мае ми тодомы мукет люкетысь?

²³ Библиез дышетыкуды, тӥледлы маиз ке валантэм потоз, дыр. Сое валан понна, юрттэт куре но юанъёс сётъялэ. Иисус вераз, милемлы нылпиос кадь зӥбыт-востэмесь луоно шуыса (Матфей 18:2—4). Нылпиос юанъёс сётъяны уг возьдасько. Инмарлэн потэ, тӥ юанъёстылы валэктонъёс мед шедьтоды шуыса. Соин ик тыршыса Библиез дышетэ, озьы тӥ валалоды, Библиысь тодон-валан со зэмлык шуыса. (Лыдӟе Апостолъёслэсь ужъёссэс 17:11.)

²⁴ Иеговаез тодон понна самой умой амал — со Библиез дышетон. Мукетыз люкет валэктоз, маин Библия мукет книгаослэсь пӧртэм луэ.