Авраам патриархлэн выжыысьтыз Инмар аслыз калык бырйиз но солы законъёс сётӥз. Сое со «Израиль» шуыса нимаз. Со луиз одӥг гинэ калык, кудӥз Инмарлы шонер йыбыртъяз но Инмарлэсь Кылзэ чакласа улӥз (Псалтирь 147:8, 9). Солы луыса вань калыкъёсысь адямиос Инмар доры лыктыны быгато вал. (Лыдӟе Улон-вылонэз 22:18.)

Инмар израиль калыкез бырйиз, соос солэн адӟисьёсыз-ивортӥсьёсыз мед луозы шуыса. Вашкала израиль калыклэн улонэз возьматэ, адями Инмарлэн законъёсызъя улэ ке, со бадӟым пайда вае шуыса (Кыкетӥ Закон 4:6). Израиль калык шоры учкыса, мукет калыкысь адямиос но быгато вал зэмос Инмар сярысь тодыны но солы оскыны. (Лыдӟе Исаиялэсь 43:10, 12.)

Дыр ортчыса, Израиль калык Инмарлы ярамон луэмысь дугдӥз. Иегова со калыкез кулэ ӧз кары ни но со интые христиан кенешез кылдытӥз (Матфей 21:43; 23:37, 38). Азьло Иеговалэн адӟисьёсыз-ивортӥсьёсыз вал израиль калык пӧлысь адямиос, нош табере солэн адӟисьёсыз-ивортӥсьёсыз — со зэмос христианъёс. (Лыдӟе Апостолъёслэсь ужъёссэс 15:14, 17.)

Иисус косӥз аслэсьтыз дышетскисьёссэ мыныны но ӟеч иворез вань калыкысь адямиослы вераны, соос но солэн дышетскисьёсыз мед луозы шуыса (Матфей 10:7, 11; 24:14; 28:19, 20). Туннэ, куке та дунне бырон азьын сылэ, тодытон уж паськыт вӧлмемын. Ноку но азьвыл Иегова вань калыкъёсысь трос миллион адямиосты тазьы ӧз огазея на вал. Табере соос зэмлыкез тодо но Инмарлы шонер йыбыртъяло (Усьтӥськон 7:9, 10). Зэмос христианъёс огазеямын, соос ог-огзэс юнматыны но ог-огзылы юрттӥськыны мед быгатозы шуыса. Быдэс дуннеын соос Библиез одӥг программая дышето. (Лыдӟе Еврейёслы 10:24, 25.)

1870-тӥ аръёсы кӧня ке адямиос, Библиез эскерыса, пичиен-пичиен люканы кутскизы Библиысь зэмлыкъёсты, кудъёсыз трос дауръёс ӵоже вунэтэмын вал ини. Библиез эскерисьёс тодо вал, Иисус христиан кенешез кылдытӥз, Эксэйлык сярысь ивор тодытэмын мед луоз шуыса. Соин ик соос быдэс дунне вылын Эксэйлык сярысь иворез тодытыны кутскизы. 1931-тӥ арын соос Иеговалэн Адӟись-Ивортӥсьёсыз шуыса нимаськыны кутскизы. (Лыдӟе Апостолъёслэсь ужъёссэс 1:8; 2:1, 4, 11; 5:42.)

Нырысетӥ даурын пӧртэм шаеръёсысь вань христианъёсын кивалтӥсь кенеш кивалтэ вал, кудӥз Иисусэз кенешлэн Йырыныз лыдъяз но солэсь кылзӥськиз (Апостолъёслэн ужъёссы 16:4, 5). Туннэ но Иеговалэн Адӟись-Ивортӥсьёсызлэн Кивалтӥсь кенешсы вань, кудаз тодӥсь-валась тӧроос пыро. Кивалтӥсь кенеш Иеговалэн Адӟись-Ивортӥсьёсызлэн филиалъёссылэсь ужзэс радъя. Со филиалъёсын Библиез дышетон понна публикациосты 800-лэсь тросгес кылъёсы берыкто но печатлало. Солы луыса Кивалтӥсь кенеш быгатэ быдэс дунне вылысь 110 000-лэсь тросгес кенешъёсты юнматыны но соослы кивалтэт сётыны. Котькуд кенешын вань пиосмуртъёс, кудъёсыз нимысьтыз куронъёслы тупало но тӧро луыса ужало-тыршо. Соос яратыса сюлмасько кенешысь котькудӥз сярысь. (Лыдӟе 1 Пётрлэсь 5:2, 3.)

Иеговалэн Адӟись-Ивортӥсьёсыз одӥг организацие огазеямын, ӟеч иворез тодытон но дышетскисьёсты дасян понна. Апостолъёслэсь адӟем карыса, ми коркась корка тодытыса ветлӥськомы (Апостолъёслэн ужъёссы 20:20). Котькуд адямилы, кудӥзлэн зэмлыкез зэмзэ ик тодэмез потэ, ми ӵектӥськомы Библиез дышетыны. Но Иеговалэн Адӟись-Ивортӥсьёсыз огшоры гинэ организация ӧвӧл, соос одӥг семья луо, кудаз яратӥсь Атай вань. Ми ваньмы вын-агайёс но сузэр-апайёс, кудъёсыз ог-огзы сярысь сюлмасько (2 Фессалоникаослы 1:3). Иеговалэн ужась-тыршисьёсыз Инмарлэсь эриксэ быдэстон но мукетъёсызлы юрттон понна огазеямын. Соин ик соос музъем вылын самой шудо семья. (Лыдӟе Псалтирез 32:12; Апостолъёслэсь ужъёссэс 20:35.)