Кин утёз кышномуртъёсты? Мар вера Библия
Быдэс дунне вылысь трос миллион кышномуртъёс но нылъёс вӧсь каронэн но ултӥянэн пумисько. Тӥ но сыӵе югдуре шедемын ке, тодэ, малы Инмар тӥледыз дунъя но мар со кароз, азьланяз кышномуртъёсты медаз ни ултӥялэ шуыса.
«Пичи дыръям монэ агае весь жугыса но ултӥяса улӥз. Нош быземе бере картэлэн анаез но атаез монэ ултӥяса возизы, мон соослы ляльчи чотын вал. Соин мон йырме быдтон сярысь малпаськыны кутски» (Маду a, Индия).
«Кышномуртэз ултӥян но вӧсь карон туж паськыт вӧлмемын»,— ивортэ Дуннеысь тазалыкез утёнъя огазеяськон. Та организация верамъя, куинез пӧлысь одӥгез кышномурт улонэз ӵоже одӥг пол ке но пумиське вӧсь каронэн яке эриктэманэн.
Тӥ но сыӵе учырен пумиськиды ке, тӥ кышкаськоды, дыр, тӥледыз нош ик ултӥялозы яке вӧсь карозы шуыса. Кышномуртъёсты вӧсь каро но ултӥяло бере, тӥ малпаны быгатоды, тросэз адямиос кышномуртъёсты чик уг гажало шуыса. Нош кызьы Инмар учке кышномуртъёс шоры?
Инмарлэн потэ, кышномуртъёс кышкатэк мед улозы шуыса
Кызьы Инмар учке кышномуртъёс шоры?
Библиын верамын: «Инмар... пиосмуртэн кышномуртэз кылдытӥз» (Улон-вылон 1:27).
Кызьы сое валано. Инмар пиосмуртэз но, кышномуртэз но кылдытӥз бере, со дунъя соизэ но, таизэ но. Со сяна, Инмар возьма, карт «кышнозэ ассэ ачиз кадь» яратоз шуыса (Ефесъёслы 5:33). Инмарлэн уг поты, картъёс кышнооссылэсь котькуд вамышсэс мед чаклалозы, мед ултӥялозы но вӧсь мед карозы шуыса (Колоссыослы 3:19). Озьыен адӟиське: Инмарлэн потэ, кышномуртъёс кышкатэк мед улозы шуыса.
«Пичи дыръям мон ӵыжы-выжыосы палась эриктэманэн пумиськи. Куке мыным 17 арес вал, кузёе вераз, мон соин ӧй ке кӧлы, со монэ ужысь уллялоз шуыса. Нош бадӟым будэме бере монэ ултӥяса возизы картэ, анай-атае но бускельёсы. Но берло мон тодӥ, милям Кылдытӥсьмы, Иегова b Инмар, кышномуртъёсты гажа шуыса. Мон валай, со монэ яратэ но дунъя шуыса» (Мария, Аргентина).
Мар юрттоз тӥледлы буйгатскон шедьтыны?
Библиын верамын: «Зэмос эш агай-вынлэсь но матынгес луыны быгатэ» (Мадёнъёс 18:25).
Кызьы сое валано. Зэмос эш тӥледлы котьку но юрттоз. Быгатӥськоды ке, вералэ сюлмаськондэс солы, кинлы тӥ оскиськоды.
«20 ар мон нокинлы но ӧй вера, монэ эриктэмазы шуыса. Вань та дыр ӵоже мон туж сюлмаськыса но куректыса улӥ. Нош куке сюлмаськонме верай солы, кин монэ кылзыны дась вал, мыным туж капчи луиз — пельпум вылысьтым секыт из усиз кадь» (Элиф, Турция).
Библиын верамын: «Вань сюлмаськонъёстэс... [Инмар] доры вае, уго Со тӥ сярысь сюлмаське» (1 Пётр 5:7).
Кызьы сое валано. Инмар туж сак кылзэ тӥлесьтыд вӧсяськемдэс (Псалтирь 54:23; 64:3). Со тӥ сярысь сюлмаське бере, со юрттоз тӥледлы асьтэды гажаны.
«Куке мон Иегова сярысь тодӥ, мынам сюлэмы буйганы кутскиз. Али мон быгатӥсько Инмарлы вӧсяськыны но вераны солы ваньзэ, мар монэ сюлмаськытэ. Со мыным зэмос эш кадь, кудӥз монэ туж умой вала» (Ана, Белиз).
Дугдытоз-а Инмар кышномуртъёсты вӧсь каронэз?
Библиын верамын: «Кузё-Инмаре! ...Анайтэм-атайтэмлы, ултӥям муртлы дурбасьтон понна пельдэ усьты, музъем вылысь адями кышкатыса медаз ни возьы» (Псалтирь 9:38, 39).
Кызьы сое валано. Ӝоген Инмар вань лек ужъёсты быдтоз, кышномуртъёсты вӧсь каронэз но дугдытоз.
«Библиысь мон тодӥ, ӝоген Иегова кышномуртъёсты но нылъёсты вӧсь каронэз дугдытоз шуыса. Макем со буйгатӥз монэ!» (Роберта, Мексика).
Мар верамын Библиын азьпал улон сярысь? Малы оскыны луэ солы, мар гожтэмын Библиын? Кызьы Библиысь малпанъёс тӥледлы юрттыны быгато? Иеговалэн Адӟись-Ивортӥсьёсыз шумпотыса юрттозы тӥледлы та юанъёслы валэктонъёс шедьтыны. Вазиське соослы яке гожтэ курондэс jw.org сайтын.
a Нимъёс воштэмын.
b Иегова — со Инмарлэн нимыз (Улон-вылон 22:14; Потон 17:15; Судьяос 6:24). Учке «Кин со Иегова?» статьяез.
Тӥледлы тунсыко луоз, дыр
БИБЛИЫСЬ КУЛЭ ЛУИСЬ ДЫШЕТОНЪЁС
Луэ-а Инмарлэн эшез луыны?
Трос дауръёс ӵоже ини адямиослэн Инмар сярысь юанъёссы кылдыло. Соослэн Инмар сярысь тодэмзы потэ. Библия юрттыны быгатэ милемлы Инмарлэн эшез луыны. Со эшъяськон Инмарлэсь нимзэ тодон бордысен кутске.
