Ӵем дыръя Библиысь лыдпусъёсты шонерак валаны луэ, нош куддыръя соос мае ке мукетсэ возьмато. Лыдпуслэсь пуштроссэс валан понна, эскерыны луоз лыдӟоно люкетлэсь азьвыл но со бере гожтэм кылбуръёссэ. Учкомы, кыӵе пуштросэн куд-ог лыдпусъёс Библиын кутӥсько:

•   1 Огъя луон. Кылсярысь, Иисус Инмарлы аслаз дышетскисьёсыз сярысь вӧсяськиз: «Ваньмыз одӥг-огъя мед луозы, кызьы Тон, Атае, Мон бордын, Мон Тон бордын» (Иоанн 17:20, 21; Матфей 19:6).

•   2 Судын кык адӟисьёслэн ивортэмзы кыӵе ке ужлэсь зэм луэмзэ возьматэ (Кыкетӥ Закон 17:6). Адӟонэз яке ивортонэз кӧня ке пол веран возьматэ, со зэм луэ но одно ик быдэсмоз шуыса. Кылсярысь, Иосиф, фараонлэсь уйвӧтсэ валэктыкуз, вераз: «Фараонлы уйвӧт кык пол возьматскиз ке, со возьматэ ини, Инмарлэн кылыз зэм луэ» (Улон-вылон 41:32). Азьпалзэ ивортонъёсын «кык сюръёс» возьматыны быгато кык кивалтэтъёслэсь ӵош кивалтэмзэс. Кылсярысь, сыӵе валэктон сётэмын вал Данииллы, куке со Мидо-Персидской держава сярысь азьпалзэ ивортыса вераз (Даниил 8:20, 21; Усьтӥськон 13:11).

•   3 Куинь адӟисьёслэн ивортэмзы кыӵе ке ужлэсь зэм луэмзэ возьматэ. Озьы ик куинь пол веран мае ке юнматэ но пусъе, вылды (Иезекииль 21:27; Апостолъёслэн ужъёссы 10:9—16; Усьтӥськон 4:8; 8:13).

•   4 Возьматыны быгатэ мае ке, мар быдэсак быдэстэ аслэсьтыз ужпумзэ. Кылсярысь, «музъемлэн ньыль тӧлъёсыз» возьмато куашкатон вайись кужымъёсты, кудъёсыз пото музъемлэн ньыль пал сэрегъёсысьтыз, яке вань палъёсысьтыз, но быдэс музъем вылэ пельто (Усьтӥськон 7:1; 21:16; Исаия 11:12).

•   6 Та лыдпус одӥглы пичигес сизьымлэсь, кудӥз ӵем дыръя быдэс луэмез возьматэ. Соин ик куать возьматыны быгатэ быдэс яке тырбыдэс луымтэез, озьы ик со Инмарлэн тушмонъёсыныз герӟаськемын луыны быгатэ (1 Паралипоменон 20:6; Даниил 3:1; Усьтӥськон 13:18).

•   7 Ӵем дыръя возьматэ малэсь ке быдэсмемзэ яке быдэс луэмзэ. Кылсярысь, Инмар косӥз Израиль калыкез сизьым нунал ӵоже Иерихон кар котыртӥ ортчылыны, нош сизьыметӥ нуналаз та карез сизьым пол котыртыны косӥз (Иисус Навин 6:14). Библиын вань трос учыръёс, куке та лыдпус таӵе пуштросэн кутӥське (Левит 4:6; 25:8; 26:18; Псалтирь 118:164; Усьтӥськон 1:20; 13:1; 17:10). Куке Иисус Пётрлы вераз, аслэсьтыз вын-агайзэ сизьым пол ӧвӧл, нош «сизьымдонэз сизьым пол йылэтытозь» простить кароно шуыса, сизьымез кӧня ке пол веран возьматэ мае ке «котьку» лэсьтэмез (Матфей 18:21, 22).

•   10 Та лыдпус возьматыны быгатэ тыр луэмез яке мае ке огазеямез (Потон 34:28; Лука 19:13; Усьтӥськон 2:10).

•   12 Та лыдпус возьматэ, вылды, Инмарен пуктэм радлыкез, кудӥз котьма ласянь шонер луэ. Кылсярысь, адӟонын апостол Иоанн адӟиз инмысь городэз, кудӥз «дас кык инъет вылын сылэ, соос бордын Ыжпилэн дас кык апостолъёсызлэн нимъёссы гожтэмын» (Усьтӥськон 21:14; Улон-вылон 49:28). Лыдпусъёс, кудъёсыз дас кыклы люкисько, та выллем пуштросэн кутӥськыны быгато (Усьтӥськон 4:4; 7:4—8).

•   40 Та лыдпусэн герӟаськемын вал приговоръёс яке кылкутытонлэн дыръёсыз (Улон-вылон 7:4; Иезекииль 29:11, 12).

Лыдпусъёсты чаклан

 Библиын лыдпусъёсты мукет пуштросэн кутон пӧртэм луэ лыдпусъёсты чакланлэсь, кытчы пыре оскон, лыдпусъёслэн кыӵе ке кужымзы вань шуыса. Кылсярысь, иудей каббалистъёс Еврей Гожтэмъёсты нимысьтыз радлыкъя эскеризы. Соос букваосты лыдпусъёсын вошъязы но отысь лушкем пуштроссэ утчазы. Лыдпусъёсты чаклан — со одӥгез тунаськон-пелляськон амал, кудзэ Инмар адӟемпотостэм каре (Кыкетӥ Закон 18:10—12).