8-بۆلۈم
مەسىھنىڭ كېلىشى
دانىيال پەيغەمبەر بېشارەت بېرىپ، 500 يىلدىن كۆپرەك ۋاقىت ئۆتكەندىن كېيىن، خۇدانىڭ پەرىشتىسى جەبرائىل داۋۇت پادىشاھنىڭ ئەۋلادلىرىدىن بىرى بولغان مەريەم ئىسىملىك بىر قىزغا كۆرۈندى. جەبرائىل قىزغا: «سالام ساڭا، بۈيۈك ئىلتىپاتقا مۇيەسسەر بولغان قىز. يەھۋا سېنىڭ بىلەندۇر!»،— دەپ ئېيتتى (لۇقا 1:28). ئەمما، مەريەم چۆچۈپ قورقۇپ كەتتى. جەبرائىل نېمە مەقسەتتە شۇنداق سالام بەرگەن؟
پەرىشتە جەبرائىل مەريەمنىڭ مەسىھنى تۇغىدىغانلىقى ھەققىدە ئۇنىڭغا خەۋەر يەتكۈزگەن
جەبرائىل: «ئەي مەريەم قورقمىغىن، چۈنكى سەن خۇدانىڭ نەزىردە ئىلتىپات تاپتىڭ. مانا، سەن ھامىلدار بولۇپ، بىر ئوغۇل تۇغىسەن ۋە ئىسىمىنى ئەيسا قويىسەن. … يەھۋا خۇدا ئۇنىڭغا ئاتىسى داۋۇتنىڭ تەختىنى بېرىدۇ. ئۇ ياقۇپنىڭ جەمەتى ئۈستىدىن مەڭگۈگە پادىشاھلىق قىلىدۇ ۋە ئۇنىڭ پادىشاھلىقىنىڭ چېكى بولمايدۇ»،— دەپ مەريەمگە چۈشەندۈرگەن (لۇقا 1:30–33). بۇ نەقەدەر خۇشال قىلارلىق خەۋەر،— ھە! ئۇزۇن يىللار كۈتكەن «نەسىل»، يەنى مەسىھنى مەريەم تۇغقان ئىدى!
كېيىنكى يىلى، ئەيسا بەيتلەھەمدە تۇغۇلدى. شۇ كۈنى بىر پەرىشتە شۇ يەردىكى پادىچىلارغا: «قورقماڭلار! مەن سىلەرگە پۈتكۈل ئىنسانلارنى چەكسىز خۇشاللىققا چۆمدۈرىدىغان خەۋەرنى ئېلىپ كەلدىم. بۈگۈن داۋۇتنىڭ شەھىرىدە سىلەر ئۈچۈن بىر قۇتقۇزغۇچى — ھەزرىتى مەسىھ تۇغۇلدى» (لۇقا 2:10، 11). كېيىنچە، ئەيسانىڭ ئائىلىسىدىكىلەر ناسىرە شەھىرىگە قايتتى ۋە ئۇ شۇ يەردە چوڭ بولدى.
ئەيسا دەل مىلادى 29-يىلىدا، مەسىھ سۈپىتىدە مەيدانغا كېلىپ، خۇدانىڭ پەيغەمبەرلىك خىزمىتىنى قىلىشقا باشلىدى. ئۇ ئاشۇ چاغدا «تەخمىنەن ئوتتۇز ياشتا ئىدى» (لۇقا 3:23). نۇرغۇن كىشىلەر ئۇنىڭ خۇدا تەرىپىدىن ئەۋەتىلگەنلىكىنى كۆرۈپ يەتكەن. ئۇلار: «ئارىمىزدىن ئۇلۇغ بىر پەيغەمبەر چىقتى!»،— دېيىشكەن ئىدى (لۇقا 7:16، 17). بىراق، ئەيسا مەسىھ نېمىنى ئۆگەتكەن؟
ئەيسا پەيغەمبەر كىشىلەرنى خۇدانى سۆيۈپ، ئۇنىڭغا ئىبادەت قىلىشقا ئۆگەتكەن: ئۇ: «خۇدايىڭ بولغان يەھۋا يىگانە يەھۋادۇر. خۇدايىڭ يەھۋانى پۈتۈن قەلبىڭ، پۈتۈن جېنىڭ، پۈتۈن زېھنىڭ ۋە پۈتۈن كۈچۈڭ بىلەن سۆيگىن»،— دەپ ئېيتقان (ماركۇس 12:29، 30). ئۇ يەنە: «خۇدايىڭ يەھۋاغا سەجدە قىلغىن ۋە پەقەت ئۇنىڭغا مۇقەددەس خىزمەت قىلغىن!»،— دېگەنىدى.— لۇقا 4:8.
ئەيسا پەيغەمبەر كىشىلەرنى بىر-بىرىنى سۆيۈشكە ئۈندىگەن: ئۇ: «قوشناڭنى ئۆزۈڭنى سۆيگەندەك سۆي»،— دېگەن (ماركۇس 12:31). ھەمدە، ئۇ: «باشقىلارنىڭ سىلەرگە قانداق مۇئامىلە قىلىشىنى خالىساڭلار، سىلەرمۇ ئۇلارغا شۇنداق مۇئامىلە قىلىڭلار. چۈنكى تەۋرات قانۇنى ۋە پەيغەمبەرلەرنىڭ تەلىملىرى بۇدۇر»،— دەپ ئېنىق كۆرسەتكەن.— مەتتا 7:12.
ئەيسا مەسىھ قىزغىنلىق بىلەن خۇدا پادىشاھلىقى ھەققىدە كىشىلەرگە ۋەز ئېيتقان: ئۇ: «باشقا شەھەرلەردىمۇ خۇدا پادىشاھلىقى توغرىسىدىكى خۇش خەۋەرنى جاكارلىشىم كېرەك. چۈنكى مەن بۇنىڭ ئۈچۈن ئەۋەتىلدىم»،— دېگەن ئىدى (لۇقا 4:43). نېمە ئۈچۈن خۇدا پادىشاھلىقى شۇنچە مۇھىم؟
مۇقەددەس يازمىلار، خۇدا پادىشاھلىقى بولسا يەر يۈزى ئۈستىدىن ھۆكۈمرانلىق يۈرگۈزىدىغان ئاسماندىكى ساماۋى ھۆكۈمەت، دەپ تەلىم بېرىدۇ. ئاشۇ مەسىھ سۈپىتىدە كەلگەن ئەيسا، پادىشاھلىقنىڭ خۇدا تەرىپدىن تەيىنلەنگەن پادىشاھىدۇر. دانىيال پەيغەمبەر، خۇدانىڭ ئاسماندا مەسىھكە «ھۆكۈمرانلىق، ئۇلۇغلۇق ۋە پادىشاھلىق» بەرگەنلىكىنى ئالدىن كۆرگەن ئىدى (دانىيال 7:14). شۇ پادىشاھلىق جەننەتنى پۈتكۈل يەر يۈزىگە كېڭەيتىپ، خۇدانىڭ خىزمەتچىلىرىنى مەڭگۈلۈك ھاياتلىق بىلەن مۇكاپاتلايدۇ. بۇنىڭدىنمۇ قالتىس خۇش خەۋەر بارمۇ؟
بۇلارغىمۇ قىزىقىشىڭىز مۇمكىن
مۇقەددەس كىتاب ئۇ، ئاشكارا قىلغان خەۋەر
