23-بۆلەك
خۇش خەۋەرنىڭ تارقىلىشى
پاۋلۇسنىڭ خۇش خەۋەر تارقىتىش ئۈچۈن قورۇقلۇق ۋە دېڭىز سەپىرى قىلىشى
پاۋلۇس ئۇ، ئەيسانىڭ ئەگەشكۈچىسى بولغاندىن كېيىن، خۇدا پادىشاھلىقى توغرىسىدا قىزغىن ئىشتىياق بىلەن خۇش خەۋەر ئېيتتى. ئىلگىرى ئۇ ئۆزى خۇش خەۋەر ئېيتقۇچىلارغا قارشى تۇرغان، مانا ئەمدى ئۇ دائىم قاتتىق قارشىلىققا دۇچ كەلدى. بۇ ھارماس-تالماس ئەلچى، ئاشۇ پادىشاھلىق خۇدانىڭ ئىنسانىيەت ئۈچۈن ئىرادە قىلغان ئەسلى مەقسىتىنى ئەمەلگە ئاشۇرىدىغانلىقى توغرىسىدىكى خۇش خەۋەرنى تارقىتىش ئۈچۈن بىر نەچچە قېتىم ئۇزۇن سەپەر قىلدى.
ئۇنىڭ بىرىنچى قېتىملىق سەپىرىدە، پاۋلۇس لىسترا شەھىرىدە بىر تۇغما پالەچ كىشىنى ساقايتتى. بۇ ئىشلارنى كۆرگەن كۆپچىلىك، پاۋلۇس ۋە ئۇنىڭ بىلەن بىرگە سەپەر قىلغان بارنابانى ئىلاھلار دەپ ۋارقىرىشىپ كەتتى. ھەمدە كۆپچىلىك ئۇلارغا ئاتاپ قۇربانلىق قىلماقچى بولغىنىدا، ئۇلار ئىككىسى كىشىلەرنى توسۇپ قالالمىغىلى تاسلا قالدى. لېكىن، پاۋلۇسقا قارشى تۇرغۇچىلارنىڭ قۇترىتىشى بىلەن، كېيىن ئاشۇ كىشىلەر پاۋلۇسنى تاكى ئۆلدى دەپ ئويلىغىچە چالما-كېسەك قىلىشتى ۋە ئاخىردا ئۇنى تاشلاپ كېتىپ قېلىشقان ئىدى. پاۋلۇس ئۇلارنىڭ زىيانكەشلىكىدىن قۇتۇلۇپ ساق قالدى ۋە شەھەرگە قايتىپ كىرىپ، كىشىنى ئىلھاملاندۇرىدىغان سۆزلەر بىلەن ئېتىقادچىلارنىڭ ئېتىقادىنى كۈچەيتكەن ئىدى.
بەزى ئەيسانىڭ ئەگەشكۈچىلىرى بولغان يەھۇدىي ئېتىقادچىلار، يەھۇدىي ئەمەس ئېتىقادچىلارمۇ، قەدىمكى زاماندا خۇدانىڭ ئىسرائىل خەلقى ئۈچۈن چۈشۈرگەن بەزى بۇيرۇقلىرىغا ئەمەل قىلىشى كېرەك، دەپ تالاش-تارتىش قىلىشتى. پاۋلۇس يېرۇسالېمغا بېرىپ، ئۇ يەردىكى ئەلچىلەر ۋە جامائەتچىلىكنىڭ يېتەكچىلىرىگە مۇشۇ مەسىلىنى يەتكۈزدى. مۇقەددەس يازمىلارنى ئىنچىكە مۇلاھىزە قىلغاندىن كېيىن، خۇدانىڭ مۇقەددەس روھىنىڭ يول باشچىلىقى بىلەن ئۇلار جامائەتچىلىككە خەت يېزىپ بۇتپەرەسلىكتىن، بوغۇپ ئۆلتۈرۈلگەن ھايۋاننىڭ گۆشىنى ۋە قاننى يېيىشتىن ھەم جىنسىي ئەخلاقسىزلىقلاردىن خالىي بولۇش توغرىسىدا ئۇلارنى ئاگاھلاندۇردى. مۇشۇلار ‹زۆرۈر بۇيرۇقلار› دۇر. بىراق، ئۇ زۆرۈر بۇيرۇقلارغا بويسۇنۇش، قەدىمكى زاماندا خۇدانىڭ ئىسرائىل خەلقى ئۈچۈن چۈشۈرگەن بۇيرۇقلىرىغا چوقۇم ئەمەل قىلىش دېگەنلىك ئەمەس.—ئەلچىلەر 15:28، 29.
پاۋلۇس ئىككىنچى قېتىملىق خۇش خەۋەر تارقىتىش سەپىرىدە، بېرىيا شەھىرىگە يەنى بۈگۈنكى كۈندىكى گرېتسىيە زېمىنىغا بارغان ئىدى. ئۇ يەردە ياشايدىغان يەھۇدىيلار خۇش خەۋەرنى قىزىقىپ ئاڭلىدى ۋە پاۋلۇسنىڭ ئېيتقانلىرىنىڭ توغرا-خاتالىقنى بىلىش ئۈچۈن ھەركۈنى مۇقەددەس يازمىلارنى ئىزدىنىپ ئۆگەندى. ئەمما، قارشى تۇرغۇچىلار يەنە ئۇنى ئۇ شەھەردىن ئايرىلىشقا مەجبۇر قىلغاچ، ئۇ ئافىناغا باردى. ئۇ يەردىكى بىلىملىك كىشىلەرنىڭ ئالدىدا، پاۋلۇس ئۇستىلىق ۋە پەم-پاراسەتلىك بىلەن پاساھەتلىك سۆزلەرنى قىلىپ، كىشىنى قايىل قىلىدىغان نۇتۇق سۆزلىگەن ئىدى.
پاۋلۇس ئۈچىنچى قېتىملىق سەپىرىدىن كېيىن، يېرۇسالېمغا بارغان ئىدى. ئۇ ئىبادەتخانىغا كىرگىنىدە، بەزى يەھۇدىيلار غەۋغا كۆتۈرۈپ ئۇنى ئۆلتۈرمەكچى بولۇشتى. رىملىق لەشكەرلەر ئارىغا چۈشۈشتى ۋە ئۇلار پاۋلۇسنى سوراق قىلدى. كېيىنچە، رىم پۇقراسى سالاھىيىتىدە، پاۋلۇس رىملىق ۋالىي فېلىكسنىڭ ئالدىدا ئۆزىنى ئاقلىدى. يەھۇدىيلار پاۋلۇس ئۈستىدىن قىلغان شىكايىتى ئۈچۈن ھېچقانداق دەلىل-ئىسپات كۆرسىتەلمىگەن ئىدى. يەنە بىر ۋالىي فېستۇسنىڭ ئۆزىنى يەھۇدىيلارغا تاپشۇرۇپ بېرىشىدىن ساقلىنىش ئۈچۈن پاۋلۇس: «قەيسەرگە ئەرز قىلۇرمەن»، دېدى. فېستۇس: «قەيسەرنىڭ ئالدىغا بارۇرسەن»، دەپ جاۋاب بەردى.—ئەلچىلەر 25:11، 12.
پاۋلۇس سوت قىلىنىش ئۈچۈن سۇ يولى ئارقىلىق ئىتالىيەگە يولغا سېلىندى. دېڭىزدا كېمە ھادىسىگە ئۇچرىغاچقا، ئۇ ئامالسىز قىش پەسلىنى مالتا ئارىلىدا ئۆتكۈزدى. ئەڭ ئاخىرى، ئۇ رىمغا يېتىپ كېلىپ، ئىجارىگە ئالغان ئۆيىدە ئىككى يىل تۇردى. گەرچە ئۇ كۆزەتچى لەشكەرنىڭ نەزەربەنتى ئاستىدا بولسىمۇ، ئۇنىڭ بىلەن كۆرۈشۈشكە كەلگەن ھەممە كىشىلەرگە قىزغىن ئىشتىياق بىلەن خۇدا پادىشاھلىقى توغرىسىدا خۇش خەۋەر ئېيتىشنى داۋاملاشتۇرغان ئىدى.
—ئەلچىلەر 11:22–28:31-ئايەتلەرگە ئاساسەن.
