Oco. Tu pondola oku sanga Vembimbiliya ovovangi ocili a lekisa okuti, kuli Suku. Embimbiliya li tu vetiya oku lekisa ekolelo ku Suku okuti, ka tu tava lika vonumbi kueci atavo a longisa, pole, poku talavaya “luloño” wetu “woku sokolola.” (Va Roma 12:1; 1 Yoano 5:20 etosi.) Kũlĩhĩsa ovisimĩlo vi kuãimo via kunamẽla Vembimbiliya:

•   Omo okuti ovailu longongo via sokiyiwa ciwa kuenda muli oviendalomuenyo, uvangi umue u lekisa okuti, kuli Ululiki umue. Embimbiliya liti: “Ocili okuti, onjo yosi ya tungiwa la umue, pole, Ululiki wovina viosi Suku.” (Va Heveru 3:4) Ndaño okuti ocisimĩlo eci ci molẽha ndu okuti ca leluka calua, omanu valua va loñoloha, va ci tenda okuti, cocili. a

•   Etu tumanu, tua lulikiwa lonjongole yoku kuata elomboloko kuenda ocimãho comuenyo. Pole, ndaño tua tẽlisa ale olonjongole viosi vietimba, onjongole yaco lopo yamamako. Eci ci panga onepa kueci Embimbiliya li tukula okuti, “enyona liukũlĩhĩso wa Suku,” muna mua kongela onjongole yoku kũlĩha Suku, loku u fendela. (Mateo 5:3; Esituluilo 4:11) Oku kuata enyona liukũlĩhĩso waco, ka ku lekisa lika okuti kuli Suku, pole, ku lekisavo okuti eye Ululiki ukuacisola kuenda o yongola okuti tu tẽlisa onjongole yaco.—Mateo 4:4.

•   Ovitumasuku via lomboluiwa ciwa Vembimbiliya, via sonehiwa osimbu ka via pitile kuenda via tẽlisiwa lonjila ya suapo kovina viosi. Eci ceca uvangi wokuti, via tunda lika komunu umue wa velapo calua.—2 Petulu 1:21.

•   Asonehi Vembimbiliya va kuatele ukũlĩhĩso wa suapo watiamẽla kuloño okuti, omanu vo koloneke viavo, ka va tẽlele oku kuata elomboloko liaco. Kosimbu omanu valua va tavele kocisimĩlo cokuti ongongo ya kunamẽla kilu liocinyama cimue, ndeci: Konjamba, konguluve, ale kongombe yimue. Pole Embimbiliya lia popia ale okuti, Suku “o nyoñamisila ilu lieve oku ka kuli cimue.” (Yovi 26:7) Cimuamue haico, Embimbiliya li tukula lonjila ya suapo okuti, ongongo yi kasi ‘ndombunje.’ (Isaya 40:22) Valua va tava okuti, elomboluilo lia suapo liukũlĩhĩso waco wamako lieli okuti, asonehi Vembimbiliya, va tambula olonumbi viaco ku Suku.

•   Embimbiliya olio lika li tambulula apulilo ka a lelukile. Ekambo liatambululo a suapo kapulilo aco, ci kokela omunu umue oku sima okuti, ka kuli Suku. Ndeci: Nda Suku ukuacisola, haeye ukuonene wosi, momo lie ku kasilili evĩho lialua kuenda ohali voluali? Momo lie olonjanja vialua atavo a vetiyila omanu oku linga evĩho okuti ka va lingi eci ciwa?—Tito 1:16.