IVALUKA hẽ esunga lieci ungelo umue wa Suku a lingila Satana Eliapu?— Ca lingiwa omo liocipululu caye lonjongole yoku fendeliwa kuenje wa ñualelapo Suku. Anga hẽ ovangelo vakuavo va kuama Satana?— Oco, vo kuama. Embimbiliya li va tukula okuti, ‘ovangelo va Satana,’ ale olondele.—Esituluilo 12:9.

Anga hẽ ovangelo vaco vavĩ, ale olondele, va tava okuti kuli Suku?— ‘Olondele vi tava okuti kuli Suku,’ oco Embimbiliya li popia. (Tiago 2:19) Pole, cilo vi kasi lusumba. Momo via kũlĩha okuti Suku o ka vi kangisa omo liovina vĩvi via linga. Ovina vipi vĩvi via linga?—

Embimbiliya li popia okuti ovangelo vaco va siapo ovailu, kuna kua kala ocitumãlo cavo coku kala kuenje veya palo posi oku kala ndomanu. Ovo va linga ovina viaco omo okuti va yonguile oku lipekela lakãi va posoka va palo posi. (Efetikilo 6:1, 2; Yuda 6) Nye wa kũlĩha catiamẽla koku lipekela?—

Oku lipekela, ku lomboloka eci ulume lukãi va litokeka lonjila yimue yilikasi. Noke vimo lia ina mu fetika oku kulila oñaña yimue. Pole, ka ca sungulukile okuti ovangelo va lipekela. Suku wa popia okuti ulume kuenda ukãi va kuele, ovo lika citava oku lipekela. Kuenje nda va cita oñaña yimue, va sukila oku yi tata.

Noke liovangelo oku lipongolola ndatimba omanu kuenda oku lipekela lakãi palo posi, omãla ovo va cita va kula kuenda va linga ovindululu. Ovo va kala alume vakuongangala kuenda va enda oku lemẽha omanu. Kuenje Suku wa nena Etande limue Linene okuti andunde alua ovava oco a nyõle ovindululu kuenda omanu vosi vakuevĩho. Pole, eye wa tuma okuti Noha o tunga ocimbaluku cimue cinene, oco a popele omanu vatito va enda oku linga ovina viwa. Ulongisi wa Velapo wa popia okuti, ci kuete esilivilo oku ivaluka ovina via pita Ketande Linene.—Efetikilo 6:3, 4, 13, 14; Luka 17:26, 27.

Eci kueya Etande Linene, wa kũlĩha eci ca pita lovangelo vavĩ?— Ovo va siapo atimba omanu kuenje va lipongolola vali ndovangelo loku tiukila kilu. Pole, ovo ka va ponduile vali oku kala ovangelo va Suku, kuenje va linga ovangelo va Satana, ale olondele. Nye ca pita lomãla vavo ovindululu?— Ovo va fa Vetande Linene. Omanu vakuavo ka va pokuile ku Suku, va favo.

Oku upisa Ketande Linene, Suku ka ecelela vali okuti olondele vi lipongolola ndomanu. Ka tu pondola oku mola olondele, pole, vi seteka omanu oku linga ovina vĩvi. Koloneke vilo, via siata oku linga calua ovina vĩvi okuti kosimbu ci sule. Momo va tundisiwa kovailu kuenje va imbiwa palo posi.

Wa kũlĩha esunga lieci ka tu muila olondele?— Momo ka va letiwe. Pole, tu kuete ekolelo liokuti, ovo va kasiko muẽle. Embimbiliya li popia okuti Satana o kasi oku ‘yapuisa omanu vo kilu lieve liosi’ kuenda olondele vi kasi oku u kuatisa.—Esituluilo 12:9, 12.

Anga hẽ Eliapu kuenda olondele viaye va pondolavo oku tu yapuisa ale oku tu kemba?— Nda ka tua kuatele utate, va pondola oku ci linga. Pole, ka tu sukila oku kuata usumba. Ulongisi wa Velapo wa popia hati: ‘Eliapu ka li kuete unene lame.’ Eci ci lomboloka okuti, nda tuamamako oku kala akamba va Suku, eye o ka tu teyuila Keliapu kuenda kolondele.—Yoano 14:30.

Ci kuete esilivilo oku kũlĩha ovina vĩvi olondele vi yongola okuti ovio tu linga. Sokolola kovina vi kuãimo ndeci: Ovina vipi vĩvi olondele via enda oku linga eci via kala palo posi?— Osimbu Etande Linene ka lieyile, ovio via lipekela lakãi okuti, ocina ka ca sungulukile kovangelo oku ci linga. Koloneke vilo olondele vi sanjuka nda omanu ka va pokola kovihandeleko via Suku viatiamẽla koku lipekela. Ngecelele oku ku linga epulilo limue: Helie citava lika oku lipekela?— Ocili muẽle, olohueli lika.

Koloneke vilo, otuakuenje lotuafeko, va siata oku lipekela, pole, eci ka ca sungulukile. Embimbilia li tukula ‘ocimatamata cuyali’ culume okuti, osõlole. (Ovisila 15:1-3) Ocimatamata cuyali cukãi ci tukuiwa okuti, etalamẽlo liukãi. Yehova wa lulika olonepa evi vietimba locimãho cimue cilikasi okuti, ulume lukãi va kuela, ovo lika citava oku lipekela. Olondele vi sanjuka eci omanu va linga ovina vi pisiwa la Yehova. Ndeci, ovo va sole eci kakuenje la kafeko va papalela kovimatamata viukuavo viuyali. Ka tu yongola oku sanjuisa olondele, ale haicoko?—

Kuli vali ocina cimue olondele vi sole, pole, Yehova wa ci suvuka. Ove wa kũlĩha ocina caco?— Ungangala. (Olosamo 11:5) Ungangala u lomboloka eci omanu va linga evĩho kuenda oku lemẽha vakuavo ocipango. Ivaluka okuti, eci oco ovindululu omãla vovangelo va enda oku linga.

Olondele vi solevo oku saluisa omanu. Pamue vi liviaviala oku kala omanu va fa. Ovo va setukulavo ondaka yomunu wa fa. Lonjila eyi, olondele vi yapuisa omanu valua loku va vetiya oku sima okuti, vana va fa va kasi lomuenyo kuenda va pondola oku vangula la vana ka va file. Olondele vi lingisa okuti valua va tava kovilũlu.

Omo liaco, tu sukila oku kuata utate oco Satana lolondele viaye ka va ka tu yapuise. Embimbiliya li lungula: “Satana o li luvikiya eye muẽle ndungelo wocinyi. Oloñuatisi viaye vi li luvikiyavo.” (2 Va Korindo 11:14, 15) Pole, olondele vĩvi. Tu tala ndomo ovio vi seteka oku tu sokisa lavio.

Kovina vipi omanu va siata oku tala ungangala walua, onjila yoku lipekela ka ya sungulukile, ovolandu atiamẽla kaspiritu kuenda kovilũlu?— Siti vovipama vimue vio televisãu, volofilme, volomapalo vio komputador, volovideo game, vo Internet kuenda valivulu ovolandu ovinjembe? Poku tanga, ale oku tala ovina viaco, tu pamisa vali ukamba wetu la Suku, ale Leliapu lolondele viaye? Nye o sima?—

Helie ove o sima okuti o yongola oco tu tale loku yevelela ovina evi vĩvi?— Oco muẽle, Satana lolondele viaye. Kuenje nye ove lame tu sukila oku linga?— Tu sukila oku tanga, oku yevelela loku tala ovina viwa, vi tu kuatisa oku vumba Yehova. O tẽla hẽ oku ivaluka vimue pokati kovina viwa tu pondola oku linga?—

Nda tua linga ovina via sunguluka, ka tu ka sukila oku kuatela usumba olondele. Yesu o kuete unene wa velapo, ovo va sule kuenda vo kuetele usumba. Etekele limue olondele via kalukila Yesu hati: “Anga weya oku tu nyõla?” (Marko 1:24) Eci yi pitĩlapo otembo ya Yesu yoku kundula Satana lolondele viaye, ci ka kala ciwa, ale sio?— Osimbu tu kevelela, kolela okuti Yesu o ka tu teyuila kolondele, nda tua linga akamba vaye kuenda va Isiaye wo kilu.