Akundi Vosi Vusoma wa Soliwi:

SOKOLOLA ndu okuti o kasi lepata lio Betele ko Brooklyn Votãlo komẽle, 2 ya Mbalavipembe kunyamo wo 1914. Wa tumãla pomangu wa siata oku kala kelivala liongau, kuenje o lavoka Manji C. T. Russell. Vocipikipiki epito li yuluka kuenje Manji Russell iñila. Eye o talama naito ndeci a siata oku linga kuenda o lama epata lio Betele lesanju hati: “Kalungi.” Pole, osimbu ka tumalẽle, o pandula olonjanja vimue noke eca esapulo limue liesanju liokuti: “Otembo ya Vakualofeka ya Sulila Kuenda Olosoma Viavo Via Kuata Ale Oloneke Viavo!” Lesanju ove o komõha, momo o kasi oku lavoka epuluvi liaco vokuenda kuotembo yalua! Kumosi lavamanji vakuavo vepata lio Betele, u tambula lesanju esapulo liaco loku pandula.

 Pa pita ale anyamo alua tunde eci Manji Russell a eca esapulo liaco liesanju. Tunde kotembo yaco, nye Usoma wa linga? Wa linga ovina vialua! Lekuatiso Liusoma, Yehova wa siata oku mioñolola kuenda oku pindisa afendeli vaye, oku upisa ketendelo limue litito liakundi kunyamo wo 1914, toke koloneke vilo okuti etendelo liaco lipanda 8 kolohuluwa viomanu. Ove hẽ ivaluka ekuatiso wa tambula kepindiso liaco?

Koloneke vilo tua siata oku yeva vamanji va popia vati: “Ekãlu lia Yehova li kasi oku enda!” Ovina viaco vi kasi oku tẽlisiwa muẽle. Omo liaco, tunde kunyamo wo 1914 ocisoko ca Yehova co kilu, ci kasi oku amamako kuenje nda wa tanga lutate elivulu lilo o limbuka ulandu waco. Omo okuti kosimbu akundi Vusoma va kuatele onjongole yoku kundila olondaka viwa voluali luosi, poku linga upange waco va enda oku kuama olonjila via litepa ndeci: Oku soneha ovikanda via sapulo, oku ñuala ñuala volokololo lesapulo limue, oku lekisa olofilme, olopapelo mua sonehiwa esapulo va kundila omanu, olongalamafone, ovingungu viasapulo kuenda o Internet.

Omo liasumũlũho a Yehova, cilo tua siata oku sandeka alivulu a lombolola ovolandu Embimbiliya kueci ci pitahãla 670 kalimi kuenda tu eca alivulu aco komanu vosi ndaño ka va eci ombanjaile. Vamanji valua va lieca olumue oco va kuatise koku tunga Olonjango Viusoma, Olonjango vioku lingila Olohongele Vinene, Olobetele kolofeka vina okuti ca leluka oku sanga olombongo, kuenda kolofeka vina okuti ka ca lelukile oku vi sanga. Eci ku pita ocilunga cimue, vamanji vosi va siata oku lekisa ocisola poku enda lonjanga kovitumãlo viaco oco va ece ekuatiso. Poku ci linga ceca uvangi wokuti va koleliwa “koloneke viohali.”​—Olosap. 17:17.

Olonjanja vimue asongui vatavo esanda kuenda ovanyãli vakuavo, va siata oku tu lambalala poku tumbika ‘ovihandeleko vimue.’ Pole, ekolelo lietu lia siata oku pamisiwa poku limbuka okuti alikolisilo avo oku tu lambalala a kasi oku tu kuatisa oku amamako ‘lolondaka viwa.’​—Osa. 94:20; Va Fil. 1:12.

Tu kuete esumũlũho lioku likongela lene, vu panga onepa ku “vakuanjo.” Ivaluki okuti vosi yene tu vu kueteli ocisola. Omo liaco, tu likutilila oco elivulu lilo li ku kuatisi oku amamako oku sanjukila ocipiñalo cene cespiritu okuti kosimbu ci sule.​—Mat. 24:45.

Tambuli ovilamo vietu,

Vamanjene,

Osungu Yolombangi Via Yehova