Ocitangi Condonge Yimue
Petulu o yevite esakalalo pomangu a tumãla omo liosapi ulongisi waye a sovola. Ulongisi waye, ukãi una eye a sumbila, wa mala oku lombolola ndomo Charles Darwin lelongiso liaye liokuti ovina via tukuluka ño via vokiyiwa kukũlĩhĩso wuloño kuenda via yovola omanu koku tava kovihilahila. Eye o pinga kolondonge oco vi popie ovisimĩlo viavo viatiamẽla kondaka yaco.
Petulu o liyaka locitangi cimue ka ca lelukile. Olonjali viaye vio longisa okuti, Suku wa lulika ongongo loviendalomuenyo viosi vi kasimo. Ovio vio sapuila okuti, ulandu Wembimbiliya watiamẽla koku lulika, wocili kuenda elongiso liokuti ovina via tukuluka ño, ocisimĩlo cimue lika—ale ka kuli uvangi waco. Ulongisi kuenda olonjali via Petulu vi yonguila eci ciwa kokuaye. Pole, Petulu o sukila oku tava kulie?
Anyamo osi, ovitangi ndevi via siata oku pita kolosikola voluali luosi. Petulu kuenda vakuavo va tangela kumosi, nye va sukilile oku linga? Ku tava hẽ okuti, ovo muẽle va sukila oku nõla onjila va kuama catiamẽla kondaka yaco? Ovo va sukila oku konomuisa ovovangi a lekisa okuti ovina via tukuluka ño kuenda ana a situlula okuti, ovina via lulikiwa kuenje va sokisa ovovangi aco, oco va nõle kueci va tava.
Embimbiliya li lungula oku yuvula oku tava vupeke kueci vakuetu va longisa. Usonehi umue Wembimbiliya wa popia hati: “U wa kamba olondunge o tava ño viosi, u wa lunguka o kũlĩhisa oku a enda.” (Olosapo 14:15) Embimbiliya li vetiya Akristão oku talavaya ciwa ‘luloño wavo woku sokolola’ kuenda oku konomuisa nda eci vakuavo va va longisa cocili.—Va Roma 12:1, 2.
Ombrochura yilo, ka ya pangiwile locimãho cokuti ovimunga vietavo vi yongola okuti elongiso lioku lulikiwa li longisiwa kolosikola. Ocimãho cayo oku konomuisa ovina vi popiwa la vana va longisa okuti omuenyo wa tukuluka ño kuenda va popia okuti, ulandu Wembimbiliya woku lulika wuhembi.
Tu ka tiamisila utima koselula okuti, oyo ono yomuenyo. O ka kuata epuluvi lioku kũlĩhĩsa ovovangi a komõhisa atiamẽla konjila ndomo oloselula vi kasi kuenda o lalekiwa oku konomuisa ovisimĩlo kua kunamẽla elongiso liokuti ovina via tukuluka ño.
Vosi yetu tu pondola oku liyaka lepulilo liokuti: Omuenyo wa lulikiwa, ale wa tukuluka ño? Citava okuti, wa sokoluile ale kondaka yaco. Ombrochura yilo, yi ka lekisa ovovangi amue a kuatisa omanu valua oku tava okuti, omuenyo wa lulikiwa.
