1, 2. (a) Ombanjaile yipi yi kuete esilivilo lia velapo kokuove? (b) Momo lie ocisembi oco ombanjaile ya velapo ya Suku?

OMBANJAILE yipi ya velapo wa tambuile? Ombanjaile ka yi sukila okuti yi tĩla calua oco yi kuate esilivilo kokuove. Nda ombanjaile wa tambula yi ku nenela esanju, ale yi ku kuatisa, ci ku vetiya oku eca olopandu.

² Ndaño okuti Suku wa siata oku tu ĩha olombanjaile vialua, pole kuli ombanjaile yimue tu sukila okuti ovina vikuavo vi sule. Ombanjaile yaco ya velapo oyo Suku a eca komanu. Vocipama cilo tu lilongisa okuti, Yehova wa tuma omõlaye Yesu Kristu palo posi oco tu kuate omuenyo ko pui. (Tanga Mateo 20:28.) Omo okuti Yehova wa tuma Yesu palo posi ndocisembi, wa lekisa okuti o tu kuetele ocisola.

3. Momo lie omanu va siatela oku fa?

³ Ocisembi onjila yimue Yehova a kuama oco a yovole omanu kekandu kuenda kolofa. (Va Efeso 1:7) Oco tu kuate elomboloko lieci tu sukilila ocisembi, tu sukila oku kũlĩha ovina via pita vocumbo Cedene vokuenda kuanyamo alua. Olonjali vietu viatete okuti Adama la Heva via linga ekandu. Omo okuti via lueya, via fa. Etu tua siatavo oku fa omo liekandu tua piñala kokuavo.—Tala Etosi 9 kesulilo lielivulu lilo.

4. Helie wa kala Adama, kuenda ekalo lipi a kuata?

⁴ Eci Yehova a lulika ulume watete Adama, wa ecele  kokuaye ocina cimue ci kuete esilivilo lia velapo. Yehova wa ecele kokuaye omuenyo wa lipua. Adama wa lipuile kovisimĩlo kuenda ketimba. Eye wa laikele oku kala komuenyo okuti ka vela, ka kuka, kuenda ka fi.Omo okuti Yehova eye wa lulika Adama, wa kala nda isia kokuaye. (Luka 3:38) Yehova wa enda oku sapela la Adama olonjanja viosi. Eye wo sapuilile ovina a sukilile oku linga, kuenda wa ecele kokuaye upange umue u nena esanju.—Efetikilo 1:28-30; 2:16, 17.

5. Olondaka Viembimbiliya viokuti Adama wa lulikiwa “lesetahãlo lia Suku” vi lomboloka nye?

⁵ Adama wa lulikiwa ‘lesetahãlo lia Suku.’ (Efetikilo 1:27) Yehova Suku wa ecele kokuaye ovituwa ndevi Viaye, oku kongelamo ocisola, olondunge, esunga, kuenda unene. Eye wa ecelevo ku Adama elianjo. Pole, Adama ka kalele ndomakina yi linga lika ovina via sokiyiwa. Momo Suku wo lulikile lelianjo lioku nõla eci ciwa ale ceci cĩvi. Nda wa nõlelepo oku pokola ku Suku, nda wa kala otembo ka yi pui Voluali luokaliye palo posi.

6. Nye Adama a pumba eci a liwekapo oku pokola ku Suku? Ekandu liaco lia tu sambukila ndati?

⁶ Eci Adama a liwekapo oku pokola ku Suku, wa pisiwa leyambulo liolofa. Eye wa pumba ukamba ulikasi a kuatele la Yehova, omuenyo wa lipua, kuenda Ocumbo celau muna a kala. (Efetikilo 3:17-19) Omo okuti Adama la Heva va nõlapo oku tomba Suku, ka va kuatele vali elavoko. Omo liesino Adama a lekisa, “ekandu lia iñila voluali omo liomunu umosi kuenda oku fa omo liekandu kuenje oku fa kua li sanduila komanu vosi momo vosi va linga ekandu.” (Va Roma 5:12) Eci Adama a lueya, wa ‘lilandisa’ eye muẽle, kuenje tua linga apika vekandu kuenda volofa. (Va Roma 7:14) Anga hẽ tu kuete elavoko? Tu kuete.

7, 8. Ocisembi ci lomboloka nye?

 ⁷ Ocisembi ci lomboloka nye? Vocisembi mua kongela ovina vivali. Catete, ocisembi ondando yi fetiwa oco omunu umue a yovuiwe, ale oku landa vali ocina cimue ca landisiwile. Cavali, ocisembi ondando yi fetiwa, ale ofeto yondando yocina cimue.

⁸ Ka kuli omunu nda wa tẽla oku feta ovina Adama a nyõla eci a linga ekandu, kuenje wa tu nenela olofa. Pole, Yehova wa linga esokiyo lioku tu yovola kekandu kuenda kolofa. Omo liaco, tu konomuisi ndomo ocisembi ca sokiyiwa kuenda ndomo ci pondola oku tu kuatisa.

9. Ocisembi ca sukilile oku fetiwa ndati?

⁹ Lomue pokati ketu nda wa tẽla oku feta ocisembi comuenyo wa lipua Adama a pumba. Momo lie? Momo vosi yetu ka tua lipuile. (Osamo 49:7, 8) Ocisembi ca sukilile oku fetiwa lomunu ukuavo wa lipua. Eli olio esunga lieci ci tukuiwila hati, ‘ocisembi coku yovola.’ (1 Timoteo 2:6) Ocisembi ci kuete esilivilo limuamue lomuenyo Adama a pumba.

10. Yehova wa sokiya ndati ocisembi?

¹⁰ Yehova wa sokiya ndati ocisembi? Yehova wa tumile palo posi Omõlaye wa soliwa calua. Omõla waco Yesu okuti, eye a lulika tete. (1 Yoano 4:9, 10) Yesu wa lekisa onjongole yoku sia Isiaye kuenda ocitumãlo caye kilu. (Va Filipoi 2:7) Yehova wa sondolola Yesu wa kala kilu, kuenje wa citiwila palo posi ndomunu wa lipua okuti ka kuatele ekandu.—Luka 1:35.

11. Ulume umosi nda wa tẽla oku yovola ndati omanu vosi?

¹¹ Ulume watete Adama, wa pumbisa omanu vosi omuenyo wa lipua  eci a liwekapo oku pokola ku Yehova. Citava hẽ okuti ulume ukuavo nda wa tẽla oku malako olofa komãla vosi va Adama? Citava. (Tanga Va Roma 5:19.) Ndaño okuti Yesu lalimue eteke a lingile ekandu, pole wa eca omuenyo waye wa lipua ndocisembi. (1 Va Korindo 15:45) Omuenyo waye wa lipua wa sokiyiwila oku malako olofa komãla vosi va Adama.—1 Va Korindo 15:21, 22.

12. Momo lie Yesu a talela ohali yalua?

¹² Embimbiliya li lombolola ohali Yesu a tala osimbu ka file. Eye wa tipuiwa, wa valeliwa kuti, kuenda wa talisiwa ohali yalua toke kolofa. (Yoano 19:1, 16-18, 30) Momo lie Yesu a talisiwila ohali yalua? Momo Satana wa popele hati, lomue omunu o pondola oku lekisa ekolelo ku Suku nda o talisiwa ohali yalua. Yesu wa eca uvangi wokuti omunu wa lipua o pondola oku kolela ku Suku ndaño o talisiwa ohali yalua. Sokolola esanju Yehova a kuata omo liepokolo lia Yesu!—Olosapo 27:11; tala Etosi 15 kesulilo lielivulu lilo.

13. Ocisembi ca fetiwa ndati?

¹³ Ocisembi ca fetiwa ndati? Yesu wa eca ku Isiaye esilivilo liomuenyo waye. Kunyamo wa 33, keteke 14 kosãi ya Nisana vokalendaliu ka va Yudea, Yehova wa ecelela okuti Yesu o pondiwa lovanyãli vaye. (Va Heveru 10:10) Eci pa pita oloneke vitatu noke yolofa via Yesu, Yehova wo pindula okuti ka kuetele vali etimba liositu, pole wa tambula etimba liespiritu. Noke, eci Yesu a tiukila ku Isiaye kilu, wa eca kokuaye esilivilo liomuenyo waye wa lipua ndocisembi. (Va Heveru 9:24) Omo okuti ocisembi ca fetiwa, tu kuete epuluvi lioku yovuiwa kekandu kuenda kolofa.—Tanga Va Roma 3:23, 24.

14, 15. Nye tu sukila oku linga oco akandu etu a eceliwe?

¹⁴ Tua siata oku kuatisiwa locisembi okuti oco ombanjaile ya velapo ya Suku. Tu konomuisi ndomo tu pondola oku kuatisiwa cilo kuenda ndomo tu ka kuatisiwa kovaso yoloneke.

¹⁵ Akandu etu a eceliwa. Ka ca lelukile oku linga ovina via sunguluka olonjanja viosi. Momo, tua siata oku lueya, oku popia vĩvi, ale tu linga ovina ka via sungulukile. (Va Kolosai 1:13, 14) Tu pondola oku eceliwa ndati? Tu sukila oku pinga ongecelo omo liovina vĩvi tua linga, kuenda oku lekisa umbombe poku pinga ongecelo ku Yehova. Nda tua ci linga, tu pondola oku kolela okuti akandu etu a eceliwa.—1 Yoano 1:8, 9.

16. Nye tu sukila oku linga oco tu kuate utima wa yela?

¹⁶ Tu pondola oku kuata utima wa yela. Nda utima wetu u tu sapuila okuti tua siata oku linga ovina ka via sungulukile, tu livetela evelo. Kuenje, tu kala ndu okuti ka tu kuete elavoko kuenda ka tu silivila. Pole, tu yuvuli oku pua elavoko. Nda tu pinga ku Yehova oco a tu ecele, tu pondola oku kolela okuti o tu yeva, kuenda o tu ecela. (Va Heveru 9:13, 14) Yehova o yongola okuti tu sapela laye ovitangi tua siata oku liyaka lavio kuenda ahonguo etu. (Va Heveru 4:14-16) Nda tua ci linga, tu kuata ombembua laye.

17. Omo okuti Yesu wa tu fila, asumũlũho api tu pondola oku tambula?

¹⁷ Tu kuete elavoko lioku kala otembo ka yi pui. “Onima yekandu oku fa, pole, ongavelo ya eciwa la Suku omuenyo ko pui vu Kristu Yesu Ñala yetu.” (Va Roma 6:23) Omo okuti Yesu wa tu fila, tu pondola oku kala otembo ka yi pui kuenda oku kuata uhayele wa lipua. (Esituluilo 21:3, 4) Pole, nye tu sukila oku linga oco tu tambule asumũlũho aco?

18. Tua kũlĩha ndati okuti Yehova o tu kuetele ocisola?

¹⁸ Sokolola esanju o pondola oku kuata nda omunu umue wa ku ĩha ombanjaile yimue ya posoka. Ocisembi oco ombanjale ya velapo, kuenje tu sukila oku eca olopandu ku Yehova. Elivulu lia Yoano 3:16, li tu sapuila hati: “Omo Suku a sola calua oluali, wa eca Omõlaye wongunga.” Omo okuti Yehova o tu kuetele ocisola, wa tu ĩha Omõlaye o soliwe calua. Tua kũlĩha okuti Yesu o tu kuetelevo ocisola, momo wa lekisa onjongole yoku tu fila. (Yoano 15:13) Ombanjaile yocisembi yi pondola oku ku vetiya oku tava okuti Yehova la Yesu va ku kuetele ocisola cocili.—Va Galatia 2:20.

19, 20. (a) O pondola oku kala ndati ekamba lia Yehova? (b) O pondola oku lekisa ndati okuti o tava kocisembi ca Yesu?

¹⁹ Omo okuti cilo wa lilongisa ovina viatiamẽla kocisola ca Suku, o pondola oku kala ndati ekamba liaye? Ocili okuti, ka ca lelukile oku sola omunu umue kua kũlĩhĩle. Elivulu lia Yoano 17:3 li popia okuti, tu pondola oku kũlĩha Yehova. Osimbu amamako oku linga ovina viaco ocisola cove kokuaye ci livokiya, kuenje ci ku vetiya oku linga ovina viu sanjuisa, kuenda o linga ekamba liaye. Omo liaco, amamako oku lilongisa ovina viatiamẽla ku Yehova poku tanga Embimbiliya.—1 Yoano 5:3.

²⁰ Tava kocilumba cocisembi ca Yesu. Embimbiliya li tu sapuila hati: “Wosi o kolela [Omõla] o kuete omuenyo ko pui.” (Yoano 3:36) Oku lekisa ekolelo ci lomboloka nye? Ci lomboloka oku kapako ovina Yesu a tu longisa. (Yoano 13:15) Ka tu sukila lika oku popia okuti tu tava ku Yesu. Pole, oco tu tave kocisembi, tu sukila oku linga ocina cimue catiamẽla kekolelo lietu. Ukanda wa Tiago 2:26, u popia hati: “Ekolelo ka li kuete ovilinga . . . lia fa.”

21, 22. (a) Momo lie tu sukilila oku enda Kocipito Conjivaluko yolofa via Kristu unyamo lunyamo? (b) Nye tu ka konomuisa vocipama 6 kuenda 7?

 ²¹ Kuende kocipito conjivaluko yolofa via Kristu. Kuteke osimbu Yesu ka file, wa tu longisa okuti tu sukila oku ivaluka olofa viaye. Ocipito tua siata oku linga unyamo lunyamo ci tukuiwa hati, Ocipito Conjivaluko, ale “Ondalelo ya Ñala.” (1 Va Korindo 11:20; Mateo 26:26-28) Yesu o yongola oku tu ivaluisa okuti, wa tu ĩha omuenyo waye wa lipua ndocisembi. Eye wa popia hati: “Ci lingaili onjivaluko yange.” (Tanga Luka 22:19.) Eci enda Kocipito Conjivaluko, o lekisa okuti ivaluka ocisembi kuenda ocisola ca velapo Yehova kumue la Yesu va tu kuetele.—Tala Etosi 16 kesulilo lielivulu lilo..

²² Ocisembi, oco ombanjaile ya velapo tua tambula. (2 Va Korindo 9:14, 15) Omo okuti ombanjaile yaco yi kuete esilivilo lia velapo, yi ka kuatisavo omanu valua va fa. Kocipama 6 kuenda 7, tu ka konomuisa ndomo ovina viaco vi ka lingiwa.