Osimbu o Paskoa yunyamo wa 32 K.K., ka ya pitĩlile, ovapostolo va tiuka kungende umue wupange woku kunda. Ovo va kavele calua, kuenje Yesu wa londa lavo vowato oku enda ko Betesaita, kuna ovo va laikele oku puyuka. Pole, eci owato wa pitĩla ocipepi longongo, Yesu wa mola okuti omanu valua va va landula. Ndaño okuti Yesu wa yonguile oku kala lika lovapostolo vaye, pole, wa tambula ciwa omanu vaco. Eye wa sakula olombei viavo kuenda wa fetika oku va longisa. Yesu wa va longisa vokuenda kueteke liaco liosi, eci catiamẽla Kusoma wa Suku. Eci ekumbi lia iñila, ovapostolo veya ku Yesu kuenje vo sapuila vati: ‘Soketi omanu va kasi lonjala. Va tuma oco va ende va ka sande cimue co kulia.’

Yesu wa popia hati: ‘Ka va ka ende. Pole, eci kokuavo cimue co kulia.’ Ovapostolo va pula vati: ‘O yongola hẽ okuti tu enda oco tu ka va landele olombolo? Filipu umue pokati kovapostolo wa popia hati: ‘Ndaño tua kuatele olombongo vialua, nda ka tua tẽlele oku landela owiñi owu olombolo vi tẽla.’

Yesu wa pula hati: ‘Olombolo viñami tu kuete?’ Andereu wa tambulula hati: ‘Tu kuete lika olombolo vitãlo lolõsi vivali vitito. Ovio ka vi tẽla cimue.’ Yesu wa popia hati: ‘Neni kulo olombolo viaco lolõsi.’ Noke wa sapuila omanu oco va tumãle powangu vovimunga vi soka 50 kuenda 100. Yesu wa tikula olombolo kuenda olõsi, wa vanja kilu kuenje wa likutilila. Noke wa vi eca kovapostolo kuenje va vi avela omanu. Ci soka 5.000 kalume, kumue lakãi kuenda omãla, vosi va lia toke eci vekuta. Noke ovapostolo vongolola  ovimuanyuila via supapo oco okuti lacimue ci peseka. Kua yukisiwa eci ci soka 12 kakualu! Ku tava hẽ okuti ocikomo eci ca komõhisa omanu?

Omanu va komõha calua kuenje va yonguile oku tumbika Yesu oco a kale osoma yavo. Pole, Yesu wa kũlĩhĩle okuti ka ya kaile otembo oco Yehova o tumbike komangu yusoma. Omo liaco, eye wa tuma omanu oco va tiukile kuenda wa sapuila ovapostolo vaye oco va ende kesinya likuavo Liokalunga ko Galilea. Ovapostolo va londa vowato kuenje Yesu wa londa komunda yimue likaliaye. Momo lie? Momo eye wa sukilile otembo oco a likutilile ku Isiaye. Ndaño okuti Yesu wa kuatele ovina vialua vioku linga, pole, olonjanja viosi wa enda oku sanda otembo yoku likutilila.