Yesu wa lisanga lolondonge viaye ko Galilea. Eye wa eca kokuavo ocihandeleko cimue ci kuete esilivilo lia velapo hati: ‘Kuendi, ka longisi omanu vo kolofeka viosi oco va linge olondonge. Va longisi ovina viosi ndo longisi kuenda va papatisi.’ Kuenje wa va likuminya hati: ‘Ivaluki okuti ame ndi kala lene oloneke viosi.’

Yesu noke liepinduko liaye, vokuenda kueci ci soka 40 koloneke, wa molẽha kolondonge vialua ko Galilea kuenda ko Yerusalãi. Eye wa va longisa ovolandu a kuete esilivilo kuenda wa linga ovikomo vialua. Noke Yesu wa lisanga lovapostolo vaye onjanja ya sulako Komunda yo Oliveira. Eye wa va sapuila hati: ‘Ko ka tundi vo Yerusalãi. Amamiko oku lavoka eci Isia a likuminya.’

Ovapostolo vaye ka va kuatele elomboloko liovina Yesu a popia. Kuenje vo pula vati: ‘Anga hẽ cilo o kala Osoma ya va Isareli?’ Yesu wa popia hati: ‘Yilo hatemboko ya Yehova oku ndi tumbika Kusoma. Ndopo vu tambula unene wespiritu sandu kuenda vu linga olombangi viange. Kuendi ka kundili vo Yerusalãi, vo Yudea, vo Samaria kuenda kasukiyo osi o kilu lieve.’

Noke Yesu wa yeluiwa oku enda kilu kuenda elende limue lio sitika. Olondonge viaye viamamako oku luluvala kilu, pole, ka vo muile vali.

Ovo, va tunda Komunda yo Oliveira kuenje va enda ko Yerusalãi. Olonjanja viosi ovo va enda oku liongolola vohondo yosapalalo kuenda oku likutilila. Kuenje va kala oku kevelela Yesu oco a va ĩhe olonumbi vikuavo.