Vo Kaisarea mua kala ulume umue wa velapo, okuti kesongo kolohoka vio ko Roma o tukuiwa hati, Korneliu. Ndaño okuti eye ka kaile u Yudea, pole, wa sumbiwile la va Yudea. Eye wa enda oku kuatisa olohukũi kuenda olosuke. Korneliu wa tavele ku Yehova kuenda wa enda oku likutilila kokuaye olonjanja viosi. Eteke limue ungelo umue wa molẽha ku Korneliu kuenje wa popia hati: ‘Suku wa yeva olohutililo viove. Cilo, tuma alume volupale luo Yopa kuna Petulu a sikĩla kuenda pinga kokuaye oco eye kokuove.’ Vepuluvi liaco, Korneliu wa tuma alume vatatu oco va ende ko Yopa ocinãla ci soka 30 kolokilometulu kombuelo yo Kaisarea.

Osimbu alume vaco ka va pitĩlile ko Yopa, Petulu wa kuata ocinjonde cimue. Vocinjonde caco, wa mola ovinyama vimue okuti va Yudea ka ca tavele okuti va vi lia kuenje wa yeva ondaka yimue yo sapuila oco a lie. Petulu ka tavele poku popia hati: ‘Sia la lia ocinyama cimue ca vĩha.’ Kuenje ondaka ya popia laye yiti: ‘Ku ka tukule ovinyama evi okuti via vĩha. Suku wa vi yelisa.’ Petulu vo sapuilavo hati: ‘Alume vatatu va kasi pepito liove. Kuende lavo.’ Petulu wa enda kepito kuenje wa pula alume esunga lieci veyilila. Ovo va tambulula vati: ‘Tua tumiwa la Korneliu  kesongo kolohoka vio ko Roma. Ove o sukila oku enda konjo yaye ko Kaisarea.’ Petulu wa yekisa alume vaco ndakombe vaye oco va lale. Keteke lia kuamamo, eye wa enda kumue lavo ko Kaisarea kuenda vamanji vamue vo ko Yopa va endavo.

Eci Korneliu a mola Petulu, wa wila posi kolomãhi viaye. Pole, Petulu wa popia hati: ‘Votoka! Ame ndimunu ndove. Suku wa ndi sapuila oco njiye konjo yove ndaño va Yudea ka va iñila volonjo via Vakualofeka. Cilo ndi sapuile esunga lieci wa ñovongela kulo.’

Korneliu wa sapuila Petulu hati: ‘Papita ale oloneke vikuãla tunde eci nda kala oku likutilila ku Suku kuenje ungelo umue wa ndi sapuila oco ndi tume oku ku kovonga. Tu longise olondaka via Yehova.’ Petulu wa popia hati: ‘Ame nda siata oku lilongisa okuti Suku hokuacameko. Eye o tava omunu wosi o yongola oku u fendela.’ Petulu wa va longisa ovina vialua viatiamẽla ku Yesu. Noke espiritu sandu lia wila Korneliu kuenda vosi va kala laye, kuenje vosi yavo va papatisiwa.