Saulu wa kala onyitiwe yo ko Roma volupale luo Tarso. Eye wa kala u Fariseo una wa kũlĩhĩle ciwa ocihandeleko ca va Yudea kuenda wa suvukile Akristão. Eye wa enda oku koka alume lakãi Akristão, oku vopa volonjo viavo loku va kapa vokayike. Eye wa kala kumosi lowiñi wa tema calua kuenda wa mola ndomo owiñi waco wa sosola ndonge Stefano lovawe.

Pole, Saulu ka sanjukilile oku kuata lika Akristão vo ko Yerusalãi. Eye wa pinga kocitunda cinene oco o tume volupale luo Damasko okuti o kangisa Akristão vo kofeka yaco. Osimbu a kala ocipepi lolupale luaco, vocipikipiki ocinyi cimue co tuila kuenje wa kupukila posi. Eye wa yeva ondaka yimue ya popia yiti: ‘A Saulu, momo lie o ndi lambalalela?’ Saulu wa pula hati: ‘Ove elie?’ Vo tambulula hati: ‘Ame Yesu. Iñila vo Damasko kuenje o ka lilongisa eci o sukila oku linga.’ Vepuluvi liaco, Saulu wa linga omeke kuenda vo kuata peka oco a iñile volupale.

Vo Damasko mua kala Ukristão umue ukuekolelo o tukuiwa hati, Ananiya. Yesu wa vangula laye vocinjonde hati: ‘Kuende konjo ya Yuda vokololo yi tukuiwa Luasuñama kuenje sandiliyako Saulu.’ Ananiya wa popia hati: ‘A Ñala, nda kũlĩha ovina viosi viatiamẽla kulume waco! Eye o kasi oku kapa olondonge viove vokayike!’ Pole, Yesu wa popia hati: ‘Kuende kokuaye. Ame nda nõla Saulu oco a kunde olondaka viwa kolofeka vialua.’

Kuenje Ananiya wa sanga Saulu kuenda wo sapuila hati: ‘A manjange a Saulu, Yesu wa numa oco ovaso ove a letuluke.’ Vonjanja yaco, Saulu wa letuluka. Eye wa lilongisa eci catiamẽla ku Yesu kuenda wa linga ondonge yaye. Eci Saulu a papatisiwa Ndukristão, wa fetika oku kunda volosunangonga kumue Lakristão  vakuavo. O tẽla hẽ oku sokolola ndomo va Yudea va komõha eci va mola Saulu oku kundila omanu catiamẽla ku Yesu? Ovo va popia vati: ‘U siti ulume una wa enda oku kangisa olondonge via Yesu?’

Vokuenda kuanyamo atatu, Saulu wa kundila omanu va kala ko Damasko. Va Yudea va suvukile Saulu, kuenje va tumbika ongombo yoku u ponda. Pole, vamanji va limbuka ongombo yaco kuenje vo kuatisa oco a tile. Ovo vo kapa vekualu limue yu vo lowisila posi vocimbaka colupale.

Eci Saulu a enda ko Yerusalãi wa seteka oku likongela la vamanji vakuavo. Pole, vamanji vaco vo kuatela usumba. Omo liaco, ndonge umue o tukuiwa hati Barnaba, wa nena Saulu kovapostolo kuenda wa va sapuila okuti Saulu wa pongoloka muẽle lutima wosi. Kuenje Saulu wa fetika oku kunda olondaka viwa lonjongole yalua kumue lekongelo lia kala ko Yerusalãi. Noke weya oku tukuiwa hati, Paulu.