Eci olondavululi via va Isareli via endele kolupale luo Yeriko, ovio via kala vonjo yukãi umue o tukuiwa hati, Rahava. Soma yo Yeriko wa ci yeva kuenje wa tuma asualali konjo ya Rahava. Rahava wa seleka olondavulu vivali kolusoka luonjo kuenje wa tuma asualali konjila yikuavo. Rahava wa sapuila olondavululi hati: ‘Ndu ku kuatisi momo nda kũlĩha okuti Yehova o kasi lene kuenda vu laika oku tambula ofeka. Mangi ohenda, likuminyi lame okuti vu popela epata liange.’

Olondavululi via sapuila Rahava viti: ‘Tu likuminya okuti omunu wosi o kala vonjo yove ka nyõliwa.’ Viamisako viti: ‘Kutila ukolo umue u kusuka ponjanela yove kuenje epata liove li popeliwa.’

Rahava wa lowisila olondavululi ponjanela yaye lukolo. Ovio via enda kolomunda kuenje oko via salama oloneke vitatu osimbu ka va endele ku Yehosua. Noke va Isareli va yoka Olui Yordão kuenje va lipongiyila oku tambula ofeka. O Yeriko ya kala olupale luatete ovo va tambula. Yehova wa va sapuila oco va ñuale imbo onjanja yimosi veteke okuti, va ci linga vokuenda kuoloneke epandu. Keteke  liepanduvali ovo va ñuala imbo olonjanja epanduvali. Ovitunda via sika anguena kuenda asualali va kaluka lolukandi. Ovimbaka violupale via kupuka! Pole, onjo ya Rahava yina ya kala kocimbaka ka ya kupukile. Rahava kumue lepata liaye va popeliwa momo va kolelele Yehova.