Daviti noke yoku ponda Goliata, Soma Saulu wo nõla oco a kale kesongo kolohoka viaye. Daviti wa yula ovoyaki alua kuenda weya oku kũlĩhĩwa calua. Eci Daviti a pitĩla konjo poku tiuka kuyaki, akãi veya loku imba ovisungo kuenda oku cĩla vati: ‘Saulu wa ipaya olohuluwa, kuenda Daviti wa ipaya ekũi liolohuluwa!’ Saulu wa kuatela esepa Daviti kuenje wa yonguile oku u ponda.

Daviti wa tẽlele oku sika ciwa ohalupa. Eteke limue osimbu Daviti a kala oku sikila Saulu ohalupa, soma wa imba onjelia kokuaye. Daviti wa yandulukamo kuenje onjelia ya veta vocimano. Noke yovina evi, Saulu wa seteka olonjanja vialua oku ponda Daviti. Pole, onjanja eyi Daviti wa tila kuenje wa salama vekalasoko.

Saulu wambata olohoka vi soka 3.000 kalume kuenje va enda oku ka sandiliya  Daviti. Capita okuti Saulu wa iñila veleva limue Daviti kumue lalume vaye va kala oku salama. Alume va Daviti va popia loku loñola hati: ‘Lilo olio epuluvi o kuete lioku ponda Saulu.’ Daviti wa enda levando kocitumãlo kua kala Saulu kuenje wa teta ocinimbu cimue konanga ya soma. Saulu ka ci limbukile. Noke Daviti co vala kutima omo ka lekisile esumbilo kosoma ya nõliwa la Yehova. Eye ka tavele okuti alume vaye va linga cĩvi Saulu. Daviti wa vilikiya Saulu loku u sapuila okuti eye nda wa ponda Saulu eci a kuata epuluvi lioku ci linga. Anga hẽ Saulu wa pongolola ocisimĩlo caye catiamẽla ku Daviti?

Sio. Saulu wamamako oku suvuka Daviti. Vuteke umue Daviti kumue locimumba caye Avisiai va enda kocilombo ca Saulu. Toke muẽle Avinere lasualali va Saulu va kala oku pekela. Avisiai wa popia hati: ‘Eli olio epuluvi tu kuete! Tava okuti ndu ponda.’ Daviti wa tambulula hati: ‘Yehova o linga la Saulu eci ca lisoka lovilinga viaye. Tu yelula lika onjelia lesanga liaye liovava kuenje tu enda.’

Daviti wa londa komunda yimue ocipepi okuti yecelela oku mola ocilombo ca Saulu. Kuenje wa kaluka lolukandi hati: ‘A Avinere, nye kua tatelele soma yove? Pi ku kasi esanga liovava lonjelia ya Saulu?’ Saulu wa limbuka ondaka ya Daviti kuenje wa popia hati: ‘Ove nda wa ndi ponda, pole, kua ci lingile. Ame nda kũlĩha okuti ove o laika oku kala osoma yo Isareli.’ Saulu wa tiukila konjo yaye. Pole, havosiko vepata lia Saulu okuti va suvukile Daviti.