NOHA wa kuata ukãi kuenda omãla vatatu valume. Olonduko viomãla vaye vievi: Semi, Hama kuenda Yafete. Omãla vaco va kuatavo akãi vavo. Omo liaco, epata lia Noha lia kala leci ci soka omanu ecelãla.

Suku wa sapuila Noha oco a tunge ocimbaluku cinene. Pole, kotembo yaco omanu ka va kũlĩhĩle ocimbaluku. Ocimbaluku caco ca kala ndocikasia cimue ca lepa haico cinene. Suku wa sapuila Noha hati, ‘ocimbaluku caco ci kale lolo-sapalalo vitatu kuenda vokati kaco tepamo olohondo.’ Olohondo viaco via kala via Noha lepata liaye kuenda ovinyama. Vikuavo via kala vioku kapa okulia kuavo.

Suku wa sapuila Noha oco a kũlĩhĩse ocimbaluku okuti vokati kaco ka mu iñila ovava. Eye wa popia hati: ‘Ndokisa kilu lieve etande liovava kuenje ndi nyõla oviendalomuenyo viosi vi kasi voluali. Ovina viosi ka vi kasi vocimbaluku ndi vi nyõla.’

Noha lomãla vaye valume va pokola ku Yehova kuenje va fetika oku tunga ocimbaluku. Pole omanu vakuavo va fetika oku va yola epembe kuenda oku amamako oku linga eci cĩvi. Eci Noha a va sapuila ovina Suku a laikele oku linga, ovo ka va tavele kondaka yaco.

Omo okuti ocimbaluku caco ca kala cinene, poku ci tunga cambatele anyamo alua. Eci Noha a mãla oku tunga ocimbaluku, Suku wo sapuila oco a kape vocimbaluku caco apata amue ovinyama. Ovinyama viaco vi nõliwa vivali vivali ndokuti ulume lomange. Pole apata ovinyama vimue, Suku wa sapuila Noha oco a nõleko epanduvali. Suku wa sapuilavo Noha oco a nõle apata osi olonjila vi pãlala. Kuenje Noha wa linga ovina viosi Suku o sapuila.

Noke Noha lepata liaye, va iñilavo vocimbaluku kuenje Suku wa yika epito liaco. Ovo va fetika oku talamẽla. Kaliye sokolola ndu okuti ove o kasivo vocimbaluku oku talamẽla kumosi lavo! Vepuluvi liaco o pondola oku sokolola ndoco: Suku wa popele okuti ndi nena etande. Hanga hẽ etande liaco liya muẽle ocili?