YOSEFE ka tẽlele vali oku kandangiya utima waye kuenje wa sapuila akuenje vaye oco vo tunde. Osimbu a kala lika la vamanjaye wa fetika oku lila calua. Eci a kala loku lila, vamanjaye va yokoka momo ka va kũlĩhile esunga liaco. Noke wa va sapuila hati: ‘Ame Yosefe. Tate yange o kasi lomuenyo?’

Eci Yosefe a lisitulula, vamanjaye va saluka kuenje lomue pokati kavo wa kuata utõi woku vangula cimue. Kuenje eye wa popia hati: ‘Kokeli ocipepi.’ Noke wa va sapuila hati: ‘Ame manjene Yosefe, una wa landisili Kegito.’

Yosefe wamisako loku popia hati: ‘Ko ka litemẽli ño omo wa ndandisili kulo; momo Suku wa numa oku livanga kovaso yene oku popela ovimuenyo. Fareo wa ndi kapa komangu ya velapo vofeka yilo. Cilo tiukili ku tate ko sapuili ovina evi viosi. U sapuili oco eye a kale kulo.’

 Noke Yosefe wa sipula vamanjaye vosi loku lila. Eci Fareo a yeva okuti vamanji va Yosefe veya, wa popia la Yosefe hati: ‘Sapuila vamanjove hati, Tuiki ovimbulu viene, katuki, kuendi kopilili isiene lapata ene, enjui kulo. Ndu wihi eci ca velapo covofeka Yegito.’

Ovo va pokola kondaka yaco. Kũlĩhisa ndomo Yosefe a kasi oku lama isiaye eci a pitila vofeka Yegito lepata liaye liosi.

Epata lia Yokoba lia kala linene calua. Eci va ilukila Kegito, vosi yavo va kala eci ci soka akũi epanduvali komanu oku kongelamo Yokoba lomãla vaye kuenda olonekulu viaye. Akãi kuenda apika ka va tendiwile. Ovo veya oku tukuiwa hati va Isareli momo Suku wa pongoluile onduko ya Yakoba. Va Isareli va kala omanu vamue va likasi kovaso a Yehova. Tu konomuisi ulandu waco.