VA Filisiti veya vali oku liyaka la va Isareli. Vamanji vatatu akulu va Daviti va kala kolohoka via Saulu. Eteke limue Jese wa sapuila Daviti hati: ‘Ka tuale lombili olukango ku vahuvove kuenda olombolo. Ka kũlĩhise ndomo va kasi.’

Eci Daviti a pitila kocilombo casuãlali, wa enda oku ka kũlĩhisa vamanjaye. Goliata ocindululu ca va Filisiti weya oku sepula va Isareli. Esepu liaco wa enda oku lilinga oloneke viosi komẽle lokekumbi. Eye wa ci linga vokuenda kueci ci soka akũi akuãla koloneke. Goliata wa kaluka hati: ‘Nõli umue pokati kalume vene oco a liyake lame. Nda eye wa ndi yula loku ndi ponda, etu tu linga apika vene. Pole nda ame ndo yula loku u ponda, ene vu linga apika vetu. Etaili ndi lipandela olohoka viene. Nyihi omunu ndi liyaka laye.’

Daviti wa pula vamue pokati kasuãlali hati: ‘Omunu wosi o ponda ocindululu eci ca va Filisiti, o lingiwa nye oco a kutulule osõi va Isareli?’

Asuãlali va kumbulula hati: ‘Saulu eca kokuaye ukuasi walua. Kuenda eca kokuaye omõlaye ufeko oco a linge ukãi waye.’

Vosi va Isareli va kuatele usumba la Goliata momo wa pamele calua haeye unene. Eye wa lepele calua okuti utunga waye wa kala leci ci soka olometulu vitatu. Wa kuatelevo asuãlali vaye va enda loku ambata ovimalẽho viaye.

Asuãlali vamue va enda toke ku Soma Saulu kuenje vo sapuila hati: Daviti oyongola oku liyaka la Goliata. Saulu wa popia la Daviti hati: ‘Ove ku pondola oku liyaka la Goliata u Filisiti. Ove handi umalẽhe, kuenda eye esuãlali tunde vutila waye.’ Daviti wa kumbulula hati: ‘Ame nda ponda o kanyani lohosi vina via yonguile oku lia olomeme via tate. Ulume u Ufilisiti ndu u lingisa ndovinyama viaco. Yehova oka ñuatisa.’ Saulu wo kumbulula hati: ‘Kuende. Yehova a kale love.’

Daviti wa lokila vokalui kamue kuenje wa nyañula o tuvawe tutãlo tu sielena. Otuvawe tuaco wa tu kapa vocipete caye. Noke wa nyañula epipili liaye kuenje wamẽla ocipepi locindululu caco. Eci Goliata o mola ka tavele kondaka yaco. Eye wa kala loku sima okuti o pondola oku ponda Daviti.

Goliata wa popia la Daviti hati: ‘Etimba liove ndi lieca kolonjila viovilu kuenda kovinyama viovusenge.’ Pole Daviti wa kumbulula hati: ‘Ove wiya kokuange losipata lonjelia kuenda unga. Ame puãi njiya kokuove vonduko ya Yehova. Etaili muẽle Yehova o ku eca peka liange, hu tesõla.’

Vepuluvi liaco Daviti wa lupukila ku Goliata. Wopa ewe vocipete caye kuenje wa li kapa vepipili. Noke wa limba longusu yaye yosi. Ewe liaco lia veta kutue wa Goliata. Goliata wa kupukila posi kuenje wa fa. Eci va Filisiti va mola okuti onõi yavo va kolelele ya fa, vosi yavo va fetika oku tila. Va Isareli va kuama konyima yavo kuenje va yula olohoka vio vanyali vavo.

1 Samuele 17:1-54.