1-3. Ovina vipi via pita la Yesu kuenda nye eye a linga?

 OWIÑI wa kala oku iya oku kuata Yesu. Wa li malẽha lolosipata, lolohunya kuenda pokati kavo pa kala asualali. Owiñi waco, wa tundilila volupale luo Yerusalãi luteke kuenje wa pita Vondamba ya Kedrone oku enda Komunda yo Oliveira. Ndaño okuti kua kala owi, ovo lopo vambatele ovimihi lolondiyelo. Nye vambatelele vali ovimihi lolondiyelo nda kua kala ale owi? Helie va kala oku sandiliya? Ocili okuti, va kala oku sandiliya omunu umue ka va kũlĩhĩle. Omunu waco Yesu.

² Yesu wa kũlĩhĩle okuti omuenyo waye wa kala kohele. Pole, eye ka tilile. Owiñi wa songuiwa la Yuda ekamba lia Yesu, wa kala ocipepi. Yuda wa pakula Yesu poku u sipula lombambe. Haimo lumue, Yesu ka yokokele. Lutõi, eye wamẽla kowiñi kuenje wa pula hati: “Helie vu kasi oku sanda?” Vo kumbulula vati: “Yesu u Nasara.”

³ Nda ca kaile omanu vamue, nda va kuata usumba lowiñi omo wa ambata ovimalẽho. Owiñi wa lavokaile okuti Yesu o ka kuatavo usumba. Pole, eye ka tilile, ka lulumile, ka va limbikile poku popia hati: “Ame.” Oku tula kuaye utima kuenda utõi a lekisa, kua komõhisa omanu. Ovo va komõha utõi waco kuenje va kupukila posi.—Yoano 18:1-6; Mateo 26:45-50; Marko 14:41-46.

4-6. (a) Omõla a Suku wa sokisiwa la nye kuenda momo lie? (b) Volonepa vipi Yesu a lekisa utõi?

⁴ Nye ca kuatisa Yesu oku liyaka locitangi caco? Eci co  kuatisa utõi. Utõi, ocituwa cimue ci sukiliwa kasongui. Lomue wa velelepo Yesu koku lekisa ocituwa caco. Kocipama catatu, tua lilongisa ndomo Yesu a lekisa umbombe kuenda eliketiso. Eye wa tukuiwa hati, “Kameme.” (Yoano 1:29) Yesu wa lekisa utõi walua okuti omanu vakuavo ci sule. Embimbiliya li tukula Omõla a Suku hati: “Tala! Ohosi yocikoti ca Yuda.”—Esituluilo 5:5.

⁵ Ohosi ocinyama cimue ci kuete utõi walua. Anga hẽ wa muile ale ohosi? Citava okuti, eci wa yi mola ya yikiwila kocitali covinyama kuenje wa kuata usumba. Eci ya ku tulukila, wa limbuka okuti ka yi kuete usumba. Embimbiliya li popia okuti: “Ohosi okuti onõi pokati kovinyama, haiyo okuti, ka yi tila lacimue.” (Olosapo 30:30) Utõi wa Kristu u sokisiwa lutõi wohosi.

⁶ Tu konomuisi ndomo Yesu a lekisa utõi volonjila vitatu: Poku teyuila ocili, poku teyuila esunga kuenda poku pandikisa kalambalalo. Tu ka lilongisavo ndomo tu pondola oku setukula Yesu koku lekisa utõi.

7-9. (a) Nye ca pita la Yesu eci a kuata 12 kanyamo kuenda momo lie ulandu waco u ku komõhisila? (b) Yesu wa lekisa ndati utõi eci a kala lalongisi vonembele?

⁷ Omo okuti oluali lua vialiwa la Satana “isia yuhembi,” tu sukila oku kuata utõi woku teyuila ocili Condaka ya Suku. (Yoano 8:44; 14:30) Yesu wa lekisa ocituwa caco tunde vutila waye. Eci a kala 12 kanyamo, poku tunda kocipito co Paskoa ko Yerusalãi, eye ka tiukilile lolonjali viaye, Maria la Yosefe. Noke vo sandiliya vokuenda kuoloneke vitatu, yu vo sanga vonembele. Nye a kala oku lingamo? “Wa tumãla pokati kalongisi oku va yevelela loku va linga apulilo.” (Luka 2:41-50) Konomuisa eci va kala loku vangula.

 ⁸ Vakuasapulo va popia hati, alongisi va velapo va kuatele ocituwa coku siala vonembele, noke yocipito kuenda va enda oku longisila pombundi. Omanu va enda oku tumãla oku yevelela loku linga apulilo. Alongisi vaco va lilongisile calua. Ovo va kũlĩhĩle ciwa Ocihandeleko ca Mose, va kuatavo ovihilahila kuenda oviholo via tumbikiwa lomanu okuti, via enda oku livokaiya unyamo lunyamo. Nda ca kaile ove nda wa kala ndati? Nda wa yokoka? Ci kuete esunga oku liyeva ndoco. Ove nda wa kuatele lika 12 kanyamo, nda wa kala ndati? Amalẽhe vamue va kuete osõi. (Yeremiya 1:6) Handi vali, vakuavo ka va lilekisa kalongisi vavo kosikola okuti Akristão, omo liohele yokuti ka va ka kuata akamba kuenda va ka yoliwa epembe.

⁹ Yesu wa kala pokati kalume vaco va lilongisa calua, oku va linga apulilo. Ulandu waco u tu sapuila hati: “Vosi va kala oku u yevelela, va komõha omo liolondunge viaye kuenda atambululo aye.” (Luka 2:47) Embimbiliya ka li tu sapuila eci Yesu a vangula vepuluvi liaco. Pole, tu kuete ekolelo liokuti eye ka vanguile esanda ndomo alongisi vetavo va enda oku linga. (1 Petulu 2:22) Ndaño okuti Yesu wa kuata lika 12 kanyamo, wa teyuila ocili Condaka ya Suku. Kuenje olonjeveleli viaye via komõha ndomo eye a vangula lutõi.

10. Amalẽhe Akristão va siata oku kuama ndati ongangu ya Yesu?

¹⁰ Koloneke vilo, ndaño okuti amalẽhe Akristão ka va lipuile, pole, va kuãi ongangu ya Yesu. Ka ci sukila okuti ovo va kala akulu oco va teyuile ocili Condaka ya Suku. Ci kale kosikola ale posongo va kasi, va linga apulilo, va yevelela kuenda lesumbilo va sapuila ocili komanu. (1 Petulu 3:15) Amalẽhe vaco va siata oku kuatisa akamba vavo kosikola, alongisi kuenda ava va lisungue  lavo oku linga olondonge via Kristu. Yehova o sanjukila calua utõi wavo! Ondaka ya Suku yi va sokisa ndoku talala kuowume.—Osamo 110:3.

11, 12. Eci Yesu a kula, wa lekisa ndati utõi woku teyuila ocili?

¹¹ Eci Yesu a kula, wa lekisa utõi poku teyuila ocili. Eci a fetika upange waye woku kunda, wa pita voloseteko vialua. Pole, eci Yesu a setekiwa la Satana unyãli wa velapo wa Yehova, ka kaile vali ungelo unene. Yesu wa likala ovisimĩlo via Satana vioku pengisa ovisonehua. Yesu wa kumbulula lutõi hati: “A Satana, nunde!”—Mateo 4:2-11.

¹² Yesu wa sia ongangu yiwa yoku teyuila Ondaka ya Isiaye okuti, ka yi pengisiwa. Koloneke vilo, alongisi vatavo va siata oku longisa uhembi. Yesu wa popia lalongisi vatavo vo koloneke viaye hati: “Ondaka ya Suku wa yi lingisi okuti ka yi kuata esilivilo omo lioviholo wa tumbiki.” (Marko 7:13) Alume vaco va sumbiwile calua lomanu. Pole, Yesu wa kembulula uhembi wavo lutõi kuenda wa va tukula hati, olomeke haivo vakuambambe. a (Mateo 23:13, 16) Tu kuama ndati ongangu ya Yesu yoku kuata utõi?

13. Nye tu sukila oku ivaluka oco tu kuame ongangu ya Yesu? Kuenda esumũlũho lipi tu kuete?

¹³ Ocili okuti, etu ka tu kuete uloño nda Yesu woku kũlĩhĩsa eci ci kasi vovitima via vakuetu, ale unene woku va sombisa. Pole, tu pondola oku setukula Yesu poku teyuila ocili lutõi. Tu ci linga poku kembulula eci atavo esanda a siata oku longisa catiamẽla kocipango ca Suku kuenda Kondaka yaye, oco omanu va tunde vo welema  woluali lua Satana. (Mateo 5:14; Esituluilo 12:9, 10) Etu tua siata oku kuatisa omanu oku yuvula oku kala apika valongiso esanda, oco va kuate ukamba wocili la Suku. Tu kuete esumũlũho lioku mola oku tẽlisiwa kuolondaka via Yesu viokuti: “Ocili cu yovoli!”—Yoano 8:32.

14, 15. (a) Yesu wa lekisa ndati “esunga”? (b) Yesu poku vangula lukãi u Samaria, nye eye a yuvula?

¹⁴ Ovitumasuku via popele okuti, Mesiya o ka sapuila vakualofeka “esunga.” (Mateo 12:18; Isaya 42:1) Yesu wa fetika oku ci linga eci a kala palo posi. Eye wa lekisa okuti ukuesunga haeye ka kuete ocame poku tata omanu. Lutõi walua, wa yuvula olonepele kuenda ovituwa vikuavo vĩvi via siatele koloneke viaye.

¹⁵ Eci Yesu a kala loku vangula lukãi u Samaria pocisimo co ko Sukare, olondonge viaye via komõha. Momo lie? Momo koloneke viaco, va Yudea ka va kuatele ukamba la va Samaria vokuenda kuanyamo alua. (Esera 4:4) Handi vali, alongisi vetavo va enda oku tata lãvi akãi. Ovo va tumbikile ocihandeleko cokuti, ka citava ulume oku vangula lukãi. Vocihandeleko caco mua sonehiwilevo okuti, ka citava oku longisa Ondaka ya  Suku kakãi. Akãi vo ko Samaria va tendiwile okuti ka va yelele. Yesu ka lekisile olonepele kuenje wa longisa ukãi u Samaria (okuti wa ambatele omuenyo umue ka wa sungulukile) kuenda wa li situluila kokuaye okuti eye Mesiya.—Yoano 4:5-27.

16. Momo lie Akristão va sukilila oku lekisa utõi oco va yuvule olonepele?

¹⁶ Anga hẽ wa kaile ale pokati komanu va kuete olonepele? Pamue ovo va popia lãvi vakuekova liñi ale vakuafeka yikuavo. Citava okuti, alume va popia lãvi akãi kuenda akãi va popia lãvi alume. Pamue vana va kuete ukuasi va popia lãvi ava ka va kuete. Pole, olondonge via Kristu vi likolisilako oku yuvula ocituwa caco cĩvi. (Ovilinga 10:34) Vosi yetu tu sukila oku kuata utõi woku yuvula olonepele.

17. Nye Yesu a linga eci a iñila vonembele kuenda momo lie?

¹⁷ Utõi wa vetiya Yesu oku teyuila efendelo liocili. Kefetikilo liupange waye woku kunda, wa iñila vo Yerusalãi vonembele kuenje wa sanga omanu va kala loku landisa kuenda oku tolokalelamo olombongo. Yesu wa yeva onyeño kuenje wa tundisa alume vaco vakuacipululu kuenda wa pesela olombongo viavo. (Yoano 2:13-17) Wa ci lingavo kesulilo liupange waye woku kunda. (Marko 11:15-18) Elinga liaco, lia lekisa okuti Yesu wa kuata unene walua okuti ovanyãli vaye ci sule. Momo lie? Eci a kala umalẽhe, wa tukuile onembele hati, onjo ya Isiaye kuenda eye wa tẽlisa olondaka viaco. (Luka 2:49) Yesu ka ecelelele okuti omanu va amamako oku lingila evĩho vonembele. Ombili yaco yo wĩha utõi woku linga esunga.

18. Akristão koloneke vilo, va lekisa ndati utõi oco va teyuile ekongelo?

¹⁸ Akristão koloneke vilo, va siata oku yelisa ekongelo  lia Yehova kuenda oku teyuila efendelo liocili. Eci va limbuka okuti Ukristão umue wa linga ekandu, ovo ka va ecelela elinga liaco. Ovo va vangula lomunu waco lutõi. (1 Va Korindo 1:11) Va sapuilako akulu vekongelo oco va kuatise omunu waco konepa yespiritu. Pole, akulu vekongelo va ci lingila oku teyuila olomeme via Yehova.—Tiago 5:14, 15.

19, 20. (a) Ovina vipi vĩvi via kala koloneke via Yesu kuenda vo kisikile oku linga nye? (b) Momo lie olondonge via Kristu via sukililile oku yuvula oku panga onepa koluali loku linga ungangala? Kuenda asumũlũho api eyililako?

¹⁹ Anga hẽ Yesu wa malẽleko undiandia wa kala koloneke viaye? Ocili okuti kua kala undiandia walua koloneke viaco. Ofeka Yesu a citiwila ya vialiwile la va Roma. Asualali vo ko Roma va kala oku kangisa va Yudea poku va fetisa elisimu kuenda oku va kisika oku kuama etavo liavo. Omo liaco, ka ci tu komõhisa esunga lieci omanu va yonguilile oku vialeka Yesu, oco a va yovole kekangiso liaco. (Yoano 6:14, 15) Pole, eye wa lekisa utõi walua.

²⁰ Yesu wa lekisa okuti Usoma waye hawolualiluloko. Eye wa sia ongangu yiwa poku longisa olondonge viaye oku yuvula oku litenga vopulitika, okuti va litumbika lika koku kunda olondaka viwa Viusoma wa Suku. (Yoano 17:16; 18:36) Eci owiñi weya oku kuata Yesu, eye wa longisa olondonge viaye oku yuvula oku linga onepa koluali. Petulu wa tikula osipata kuenje wa sonja etũi liesualali. Pamue tu sima okuti Petulu wa kuata esunga. Momo Omõla a Suku ka kuatele ekandu. Yesu wa eca ongangu yiwa kolondonge viaye poku lemẽla Petulu eci a popia hati: “Someha osipata vocilalo cayo, momo vosi va yaka losipata, va ka nyõleha losipata.” (Mateo 26:51-54) Kepuluvi liaco, olondonge via Kristu via sukilile oku kuata utõi woku yuvula oku linga onepa kuyaki.  Akristão koloneke vilo, va siatavo oku yuvula oku linga onepa kovoyaki kuenda oku linga ungangala. Ovo va siata oku kuata asumũlũho alua omo lioku lekisa utõi.

21, 22. (a) Ekuatiso lipi Yesu a tambula oco a pandikise kalambalalo? (b) Yesu wa lekisa ndati utõi toke kolofa?

²¹ Omõla wa Suku eci a kala palo posi, wa kũlĩhĩle ale okuti o ka liyaka lalambalalo. (Isaya 50:4-7) Olonjanja vialua wa puluka kolofa, ndomo ca lomboluiwa kefetikilo liocipama cilo. Yesu wa pandikisa ndati lutõi kalambalalo? Nye Yesu a linga eci owiñi wa kala loku iya oku u kuata? Wa likutilila ku Yehova. Kuenda nye Yehova a linga? Embimbiliya li tu sapuila okuti, Yesu wa “yeviwa.” (Va Heveru 5:7) Vepuluvi liaco, Yehova wa tuma ungelo umue oku kolisa Omõlaye.—Luka 22:42, 43.

²² Noke yoku kolisiwa, Yesu wa popia lolondonge viaye hati: “Votoki, tuendi.” (Mateo 26:46) Sokolola ño olondaka evi. Yesu poku popia hati, “tuendi,” wa kũlĩhĩle okuti owiñi wa kala ocipepi kuenda akamba vaye, va ka tila kuenje o ka siala lika liaye loku talisiwa ohali. Wa pita voloseteko vialua, wa pembuiwa kuenda wa tipuiwa toke kolofa. Ndaño lohali yaco, eye wamamako oku pandikisa lutõi.

23. Lombolola esunga lieci Yesu ka kuatelele usumba eci a talisiwa ohali toke kolofa.

²³ Anga hẽ Yesu wa kala lusumba? Sio. Momo usumba ka u kuete elitokeko lalimue lutõi. Yesu wa longisa olondonge viaye oku lunguka oco vi amameko oku linga ocipango ca Suku. (Mateo 4:12; 10:16) Yesu wa  kũlĩhĩle okuti ka ka ci lembua. Momo vutõi waye, mua kongelele oku linga ocipango ca Suku. Yesu wamamako oku pandikisa kalambalalo, omo wa kũlĩhĩle okuti oku ci linga ci nena asumũlũho.

24. Momo lie tu kolelela okuti nda tua kuata utõi tu ka yula alambalalo?

²⁴ Olondonge via Yesu, via siata oku lekisa utõi poku kuama ongangu ya Cime cavo. Valua va siata oku lekisa utõi eci va pembuiwa, va lambalaliwa, eci va kapiwa vokayike, leci va talisiwa ohali ndaño muẽle toke kolofa. Omo okuti ka va lipuile, utõi waco u tunda pi? Utõi  waco ka u tundi kokuavo muẽle. Ndeci Yesu a tambuile ekuatiso ku Suku, olondonge viaye via siatavo oku kuatisiwa la Suku. (Va Filipoi 4:13) Lalimue eteke ku ka kuatele usumba eci ci laika oku iya. Amamako oku pandikisa kuenje Yehova o ka ku ĩha utõi. Kuama ongangu ya Yesu, Usongui wetu. Momo eye wa popia hati: “Kuati utõi, ame nda yula oluali.”—Yoano 16:33.