Ndomo ca sonehiwa kelivulu lia 1 va Korindo 6:1-8, upostolo Paulu, wa lombolola ovina viatiamẽla koku tetulula ovitangi pokati ka vamanji. Eye wa sumuile calua momo Akristão vamue ko Korindo, va enda oku tuala ovitangi viavo oco vi ‘tetuluiwe la vakualuali.’ (Ocinimbu 1) Paulu wa lekisa esunga lieci ka ca sungulukilile Akristão oku tuala ovitangi viavo kombonge. Ovo va sukilile oku tetuluila ovitangi viavo vekongelo. Omo liaco, tu konomuisi ovina vimue vi tu vetiya oku kapako onumbi eyi kuenda apuluvi ka tu sukila oku kapako onumbi yaco.

Nda tu kuete ocitangi la manji umue catiamẽla kolomilu, tu sukila oku tetulula ocitangi caco poku kuama olonumbi via Yehova, oku kuama ovisimĩlo vietu muẽle hacoko. (Olosapo 14:12) Ndomo ca lekisiwa la Yesu, tu sukila oku tetulula lonjanga ovitangi oco ka vika li vokiye. (Mateo 5:23-26) Ci sumuisa calua oku mola okuti Akristão vamue va siata oku tetuluila ovitangi viavo kombonge. Paulu wa popia hati: “Okuliyalela kuaco akanga kua lomboloka okuti kesunga wa yuliwi.” Momo lie? Momo ocituwa caco ci lekisa okuti ka va sumbilile ekongelo, kuenda Suku tu kasi oku fendela. Omo liaco tu sukila oku kũlĩhĩsa ciwa epulilo Paulu a linga liokuti: “Ka ca velelepo hẽ oku lingiwa lãvi?”​—Ocinimbu 7.

Paulu wa lombololavo okuti Suku wa linga esokiyo liwa lioku tetulula ovitangi vekongelo. Paulu wa lekisa okuti akulu vekongelo va ‘kuete olondunge vioku tetuluila vamanji,’ kueci catiamẽla kovina “viomuenyo ulo,” momo va kuete ukũlĩhĩso Wovisonehua. (Ovinimbu 3-5) Yesu wa tukula ananga atatu a tu kuatisa oku tetulula ovitangi viatiamẽla kakandu anene: Catete, oku tetula ocitangi caco pokati kava va lilueyela; cavali, nda kavali  kavo ka va tẽla oku tetulula ocitangi caco, va vilikiya ombangi yimosi ale vivali; kuenda catatu; oku vilikiya akulu vekongelo oco va tetulule ocitangi caco.​—Mateo 18:15-17.

Ocili okuti akulu vekongelo halonganjiko vioku tetulula ovitangi Viakristão viatiamẽla kolomilu. Ovo ka va eci olonumbi vioku tetulula ovitangi violomilu pokati ka vamanji. Pole, va eca ekuatiso komanu oku kapako olonumbi Viovisonehua oco va tetulule ovitangi viavo lombembua. Nda ocitangi caco ca tatama, ovo va pinga ekuatiso kumitavaso onyula akongelo ale Koseketa Yolombangi Via Yehova. Pamue ku molẽha ovitangi vimue okuti ka ci sukila oku kuama onumbi ya Paulu. Ovitangi viaco vipi?

Olonjanja vimue ci sukila oku tetula ovitangi vitito locisola kuenda ombembua. Pamue poku tepa olohuela, kuli onumbi yecelela okuti ohueli yimue oyo lika yi kuata omoko yoku tata omãla, oku tambula olombongo kombango, oku tambula ekuatiso liombiali, kuenda ovina vikuavo. Olonjanja vimue manji umue o vetiyiwa oku pinga ekuatiso kolonganji. *

Nda Ukristão o nõla oku ambata ocitangi caco kombonge kuenje va ci tetulula lombembua, ka lueya onumbi ya Paulu. * Pole, Akristão va pitisa kovaso oku sivaya onduko ya Yehova kuenda oku li kuata omunga vekongelo. Olondonge via Kristu vi limbukiwila kocisola va li kuetele pokati kuenda ocisola caco, “ka ci lisandela ovina viaco muẽle.”​—1 Va Korindo 13:4, 5; Yoano 13:34, 35.