Liatete Liasapulo 10:1-14
-
Olofa via Saulu kuenda viomãla vaye (1-14)
10 Va Filisiti va kala oku liyaka lo Isareli. Kuenje alume vo Isareli va tila va Filisiti kuenda valua va pondiwila Komunda Giliboa.+
2 Va Filisiti vamamako oku landula ocipepi Saulu kumue lomãla vaye kuenje va Filisiti va ponda Yonatão, la Avinadave kuenda Malikisua okuti,+ omãla va Saulu.
3 Uyaki woku katukila Saulu wa livokiya kuenda vakualohonji vo sanga kuenje eye wa lemẽhiwa la vakualohonji.+
4 Noke Saulu wa sapuila ulume ukuakuambata ovimalẽho viaye viuyaki hati: “Pola osipata yove kuenda ndi ponde oco alume ava ka va seviwile evamba ka va keye kuenje va ndi tata lãvi*+ loku ndi ponda.” Pole, ulume ukuakuambata ovimalẽho viaye viuyaki ka tavele, momo wa kuata usumba walua. Omo liaco, Saulu wa tikula osipata, yu wa kupukila kilu liaco.+
5 Eci ulume ukuakuambata ovimalẽho viaye viuyaki a mola okuti Saulu wa fa, eye wa kupukilavo kilu liosipata yaye muẽle kuenje wa fa.
6 Omo liaco, Saulu lomãla vaye vatatu va fa kuenda vosi vakuanjo yaye va fila kumosi.+
7 Eci omanu vosi va Isareli vana va kala vocimbota* va mola okuti, asualali va tila kuenda Saulu lomãla vaye va fa, ovo va fetika oku tunda valupale avo loku tila; kuenje va Filisiti veya yu va a piñala.
8 Keteke lia kuamamo, eci va Filisiti veya oco vongolole ovina viovivimbi, va sanga Saulu lomãla vaye okuti, va fila Komunda Giliboa.+
9 Kuenje ovo vo lulisa, va teta utue waye kuenda va tikula ocimalẽho caye cuyaki kuenje ovo va tuma ondaka kofeka ya va Filisiti oco va sandeke esapulo koviteka viavo+ kuenda komanu.
10 Kuenje ovo va kapa ocimalẽho caye cuyaki vonjo* ya suku yavo kuenda va tulika ekõlõkõlo liaye vonjo ya Dagoni.+
11 Eci vosi vo ko Yavesi+ vo Gileada va yeva ovina viosi va Filisiti va linga ku Saulu,+
12 asualali vosi va katuka kuenje vambata etimba lia Saulu kuenda atimba vomãla vaye. Va a tuala toke ko Yavesi kuenda va kenda akepa avo vemẽhi liuti unene ko Yavesi+ kuenje va likandangiya oku lia oloneke epanduvali.
13 Omo liaco, Saulu wa fa omo liekambo lioku kala ukuacili ku Yehova, momo eye ka pokuile kondaka ya Yehova+ kuenda wa sandiliya ukuakuvangula lolondele+
14 okuti ka kũlĩhĩsile Yehova. Omo liaco, Eye wo weca kolofa kuenda wa eca usoma ku Daviti omõla a Jese.+
