Elivulu Liavali Lia Samuele 1:1-27
1 Noke liolofa via Saulu, eci Daviti a tiuka koku yula* va Amaleke, Daviti wa kala ko Cikilage+ oloneke vivali.
2 Keteke liatatu, kueya ulume umue wa tunda kocilombo ca Saulu luwalo waye wa toka toka kuenda kutue waye kua kala oneketela. Eci a pitĩla ku Daviti, wa petamisa ocipala caye posi loku u kekamẽla.
3 Daviti wo pula hati: “Pi wa tunda?” Eye wa tambulula hati: “Ame nda puluka kocilombo co Isareli.”
4 Daviti wo pula hati: “Nye ca pitako? Mange ohenda, sapuileko.” Ulume waco hati: “Omanu va tila kuyaki kuenda valua va lemẽhiwa kuenje va fa. Saulu lomõlaye Yonatão lavovo va fa.”+
5 Noke Daviti wa pulisa ulume waco wo nenela esapulo hati: “Wa kũlĩha ndati okuti Saulu lomõlaye Yonatão va fa?”
6 Ulume wa tambulula hati: “Ame nda kala Komunda Giliboa+ kuenda nda mola okuti Saulu wa liyeka kunga waye kuenje akãlu uyaki la vakuakuendela kolokavalu va kala oku amela kokuaye.+
7 Eci eye a vanja konyima kuenje wa ndi mola, wa mbilikiya kuenda nda tambulula hati: ‘Ame ulo!’
8 Eye wa mula hati: ‘Ove elie?’ Ndo tambulula siti: ‘Ame ndu Amaleke.’+
9 Noke eye wa popia hati: ‘Amela kokuange oco o ndi ponde, ñasi oku tala ohali yalua, pole, handi ñasi lomuenyo.’
10 Ndeya ocipepi laye kuenje ndo ponda,+ momo nda limbuka okuti eye ka puluka, omo wa lemẽhiwa calua. Noke ndopa ekolowa kutue waye locinunga ca kala kokuokuo kuaye kuenje nda vi nena kulo ku cime cange.”
11 Omo liaco, Daviti wa tola tola uwalo waye kuenje alume vosi va kala laye haico va linga.
12 Ovo va litetela, va lila, va likandangiya oku lia+ toke koñolosi omo lia Saulu, lomõlaye Yonatão, lomanu va Yehova kuenda onjo yosi ya Isareli,+ momo va pondiwa losipata.
13 Daviti wa pula ulume waco wo nenela esapulo hati: “Pi wa tunda?” Eye wa tambulula hati: “Ndimõla ocingendeleyi cimue okuti u Amaleke.”
14 Daviti wo pula hati: “Momo lie kua kuatelele usumba woku õluila eka liove oco o ponde ombuavekua ya Yehova?”+
15 Noke Daviti wa vilikiya umue pokati kakuenje vaye loku popia hati: “Enju kulo, ponda ulume u.” Kuenje wo lemẽha, yu wa fa.+
16 Daviti wo sapuila hati: “Osonde yove yi wile kutue wove muẽle, momo omẽla wove muẽle wa ku pisa eci wa popia hati: ‘Nda ponda ombuavekua ya Yehova.’”+
17 Noke Daviti wa imbila Saulu lomõlaye Yonatão ocisungo celisiõsuĩlo,*+
18 loku handeleka okuti, omanu vo ko Yuda va sukila oku lilongisa ocisungo caco ca tukuiwa okuti, “Ohonji,” haico ca sonehiwa velivulu lia Yasara hati:+
19 “A Isareli omanu vove va pondiwa kovitumãlo viove via lepa.+
Alume va pama va kupuka!
20 Ku ka ci sapule ko Gati;+Ku ka ci sapule volokololo vio ko Asikelone,Sanga omãla vakãi va va Filisiti va ka yolela,Sanga omãla vakãi valume vana ka va seviwile evamba va ka sanjuka.
21 Ene alomunda vio ko Giliboa,+Kokuene, ka ku ka kale owume ndaño ombela,Ndaño ovapia a ima olombanjaile vi kola,+
Momo oko kua tombiwila ociyepelo calume va pama,Ociyepelo ca Saulu ka ca wavekiwile vali lulela.
22 Ohonji ya Yonatão ka ya tiukaile kosonde ya vana va fa,Ndaño kulela womanu va pama,+Kuenda osipata ya Saulu ka ya tiukaile okuti ka yi kuata onima.+
23 Saulu la Yonatão,+ va soliwile* calua vokuenda kuomuenyo wavo,Ndaño ceci va fa ka va tepiwile.+
Va enda oku lupuka calua okuti olongonga vi sule,+Va pamẽle calua okuti olohosi vi sule.+
24 Amãla vakãi vo Isareli, lili Saulu,Una wa ku walisi lohusu laliposuiso,Haeye wa kapa aposuiso ulu kuwalo wene.
25 Vana va pama va kupuka kuyaki!
Yonatão wa fila kovitumãlo viove via lepa!+
26 Amanjange a Yonatão, nda sumua mekonda liove;Nda ku solele calua.+
Ocisola cove kokuange ca velelepo okuti ocisola cakãi ci sule.+
27 Vana va pama va kupukaKuenda ovimalẽho viuyaki via nyõliwa!”
