Esekiele 19:1-14
-
Ocisungo celisiõsuĩlo catiamẽla kasongui vo Isareli (1-14)
19 “Ove imba ocisungo celisiõsuĩlo* catiamẽla kasongui vo Isareli
2 kuenda popia hati:
‘Ina yove o sokisiwa la nye? Ina yove o sokisiwa lohosi yomange pokati kolohosi.
Eye wa enda oku pekela pokati kolohosi viamalẽhe* haivio via pama kuenje wa tata omãla vaye.
3 Eye wa tata yimue pokati kolohosi vitito kuenje oyo ya linga ohosi ya pama yumalẽhe.+
Oyo ya lilongisa ndomo yi nyanyõla ocinyama ca kuatiwa,Oyo ya liavo omanu.
4 Olofeka via yeva ovina viatiamẽla kokuayo kuenje va yi kuatela vocitunu cavo,Kuenje ovo va kapa olonjolo kenyulu liayo kuenda va yi nena kofeka Yegito.+
5 Eye wa talamẽla kuenje wa limbuka okuti, ka kua kaile elavoko lioku tiukila kuayo.
Omo liaco, wa tikula ohosi yikuavo yitito kuenda wa yi tuma kosamua ndohosi ya pama yumalẽhe.
6 Oyo ya enda pokati kolohosi kuenda ya linga ohosi ya pama yumalẽhe.
Oyo ya lilongisa ndomo yi nyanyõla ocinyama ca kuatiwa kuenda oku lia omanu.+
7 Oyo ya ñuala pokati kolosapalalo viavo vi kuete oviteyuilo kuenda ya nyõla alupale avo,Oco oku koma kuayo ku yevale vofeka yi kasi upolokoso.+
8 Olofeka vina via kala ocipepi, via yi ñualelapo oco va yi kapele owanda,Kuenje va yi kuatela vocitunu cavo.
9 Va yi nãla lolonjolo va kapa kenyulu liayo kuenje va yi kapa vocamba kuenda va yambata ku soma yo Bavulono.
Ovo va yi yikilamo oco ondaka yayo ka yi ka yevale vali kolomunda via Isareli.
10 Ina yove wa kala nduti wuyuva+ vosonde* yove, una wa tuikiwa ocipepi lovava.
Owo wa ima apako kuenda weyukile ovianja omo liovava alua.
11 Owo wa yova ovianja* via pama via kala ndepangati lia pama liolombiali.
Owo wa kula kuenda wa lepele calua pokati koviti vikuavo,Kuenje owo wa muĩwa omo lioku lepa kuawo kuenda omo liamẽla alua wa kuata.
12 Pole, lonyeño, owo wa tukũiwa+ kuenda wa imbiwa posi,Kuenda ofela yo kutundilo ya kukutisa apako alio.
Ovianja vialio via kõla via tukũiwa, via kukuta+ kuenda via liwa londalu.+
13 Cilo owo wa tuikiwa vekango,Muna ka muli ovava, vofeka ya kukuta.+
14 Ondalu ya lisanduila oku upisa kovianja vialio kuenda ya lia ovisiakata vialio lapako alio,Kuenda ka kua supile ocanja lacimue ca pama ndaño epangati lioku viala.+
“‘Eli esiõsuĩlo limue kuenda olio li ka kala ndelisiõsuĩlo.’”
Atosi Pombuelo
^ Ale “ocisungo cesumuo.”
^ Ale “ayove olohosi.”
^ Ale pamue, “nduyuva vocumbo cove cayuva.”
^ Ale “olombueti.”
