Esekiele 24:1-27
24 Ondaka ya Yehova yeya vali kokuange kunyamo wecea kosãi yekũi, keteke liekũi kosãi yaco yiti:
2 “Amõla omunu, soneha eteke* eli okuti, eteke lietaili. Soma yo ko Bavulono wa fetika oku katukila o Yerusalãi keteke lietaili.+
3 Kuenje va lomboluila olusapo lumue luatiamẽla komanu va sina kuenda popia eci catiamẽla kokuavo hati:
“‘Ca popia Ñala Tõlo Yehova ceci hati:
“Tumbika ombia* yoku telekela; yi kapa piko kuenda kapamo ovava.+
4 Kapa vombia yaco ovinimbu viositu+ okuti, ovinimbu viosi viwa,Ocikalo kuenda epepe; yi yukisa lakepa a nõliwa.
5 Tikula omeme ya velapo yo vocunda+ kuenje longeka olohũi kolonele viosi vemẽhi liombia.
Felula ovinimbu viaco kuenda teleka akepa vombia yaco.”’
6 “Omo liaco, ca popia Ñala Tõlo Yehova ceci hati:
‘Ngongo yolupale lu pesela osonde,+ ombia yoku teleka yi kuete onguyu okuti, onguyu yalio ka yopiwilemo!
Upamo ovinimbu viosi viositu;+ ku ka vi imbile ocela.
7 Momo osonde yalio yi kasi volupale luaco;+ olupale lua yi pesila vewe li sielena.
Oluo ka lua yi pesilile posi oco yi lembikiwe leve.+
8 Oco onyeño yi wenguke loku fetuluinya,Nda sia osonde yalio kilu liewe li sielenaOco okuti oyo ka yi lembikiwa.’+
9 “Omo liaco, ca popia Ñala Tõlo Yehova ceci hati:
‘Ngongo yolupale lu pesela osonde!+
Ndi ka longeka ondunda yimue yolohũi.
10 Longeka olohũi kuenda mĩha ondalu,Teleka ciwa ositu, pesilako usole kuenda ecelela okuti akepa aco a likanga.
11 Kapa ombia kamuli cimue kakala ondalu oco yi sanyeOco okuti opalata yalio yi kusuka ngẽ.
Evĩho liayo li ka yengulukila vokati kalio+ kuenda onguyu yalio yi ka timĩhiwa londalu.
12 Eci ci sumuisa kuenda ci kavisa,Momo onguyu yalua ka yi tundi.+
Yimbi piko ombia yaco kuenda onguyu yalio!’
13 “‘Ove wa vĩhisiwa omo liovilinga viove via vĩha.+ Nda seteka oku ku yelisa, pole, kua yelele kevĩho liove. Ove ku ka yelisiwa toke eci onyeño yange ndi ku kuetele yi tulumũha.+
14 Ame muẽle ndi Yehova, nda ci popia. Eci ci ka tẽlisiwa muẽle. Ndi ka linga eci nda seya, si ka litiukamo, si ka lekisa ohenda kuenda si ka livela.+ Ovo va ka ku sombisa ndomo ci likuata lolonjila viove kuenda lovilinga viove,’ oco Ñala Tõlo Yehova a popia.”
15 Ondaka ya Yehova yeya vali kokuange yiti:
16 “A mõlomunu, ñasi oku upa kokuove ocipikipiki omunu una ove o sole calua.+ Ku ka lisiõsiõle;* ale oku lila, ndaño oku lolula asuẽlẽla.
17 Sukoka puãi ka ci ka yevale kuenda ku ka sumuile ava va fa.+ Wala ekofue liove+ kuenda wala olohaku viove.+ Ku ka yike omẽla wove+ ale oku lia ombolo vakuene* va ku nenela.”+
18 Kuenje nda sapela lomanu komẽle kuenda ukãi wange wa fa koñolosi. Omo liaco, komẽle ya kuamamo nda linga ndeci nda handelekiwile.
19 Omanu va ndi pula vati: “Ove ku tu sapuilako hẽ nda ovina evi o kasi oku linga vi kueteko cimue letu?”
20 Ame nda va tambulula siti: “Ondaka ya Yehova yeya kokuange yiti:
21 ‘Sapuila onjo ya Isareli hati: “Ca popia Ñala Tõlo Yehova ceci hati: ‘Ndi ka sepula ocitumãlo cange ci kola,+ ono yepela liene lialua, ocina vu soli kuenda onjongole yovutima wene. Omãla vene valume lomãla vene vakãi vana ene wa si konyima, va ka pondiwa losipata.+
22 Kuenje vu sukila oku linga ndeci nda linga. Ka vu ka yika omẽla wene kuenda ka vu ka lia ombolo ya neniwa la vakuene.+
23 Ka vu ka lula akofue ene ndaño oku lula olohaku viene. Ka vu ka lisiõsiõla ale oku lila. Pole, vu ka vola omo liakulueya ene+ kuenda vu ka li kuatela usumba omunu lukuavo.
24 Esekiele wa linga ndondimbukiso kokuene.+ Ndeci eye a linga haico ene vu ka linga. Eci ovina viaco vi ka lingiwa, ene vu ka kũlĩha okuti ame Ñala Tõlo Yehova.’”’”
25 “Catiamẽla kokuove a mõlomunu, keteke ndi ka tambula ombonge yavo okuti oyo eposo liono yesanju liavo, yina ovo va sole, onjongole yovutima wavo kumue lomãla vavo valume kuenda omãla vavo vakãi,+
26 omunu umue wa puluka o keya kokuove oku ku sapuila eci ca pita.+
27 Keteke liaco, o ka yikula omẽla wove kuenda o ka vangula la una wa puluka kuenje ove ku ka kala vali ocitende.+ Ove o ka kala ndondimbukiso kokuavo kuenje va ka kũlĩha okuti, ame ndi Yehova.”
Atosi Pombuelo
^ Lit., “onduko yeteke.”
^ Ale “ombia yimue yoku telekela ya sanjavala.”
^ Ale “pupola vonete yove.”
^ Lit., “ombolo yalume.”
