Esekiele 29:1-21
29 Kunyamo wekũi, kosãi yekũi keteke 12 liosãi, ondaka ya Yehova yeya kokuange, yiti:
2 “A mõlomunu, imba ovaso konele ya Fareo soma Yegito kuenda imba owanji woku u katukila kuenda woku katukila o Egito yosi.+
3 Popia olondaka viokuti: ‘Ca popia Ñala Tõlo Yehova ceci hati:
“Nda linga unyãli wove, a Fareo soma Yegito,+
Acimuandu cinene ci kasi pokati kolono vio Nilu,*+
Una wa popia hati: ‘Olui Nilu luange, lua tiamẽla kokuange.
Nda lu pangela oco lu kale luange.’+
4 Ndi ka kapa olonjolo volombanjo viove kuenda ndi ka ecelela okuti, olombisi vio Nilu yove vi kakatela kakaka ove.
Ndi ka kupa vo Nilu yove kumue lolombisi viosi vio Nilu vi kakatela kakaka ove.
5 Ndi ka ku yanduluka vekalasoko kumue lolombisi viove viosi vio Nilu yove.
Ove o ka kupukila vusenge kuenda lomue o ka ku ongolola ndaño oku ku kenda.+
Ndi ka ku eca ndokulia kovinyama viovusenge vio kilu lieve kuenda kolonjila vio kilu.+
6 Kuenje olonungi viosi vio Kegito vi ka kũlĩha okuti, ame ndi Yehova,
Ovo ka va ka kuatisa vali onjo ya Isareli momo va linga ndocinimbu cimue colundeya.*+
7 Eci ovo va kuata peka liove, ove wa teka,
Kuenda ove wa va lingisa okuti apepe avo a toka.
Eci ovo va kunamẽla kokuove, ove wa teka,
Kuenje wa lingisa okuti ovolu* avo a hongua.”+
8 “‘Omo liaco, ca popia Ñala Tõlo Yehova ceci hati: “Ñasi oku nena osipata kokuove+ kuenda ndi ka ponda pokati kove ci kaile omanu ale ovinyama.
9 Ofeka Yegito yi ka siala upolokoso kuenda ocitumãlo cimue calunda;+ kuenje va ka kũlĩha okuti ame ndi Yehova, momo ove* wa popia hati: ‘Olui Nilu lua tiamẽla kokuange;* ame nda lu panga.’+
10 Omo liaco, nda linga unyãli wove kuenda unyãli wo Nilu kuenje ndi ka lingisa okuti ofeka Yegito yi siala alunda loku kukuta, ekango limue liekalasoko,+ oku upisa ko Migidolo,+ toke ko Suwene+ toke kongave yo Etiopia.
11 Ka mu ka pita omãhi yomunu ale ekasa liocinyama+ kuenda lomue o ka tungilamo vokuenda kueci ci soka 40 kanyamo.
12 Ndi ka lingisa okuti ofeka Yegito yi velapo koku siala alunda okuti, olofeka vikuavo ci sule kuenda alupale alio a ka velapo koku siala alunda vokuenda kueci ci soka 40 kanyamo;+ kuenje ndi ka sanduila va Egito pokati kolofeka loku va sanduila pokati kovaimbo.”+
13 “‘Ca popia Ñala Tõlo Yehova ceci hati: “Noke 40 kanyamo, ndi kongolola vali va Egito pokati komanu vana ovo va sanduiwila;+
14 Ndi ka nena vali olomandekua vio Kegito kofeka yo Patirosi+ okuti, ofeka yavo va tundile kuenda oko va ka lingila usoma umue ka u kuete esilivilo.
15 Ovosoma akuavo a ka velapo okuti o Egito yi sule kuenda ka yi ka viala vali olofeka vikuavo+ kuenje ndi ka va tepulula okuti ka va ka tẽla oku tambula olofeka vikuavo.+
16 Oyo lalimue eteke yi ka kala vali ono yekolelo lionjo ya Isareli,+ pole, yi ka kala lika ndonjivaluko kokuavo omo lieko liavo poku tiukila ku va Egito oku pinga ekuatiso. Kuenje ovo va ka kũlĩha okuti, ame Ñala Tõlo Yehova.”’”
17 Kunyamo 27, kosãi yatete keteke liatete liosãi, ondaka ya Yehova yeya kokuange, yiti:
18 “A mõlomunu, Nevukandesa*+ Soma yo Bavulono wa kisika olohoka viaye oku linga upange wa tĩla oco vi katukile o Turo.+ Ovitue viosi via linga atoto kuenda ekova liapepe avo a tunyulũha. Pole, eye kumue lolohoka viaye ka va tambuile ofeto layimue poku katukila o Turo.
19 “Ca popia Ñala Tõlo Yehova ceci hati: ‘Ñasi oku eca ofeka Yegito ku Nevukandesa* Soma yo Bavulono+ kuenda eye o kambata ukuasi walio loku tambula ovina vialua via pundiwa vofeka yaco; kuenje vi ka kala ofeto yolohoka viaye.’
20 “‘Ndi ka eca ofeka Yegito ndofeto yaye,* omo liupange va ndi lingila,’+ oco Ñala Tõlo Yehova a popia.
21 “Keteke liaco, ndi ka ecelela okuti, pokati konjo ya Isareli*+ pa kala unene* kuenda ndi ka eca kokuove epuluvi lioku vanguila pokati kavo; kuenje ovo va ka kũlĩha okuti ame ndi Yehova.”
Atosi Pombuelo
^ Vocinimbu eci kuenda vovinimbu vi kuãimo, onduko “Nilu” yi tiamisiwila kolui kuenda kolono vialio vioku tapela.
^ Lit., “omuenge.”
^ Lit., “olombunda.”
^ Lit., “eye.”
^ Okuti Fareo.
^ Lit., “Nevukadresa,” onjila yikuavo yoku soneha.
^ Lit., “Nevukadresa,” onjila yikuavo yoku soneha.
^ Okuti, oku katukila o Turo.
^ Ale “oku eca ongusu konjo ya Isareli.”
^ Lit., “ombinga.”
