Esekiele 33:1-33
33 Ondaka ya Yehova yeya kokuange yiti:
2 “A mõlomunu, sapela lomãla vomanu vove+ kuenje va sapuila hati:
“‘Sokolola okuti ndi nena osipata vofeka+ kuenda omanu vosi vofeka yaco va nõla ulume umue kuenda vo kapa ndondavululi yavo,
3 kuenje poku mola okuti, osipata yi kasi oku iya vofeka, eye o sika ombinga kuenda o lungula omanu.+
4 Nda umue o yeva ocileñi combinga, pole, ka kapiko elungulo liaco+ kuenje osipata yiya loku u ponda, eye o ka kuata eko omo liolofa viaye muẽle.*+
5 Eye wa yeva ocileñi combinga, pole, ka kapeleko elungulo liaco. Eye o ka kuata eko omo liolofa viaye muẽle.* Nda eye wa kapeleko elungulo, omuenyo waye nda wa popeliwa.
6 “‘Pole, nda ondavululi ya mola okuti osipata yi kasi oku iya, pole, oyo ka yi siki ombinga+ kuenda omanu ka va lunguiwa kuenje osipata yiya loku ponda omunu umue pokati kavo, omunu waco o fa omo lieko liaye muẽle, pole, osonde yaye ndi ka yi kisika kondavululi.’*+
7 “Catiamẽla kokuove, a mõlomunu, nda ku nõla oco o linge ondavululi yonjo ya Isareli; kuenda eci o yeva ondaka yimue yi tunda vomẽla wange, o sukila oku eca kokuavo elungulo li tunda kokuange.+
8 Eci ndi sapuila omunu umue ondingaĩvi siti: ‘Andingaĩvi ove o ka fa muẽle!’+ pole, ove ku popi cimue oco o lungule ondingaĩvi okuti yi pongoloka kũvi wayo, oyo yi ka fa ndomunu umue ondingaĩvi omo lieko liayo muẽle,+ pole, ndi ka kisika osonde yayo kokuove.
9 Pole, nda wa lungula ondingaĩvi oco yi siepo onjila yaye yĩvi kuenje yi likala oku pongolola ovilinga viayo, oyo yi ka fa omo lieko liayo,+ pole, ove o ka popela omuenyo wove muẽle.+
10 “Kuenje ove a mõlomunu, sapuila onjo ya Isareli hati: ‘Ene wa popi hati: “Esino lietu kuenda akandu etu a linga ocilemo kokuetu loku tu nenela ehonguo;+ omo liaco, tu kamamako ndati oku kala lomuenyo?”’+
11 Va sapuila hati: ‘“Ndeci ame ndi kasi lomuenyo,” oco Ñala Tõlo Yehova a popia hati: “Ame si sanjukila oku fa kuondingaĩvi,+ pole, ndi yongola okuti ondingaĩvi yi pongolola onjila yayo yĩvi+ kuenda ya amamako lomuenyo.+ Tinduki, tinduki kolonjila viene vĩvi,+ momo lie vu fila Anjo ya Isareli?”’+
12 “Kuenje ove a mõlomunu, sapuila omãla vomanu vove hati: ‘Esunga liomunu ukuesunga ka li ko popela eci a lekisa esino;+ ndaño evĩho liomunu ondingaĩvi ka liu kokela ocilondokua eci a siapo evĩho liaye;+ ndaño omunu ukuesunga ka ka tẽla oku amamako oku kala lomuenyo omo liesunga liaye keteke eye a linga ekandu.+
13 Eci ndi sapuila ukuesunga siti: “Ocili muẽle ove o kamamako lomuenyo,” kuenje eye o kolela kesunga liaye muẽle noke o linga eci cĩvi,*+ lavimue pokati kovilinga viaye viesunga vi ka ivalukiwa, pole, eye o ka fa omo liũvi a linga.+
14 “‘Eci ndi sapuila ondingaĩvi siti: “Ocili muẽle ove o fa,” kuenje oyo yi siapo ekandu liaye kuenda o linga eci cesunga haico ciwa,+
15 kuenje ondingaĩvi yi tiuwiya eci ya tambuile ndonjeke+ kuenda yi feta eci ya nyãnele+ loku endela voviholo vi eca omuenyo okuti, ka yi lingi cimue cĩvi oyo yi kamamako muẽle oku kala lomuenyo.+ Oyo ka yi ka fa.
16 Ame si ko yambula omo liakandu eye a linga.+ Omo lioku linga ovina viesunga haivio viwa, eye o kamamako muẽle oku kala lomuenyo.’+
17 “Pole, omanu vove va popia vati: ‘Onjila ya Yehova ka ya sungulukile,’ osimbu okuti olonjila viavo ovio ka via sungulukile.
18 “Nda omunu umue ukuesunga o siapo esunga liaye kuenje o linga eci cĩvi, eye o sesamẽla oku fa omo lieci a linga.+
19 Pole, nda omunu umue ondingaĩvi o siapo ovina vĩvi kuenda o linga eci ciwa haico cesunga, eye o kamamako lomuenyo omo lioku ci linga.+
20 “Pole, ene vu popia hati: ‘Onjila ya Yehova ka ya sungulukile.’+ Ame ndi ka sombisa omunu lomunu pokati kene ndomo ci likuata lolonjila viaye, Anjo ya Isareli.”
21 Kesulilo liunyamo 12 wumandekua wetu, kosãi yekũi, keteke liatãlo liosãi, ulume umue okuti wa puluka ko Yerusalãi weya kokuange+ kuenje wa popia hati: “Olupale lua tambuiwa!”+
22 Kuteke wa pita osimbu ulume wa puluka ka pitĩlile, eka lia Yehova lieya kokuange kuenda eye wa yikula omẽla wange osimbu ulume wa puluka ka pitĩlĩle kokuange komẽle. Omo liaco, omẽla wange wa yikuka kuenje sia kaile vali ocitende.+
23 Noke ondaka ya Yehova yeya kokuange yiti:
24 “A mõlomunu, olonungi vialupale a nyõliwa+ vi kasi oku popia catiamẽla kofeka yo Isareli viti: ‘Avirahama wa kala ño ulume umosi, pole, ndaño ndoco wa piñala ofeka.+ Pole, etu tua lua; ocili muẽle okuti, ofeka ya eciwa kokuetu ndocipiñalo.’
25 “Omo liaco, va sapuila hoti: ‘Ca popia Ñala Tõlo Yehova ceci hati: “Ene vu kasi oku lia ositu losonde yaco+ kuenje vu petuila ovaso ene koviteka viene via vĩha* kuenda vu amamako oku pesela osonde.+ Omo liaco, momo lie vu sesamẽlela oku piñala ofeka?
26 Ene wa koleli kosipata yene,+ wa litumbiki kovilinga viumbondo kuenda omunu lomunu pokati kene wa pekela lukãi womunu a lisungue laye.+ Omo liaco, momo lie vu sesamẽlela oku piñala ofeka?”’+
27 “Eci oco o sukila oku va sapuila hoti: ‘Ca popia Ñala Tõlo Yehova ceci hati: “Ocili muẽle, ndeci ame ñasi lomuenyo, vana va kasi vovingululu va ka kupuka losipata; vana va kasi vanyãla ndi ka va eca ndokulia kovinyama viovusenge; kuenje vana va kasi voviteyuilo kuenda valeva va ka fa omo liuvei.+
28 Ndi ka lingisa okuti ofeka yosi yi kala ekango limue liekalasoko+ kuenda epela lialio, li ka sulila kuenje olomunda vio Isareli vi ka siala alunda+ okuti, lomue o ka pitamo.
29 Kuenje ovo va ka kũlĩha okuti, ame ndi Yehova eci ndi lingisa ofeka yosi ekango limue liekalasoko,+ omo liovina viosi via vĩha ovo va linga.”’+
30 “Catiamẽla kokuove a mõlomunu, omanu vove va kasi oku vangula omunu lukuavo catiamẽla kokuove ocipepi lovimbaka kuenda papito olonjo.+ Ovo va kasi oku vangula omunu lukuavo, omunu la manjaye vati: ‘Enjui, tu yeveleli ondaka ya tunda ku Yehova.’
31 Ovo va ka liongolola oco va tumãle kovaso ove ndomanu vange; kuenda ovo va ka yeva olondaka viove, pole, ka va ka vi kapako.+ Va popia lika uhembi watiamẽla kovina va sole, pole, utima wavo u livela onganyu yevĩho.
32 Tala! Ove kokuavo o kasi ndocisungo cimue cocisola ci imbiwa londaka yimue ya posoka kuenda ci sikiwa ciwa locikuata covisikilo ca pangiwa lovikolo. Ovo va ka yeva olondaka viove, pole, lomue o ka linga ovina vi likuata lolondaka viaco.
33 Eci olondaka viaco vi ka tẽlisiwa, omo vi ka tẽlisiwa muẽle, ovo va ka kũlĩha okuti uprofeto umue wa kala pokati kavo.”+
Atosi Pombuelo
^ Lit., “osonde yaye yi ka wila kutue waye muẽle.”
^ Lit., “osonde yaye yu ko wila eye muẽle.”
^ Ale “Ndi ka lingisa okuti ondavululi yi kuata eko omo liosonde yaye.”
^ Ale “oku lekisa ekambo liesunga.”
^ Ondaka yaco kelimi lio Heveru citava okuti, yi tiamisiwila kondaka “aniña” kuenda ya enda oku tukuiwavo ndondaka yoku nyehũla.
