Esekiele 35:1-15
-
Ocitumasuku coku katukila olomunda vio Seire (1-15)
35 Ondaka ya Yehova yeya vali kokuange yiti:
2 “A mõlomunu, imba ovaso ove kovaimbo a kasi kolomunda vio Seire+ kuenda imba owanji woku yi katukila.+
3 Yi sapuila hati: ‘Ca popia Ñala Tõlo Yehova ceci hati: “Nda linga unyãli wove, Avaimbo a kasi kolomunda vio Seire kuenda ame ndi koluĩla eka liange kokuove oco li ku katukile kuenje ove o ka linga ekango limue liekalasoko.+
4 Ndi ka lingisa alupale ove ovingululu kuenda ove o ka linga ekango limue liekalasoko;+ kuenje o ka kũlĩha okuti ame ndi Yehova.
5 Momo ove wa lekisa ungangala walua+ kuenda wa eca va Isareli oco va pondiwe kotembo yohali yavo okuti, kotembo yekangiso liavo lia sulako.”’+
6 “‘Omo liaco, ndeci ndi kasi muẽle lomuenyo,’ oco Ñala Tõlo Yehova a popia hati: ‘Omo okuti nda ku nõlela oku fa*+ kuenda ove wa suvuka vana wa ponda, ove ku ka puluka kolofa.+
7 Ndi ka lingisa ovaimbo a kasi kolomunda vio Seire ekango limue liekalasoko+ kuenje ndi ka kundula wosi o pitamo kuenda wosi o tiukilamo.
8 Ndi ka yukisa olomunda viove lovivimbi; kuenje vana va pondiwa losipata va ka kupukila koviwulu viove, vovimbota viove kuenda volondui viove viosi.
9 Ndi ka ku lingisa elunda otembo ka yi pui kuenda valupale ove ka mu ka tungiwa vali;+ kuenje ene vu ka kũlĩha okuti, ame ndi Yehova.’
10 “Momo ove wa popia okuti: ‘Olofeka evi vivali lovaimbo ava avali vi ka linga viange kuenda tu ka vi piñala,’+ ndaño okuti Yehova oko muẽle a kala.
11 ‘Omo liaco, ndeci ñasi muẽle lomuenyo,’ oco Ñala Tõlo Yehova a popia, ‘ndi ka linga love ndomo ci likuata lonyeño yimuamue kuenda lesepa ove wa lekisa konya yove wa kuatela omanu vange;+ kuenda ame ndi ka lingisa okuti, ame muẽle ndi ka kũlĩhĩwa pokati kavo eci ndu ku sombisa.
12 Kuenje ove o ka kũlĩha okuti ame muẽle Yehova, nda yeva ovina viosi ka via sungulukile ove wa popia viatiamẽla kolomunda via Isareli eci wa popia hati: “Ovio via siala elunda kuenda via eciwa kokuetu oco tu vi nyõle.”*
13 Ene wa popi lepela eci catiamẽla kokuange kuenda wa luisi olondaka viene viatiamẽla kokuange.+ Nda yeva ovina viaco viosi.’
14 “Ca popia Ñala Tõlo Yehova ceci hati: ‘Ofeka yosi yi ka sanjuka eci ndi ka ku lingisa ndekango limue liekalasoko.
15 Ndeci ove wa sanjukile eci ocipiñalo conjo ya Isareli ca siala elunda, haico ndi ka linga love.+ Ove o ka kala ocingululu cimue ca siala elunda, Avaimbo a kasi kolomunda vio Seire kuenda o Edome yosi;+ kuenje omanu va ka kũlĩha okuti, ame ndi Yehova.’”
