Esekiele 38:1-23
38 Ondaka ya Yehova yeya vali kokuange yiti:
2 “A mõlomunu, ñualisa ocipala cove ku Goge kofeka ya Magoge,+ usongui wa velapo* wo Meseke la Tuvale+ kuenda imba owanji woku u pisa.+
3 Popia hati: ‘Ca popia Ñala Tõlo Yehova ceci hati: “Nda linga unyãli wove A Goge, usongui wa velapo* wo Meseke kuenda wo Tuvale.
4 Ndi ka pongolola ocimãho cove kuenda ndi ka kapa olonjolo volombanjo viove+ kuenje ndi ka ku tundisa lolohoka viove viosi,+ olokavalu, la vakuakuendela kolokavalu okuti, vosi yavo va walisiwa lulamba, owiñi walua wasualali loviyepelo vinene kuenda oviyepelo vitito* okuti, vosi yavo va limalẽha lolosipata;
5 va Persia, va Etiopia kuenda va Puti,+ va kasi lavo okuti, vosi yavo loviyepelo vitito kuenda ovikoko;
6 la Gomere lolohoka viaye viosi, kumue lovitumbulukila via Togarma+ vio kolonepa vio kupãla konano, kumue lolohoka viaye viosi okuti, omanu valua va kasi love.+
7 “‘“Liangiliyi, lipongiyi ene muẽle, ove kumue lolohoka viove viosi vina via likongela kokuove kuenje ove o ka kala usongui* wavo.
8 “‘“Ndi ka tiamisila utima wange kokuene noke yoloneke vialua. Koloneke via sulako vianyamo, vu ka lundula ofeka yomanu vana okuti va tumbuluiwa kenyõleho liosipata, vana vongoluiwa pamosi pokati komanu valua haivo va tualiwa kolomunda via Isareli vana okuti, vokuenda kuotembo yalua va nyõliwile. Olonungi viofeka eyi, via tumbuluiwa vali pokati kolofeka kuenda vosi yavo va tunga loku kolapo.+
9 Ove o ka va katukila ndehunguhungu limue liofela kuenda o ka sitika ofeka ndalende, ove kumue lasualali vove kuenda omanu valua va kasi love.”’
10 “Ca popia Ñala Tõlo Yehova ceci hati: ‘Keteke liaco, ove o ka kuata ovisimĩlo vutima wove kuenje ove o ka linga esokiyo liovisimĩlo vimue vĩvi.
11 Ove o ka popia hati: “Ame ndi ka lundula ofeka yina yi kasi ndovaimbo ka a kuete eteyuilo.+ Ndi ka katukila vana okuti va tunga loku kolapo, haivo ka va kuete esakalalo, vosi yavo va tunga kovaimbo ka a kuete oviteyuilo okuti ka a kuete ovimbaka, ovikundiko ale olombundi.”
12 Ocimãho cove ci ka kala oku tambula ovina vialua vioku punda, oku tambula ovitumãlo vimue vialunda+ okuti cilo mua tungiwa vali kuenda omanu vamue vongoluiwa pokati kolofeka+ okuti, va kasi oku ongolola ovokuasi kuenda ovikuata+ vana okuti, va kasi vokati kongongo.
13 “‘Sieva+ kuenda Dedane+ la vakualomĩlu vo ko Tarsisi+ kuenda olohoka* vialio viosi va ka ku sapuila vati: “Anga hẽ ove o kasi oku tambula ofeka oco o kuate ovina vialua via pundiwa? Anga hẽ wa kongela olohoka viove oco ambate opalata lulu, oco o punde ukuasi kuenda ovikuata, loku tambula ovina vialua via pundiwa?”’
14 “Omo liaco, imba owanji a mõlomunu kuenda sapuila Goge hati: ‘Ca popia Ñala Tõlo Yehova ceci hati: “Keteke liaco, eci omanu vange va Isareli va ka tunga okuti va kolapo, anga hẽ ove ku ka ci kũlĩha?+
15 Ove o ka tunda kocitumãlo cove, kolonepa viocipãla konano+ ove lomanu valua va kasi love okuti, vosi yavo va kasi oku endela kolokavalu okuti, olohoka vialua viasualali.+
16 Ove o ka katukila omanu vange va Isareli ndeci elende li sitika ofeka. Konepa ya sulako yoloneke, ndi ka ku nena oco o katukile ofeka yange+ oco olofeka vi ñulĩhe eci ndi ka ecelela okuti, ovo va limbuka okuti, ame ndi kola omo liovina ndi linga kokuove, A Goge.”’+
17 “Ca popia Ñala Tõlo Yehova ceci hati: ‘Haveko hẽ una nda tukula kosimbu pocakati covaprofeto vange va Isareli, vana va imba owanji vokuenda kuanyamo alua okuti ove wa ponduile oku va katukila?’
18 “‘Keteke liaco, keteke eci Goge a ka katukila ofeka yo Isareli,’ oco Ñala Tõlo Yehova a popia hati: ‘Onyeño yange yalua yi ka wenguka.+
19 Kombili yange, kondalu yonyeño yange ndi ka vangula; kuenje keteke liaco, ku ka kala ocilemawe cinene vofeka yo Isareli.
20 Mekonda liange, olõsi vio vokalunga, olonjila vio kilu, ovinyama viovusenge, lovinyama viosi vi likoka posi kuenda omanu vosi vo kilu lieve, va ka luluma kuenda olomunda vi ka nyõliwa,+ ovawe a ka kupuka kuenje ovimbaka viosi vi ka kupukila kilu lieve.’
21 “‘Ndi ka tuma osipata yimue oco yi katukile Goge kolomunda viange viosi,’ oco Ñala Tõlo Yehova a popia. ‘Osipata yomunu lomunu, yi ka katukila manjaye muẽle.+
22 Ndi ka nena esombiso liange lioku u katukila lefengi+ kuenda oku pesela osonde; ame ndi ka lokisa ombela yalua kuenda ombela yociwe,+ londalu,+ lofuofuo+ kokuaye kuenda kolohoka viaye lomanu valua va kasi laye.+
23 Kuenje ndi ka li kemãlisa ame muẽle loku li kolisa ame muẽle kuenda oku ecelela okuti ame muẽle ñulĩhĩwa kovaso yolofeka vialua; kuenje ovo va ka kũlĩha okuti, ame ndi Yehova.’
Atosi Pombuelo
^ Ale “usongui ombuale.”
^ Ale “usongui ombuale.”
^ Ociyepelo cimue citito okuti ca enda oku ambatiwa la vakualohonji.
^ Lit., “ondavululi.”
^ Ale “ayove olohosi.”
