Esekiele 4:1-17
4 “Ove a mõlomunu, tikula etisolu li kapa kovaso yove. Sokotuilamo ociluvialuvia colupale lumue okuti, o Yerusalãi.
2 Ñuala ocingonja olupale kolonele viaco,+ tunga ocimbaka cimue okuti ci ñuala olupale,+ tungilako olosapalalo via vakualohonji,+ tungilako ovilombo kuenda ñualisako olomakina vioku nyõla ovimbaka vialio.+
3 Tikula ociyo cimue cutale kuenda ci kapa ndocimbaka pokati kove lolupale. Noke ci vandekela kuenje oco ci ka ñualiwa ocingonja; ove o sukila oku ci ñualisa ocingonja. Oco ci linga ondimbukiso yonjo ya Isareli.+
4 “Noke pekela konele yove yepĩli kuenda li kapa ove muẽle* eko lionjo ya Isareli.+ O ka kuata eko liavo vokuenda kuoloneke ove o ka pekela konele yove muẽle.
5 Ove o sukila oku linga ovina viaco vokuenda kuoloneke vi soka 390, vi likuata lanyamo eko liavo+ kuenda ove o ka kala leko lionjo ya Isareli.
6 Kuenje ove o malusula otembo yaco.
“Noke o ka pekela onjanja yavali okuti, konele yondio kuenda ove o ka kala leko lionjo ya Yuda+ vokuenda kuoloneke 40. Eteke limosi unyamo umosi, eteke limosi unyamo umosi, eci oco ndi kisika kokuove.
7 Kuenje ove o ka imba ovaso kolupale luo Yerusalãi lua ñualiwa ocingonja+ lokuokuo kuove kua sikuluĩwa kuenda o ka imba owanji woku yi katukila.
8 “Tala! ndi ka ku kuta lovikolo oco okuti, ku ñualela konele yove yikuavo toke eci o tẽlisa oloneke viove viocingonja.
9 “Kuenje o sukila oku tikula otiliku, osevata, ocipoke, akunde, lasangu kuenda otiliku yikuavo* kuenje vi kapa vocikuata cimue loku yoka ombolo yove muẽle. Ove o ka yi lia vokuenda kuoloneke viosi o ka pekela konele yove okuti 390 koloneke.+
10 O ka yi pesalisa kuenda o ka lia 20 kolosiekele* viokulia veteke. O ka yi lia valivala a sokiyiwa.
11 “O ka nyua ovava a yongiwa okuti o hine* yimosi yepandu. O ka nyua ovava aco valivala a sokiyiwa.
12 “O ka yi lia ndeci nda wa lia ekende liosevata; o ka yi yokela kovaso avo, lekuatiso lianiña a kukuta omanu ndolohũi.”
13 Yehova wamisako loku popia hati: “Eyi oyo onjila ndomo va Isareli va ka lia ombolo yavo ya vĩha pokati kolofeka ndi ka va sanduila.”+
14 Noke nda popia hati: “Eci hacoko a Ñala Tõlo Yehova! Tunde vumalẽhe wange toke cilo, sia la vĩhisiwa poku lia ositu yocinyama ca lifila ale ceci ca pondiwa,+ ndaño oku kapa cimue ca vĩhisiwa* vomẽla wange.”+
15 Omo liaco, eye wa ndi sapuila hati: “Ci kasi ciwa, ndi ka ecelela okuti, ove o ka yoka ombolo yove laniña ongombe okuti aniña omanu sio.”
16 Noke eye wa ndi sapuila hati: “A mõlomunu, ndi teta olosila* viokulia ko Yerusalãi+ kuenda lesakalalo ovo va ka lia ombolo yofeka ya pesalisiwa+ kuenda lusumba va ka nyua ovava a yongiwa.+
17 Ovina evi, vi ka pita oco okuti ka ku ka kala ombolo lovava, oco va li vanje pokati omunu lukuavo kuenda va hongua omo liekandu liavo.
Atosi Pombuelo
^ Lit., “oyo” okuti konele yepĩli lia Esekiele.
^ Ondaka yo Heveru yi tiamisiwila kotiliku yimue yi sule ya enda oku limiwa Kegito yosimbu.
^ Yi panda 230 kolograma. Tala Alombo. B14.
^ Yi panda 0.6 kalitulu. Tala Alombo. B14.
^ Ale “ca lĩha.”
^ Lit., “oku teya ombueti yombolo.” Citava okuti ci tiamisiwila kolombueti va enda oku pateka ombolo.
