Esekiele 42:1-20
42 Eye wa ngambata konele yonano kocitali co kosamua.+ Kuenje wa ndi nena vohondo yoku lilamo ya kala ocipepi lonepa ya sanjavala,+ kosapalalo ya kuamamo yo konele yutakelo.+
2 Oku lepa kuoku iñilila kuonele yonano, kua sokele 100 kovikeya* kuenda upati walio wa sokele 50 kovikeya.
3 Oyo ya kala pokati kocitali co vokati ca kuata 20 kovikeya vupati+ kuenda osi ya kanduiwa lovawe yocitali co kosamua. Ovimano vialio via limba ovaso kuenda via kuata olosapalalo vitatu via lepa.
4 Kovaso yolohondo vioku lilamo, kua kala okololo yimue yo vokati ya kuata ovikeya+ 10 vupati kuenda 100 kovikeya vusõi* kuenje ovivelo vialio via kala konele yonano.
5 Olohondo vioku lilamo vio kilu yosapalalo via likupikile calua okuti vio kombuelo kuenda vio vokati vi sule, momo ovimano via kala vinene okuti ovitumãlo vialio vi sule.
6 Momo ovio via kala kolosapalalo vitatu via lepa, pole, ka via kuatele olongunji ndolongunji viocitali. Eli olio esunga lieci olosapalalo vio kilu via likupikilile calua okuti vio kombuelo kuenda vio vokati vi sule.
7 Ocimbaka covawe co kosamua cina ca kala ocipepi lolohondo vioku lilamo konele yocitali co kosamua ca imba ovaso kolohondo vikuavo vioku lilamo, ca kuata 50 kovikeya koku lepa.
8 Catiamẽla koku lepa kuolohondo vioku lilamo, vina via kala konele yocitali co kosamua, via kuata 50 kovikeya vupati, pole, vina via imba ovaso kohondo yi kola, via kuata 100 kovikeya.
9 Olohondo vioku lilamo via kuata uvelo umue konele yutundilo wecelela oku pitamo oku upisa kocitali co kosamua.
10 Kua kalavo olohondo vioku lilamo konyima* yocimbaka covawe cocitali konele yutundilo, ocipepi lonepa ya sanjavala yonembele.+
11 Kua kala okololo yimue kovaso yolohondo vioku lilamo ndeyi yolohondo vioku lilamo konele yo konano.+ Oku lepa kuavio lupati wavio via kala vimuamue kuenda via kuata atundilo amuamue lasokiyo amuamue. Apito alio
12 a kala amuamue ndovivelo violohondo vioku lilamo via kala konele yo kombuelo. Kua kala uvelo umue kefetikilo liokololo, kovaso yocimbaka covawe konele yutakelo, poku iñilila.+
13 Noke eye wa ndi sapuila hati: “Olohondo vioku lilamo vi kasi konele yonano kuenda olohondo vioku lilamo vi kasi konele yombuelo, vi kasi ocipepi lonele ya sanjavala+ okuti, olohondo vi kola muna ovitunda vina vi amela ku Yehova vi lila ovilumba vi kola koku kola.+ Vocitumãlo caco, omo va kapa ovilumba vi kola, ocilumba colomema, ocilumba cekandu kuenda ocilumba ceko, momo oco ocitumãlo cimue ci kola.+
14 Eci ovitunda vi iñila, ka citava okuti vi tundila kocitumãlo ci kola oku enda kocitali co kosamua okuti ka vi lula uwalo wavo una va wala poku vumba,+ momo ovowalo aco a kola. Ovio vi ka wala ovowalo akuavo oco vi ende kovitumãlo vina ku kala kala omanu.”
15 Eci eye a mala oku seteka onepa yo vokati konembele,* wa ngambata posamua yombundi ya imba ovaso kutundilo+ kuenda wa seteka ocitumãlo caco cosi.
16 Eye wa seteka onele yo kutundilo lolundeya* luoku seteka. Ndomo ci likuata lolundeya luoku seteka, oyo ya kuata 500 kalundeya koku lepa oku upisa konele yimue toke konele yikuavo.
17 Eye wa seteka onele yo konano kuenda ndomo ci likuata lolundeya luoku seteka, oyo ya kuata 500 kalundeya koku lepa.
18 Eye wa seteka onele yo kombuelo kuenda ndomo ci likuata lolundeya luoku seteka, oyo ya kuata 500 kalundeya koku lepa.
19 Eye wa ñuala toke konele yutakelo. Eye wa seteka 500 kalundeya koku lepa lolundeya luoku seteka.
20 Eye wa yi seteka kolonele vi kuãla. Oyo ya kuata ocimbaka cimue kolonele vialio viosi+ okuti ca kuata 500 kalundeya vusõvi kuenda 500 kalundeya vupati+ oco ku lingiwe etepiso limue pokati keci ci kola leci caño.+
Atosi Pombuelo
^ Yi tiamisiwila kovikeya via lepa. Tala Alombo. B14.
^ Ndomo ca lomboluiwa vo Septuaginta yo Helasi, “ovikeya 100 kusõvi.” Ocisonehua co Heveru ci popia ndoco: “Onjila yukeya umosi.” Tala Alombo. B14.
^ Lit., “vupati wo.”
^ Lit., “onjo yo vokati.”
^ Tala Alombo. B14.
