Esekiele 46:1-24
46 “Ca popia Ñala Tõlo Yehova ceci hati: ‘Ombundi yocitali co vokati yina ya imba ovaso kutundilo+ yamamako oku yikiwa+ vokuenda kuoloneke epandu viupange,+ pole, keteke Liesambata kuenda keteke liosãi yokaliye oyo yi yikuiwa.
2 Usongui o ka iñilila pocindumba combundi+ kuenda o ka talama vocikuli combundi. Ovitunda vi ka eca ovilumba viaye vioku pia elisi kuenda ovilumba viaye viombembua kuenje usongui o ka petamẽla pombundi kuenda o ka tunda. Pole, ombundi ka citava okuti yi yikiwa toke koñolosi.
3 Omanu vo vofeka va ka petamẽlavo kovaso a Yehova poku iñilila kuombundi Kasambata kuenda koku molẽha kuosãi yokaliye.+
4 “‘Ocilumba cosi coku pia elisi cina usongui a ka eca ku Yehova keteke Liesambata, ci kala covitupi epandu violomeme ka vi kuete etondelo kuenda omeme yimosi ka yi kuete etondelo.+
5 Ocilumba colomema ci ka kala co efa* yimosi kocitupi comeme kuenda kovitupi viotulomeme, ci ka kala eci eye a pondola oku eca oku kongelamo o hine* yimosi yulela ko efa lo efa.+
6 Keteke liosãi yokaliye ku lumbiwa onãle ka yi kuete etondelo yopiwa vocunda, lovitupi epandu violomeme kuenda omeme yimosi; okuti viosi yavo ka vi kuete etondelo.+
7 Eye o sukila oku eca ocilumba colomema co efa yimosi konãle, o efa yimosi kocitupi comeme kuenda kovitupi viotulomeme eci eye a tẽla oku linga. Kuenje eye o sukila oku eca o hine yimosi yulela ko efa lo efa.
8 “‘Eci usongui a iñila, o sukila oku iñilila konele yocindumba combundi kuenda eye o sukila oku tundila konjila yimuamue.+
9 Kuenje eci omanu vo vofeka veya kovaso a Yehova vokuenda kuovipito,+ vana veya oku fendela okuti va iñilila kombundi yo konano+ va sukila oku tundila kombundi yo kombuelo,+ vana va iñilila kombundi yo kombuelo va sukila oku tundila kombundi yo konano. Ka citava okuti umue o tundila kombundi a iñilila, momo ovo va sukila oku tundila kombundi yikuavo.
10 Catiamẽla kusongui una o kasi pokati kavo, o sukila oku iñila eci ovo va iñila kuenda o sukila oku tunda eci ovo va tunda.
11 Vokuenda kuovipito,* ocilumba colomeme ci kale co efa yimosi konãle, o efa yimosi kocitupi comeme kuenda kovitupi viotulomeme, eci eye a tẽla oku eca oku kongelamo o hine yimosi yulela ko efa lo efa.+
12 “‘Nda usongui wa linga eliangiliyo liocilumba coku pia elisi+ ale liovilumba viombembua ndocilumba ceciwa lutima wosi ku Yehova, ombundi yi kasi konele yutundilo yi ka yikuiwa mekonda liaye kuenda eye o ka linga eliangiliyo liocilumba caye cosi coku pia elisi kuenda ovilumba viombembua ndomo a siata oku linga keteke Liesambata.+ Noke eci eye a tunda, ombundi yi yikiwa.+
13 “‘Oloneke viosi ove o sukila oku pongiya ocitupi comeme ka yi kuete etondelo yi kuete unyamo umosi ndocilumba coku pia elisi ku Yehova.+ O sukila oku ci linga komẽle lomẽle.
14 Kumue locilumba caco, komẽle lomẽle ove o sukila oku angiliya onepa yepandu yo efa ndocilumba colomema, lonepa yatatu yo hine yulela oco yi nyĩliwe kilu liosema ya fina ndocilumba colomema ceciwa olonjanja viosi ku Yehova. Eci ociholo cimue ka ci pui.
15 Ku lingiwe eliangiliyo liocitupi comeme, ocilumba colomema, lulela kuenje vi ka eciwa omẽle lomẽle ndocilumba coku pia elisi ceciwa oloneke viosi.’
16 “Ca popia Ñala Tõlo Yehova ceci hati: ‘Nda usongui umue eca ombanjaile yimue komãla vaye ndocipinãlo, oco ci ka tiamẽla muẽle komãla vaye. Ocipiñalo caco ci ka kala muẽle cavo.
17 Pole, nda eye eca ombanjaile yimue yopiwa kocipiñalo caye ku umue pokati kakuenje vaye, oco ci ka linga caye toke kunyamo weyovo;+ noke o ka ci tiuwiya kusongui. Ocipiñalo ceciwa komãla vaye oco lika ci ka kala cavo otembo yosi.
18 Usongui ka citava okuti o tambula ocipiñalo cimue comanu poku va kisika oku tunda vovitumãlo viavo. Eye o sukila oku eca komãla vaye ocipiñalo caye muẽle oco okuti, lomue pokati komanu vange o kopiwa ocitumãlo ca tiamẽla kokuaye muẽle.’”
19 Noke eye wa ngambata puvelo+ wa kala konele yombundi ya imba ovaso kolohondo vi kola vioku lilamo viovitunda, via kala konele yonano+ kuenda nda muĩlako ocitumãlo cimue konyima yutakelo.
20 Eye wa ndi sapuila hati: “Eci oco ocitumãlo cina ovitunda vi ka telekela ocilumba ceko locilumba cekandu kuenda oko va ka yokela ocilumba colomema+ oco okuti, ka va kambata lacimue kosamua yocitali co kosamua, oco ka va ka pitiye oku kola* komanu.”+
21 Eye wa ngambata kosamua yocitali co kosamua kuenda wa ngecelela oku pita kavindi akuãla ocitali kuenje nda mola ocitali cimue kevindi levindi liocitali co kosamua.
22 Kavindi akuãla ocitali kua kala ovitali vitito via kuata 40 kovikeya* kusõvi kuenda 30 kovikeya vupati. Kakuãla kavio via kuata oloseteko vimuamue.*
23 Kua kala ovolala kolonele viaco vikuãla kuenda vemẽhi liovolala mua tungiwile ovitumãlo vioku telekela ovilumba.
24 Kuenje eye wa ndi sapuila hati: “Evi olonjo muna vana va vumba vonembele va siata oku telekela ovilumba viomanu.”+
Atosi Pombuelo
^ Tala Alombo. B14.
^ Tala Alombo. B14.
^ Lit., “otembo yovipito.”
^ Lit., “oku kolisa.”
^ Ci tiamisiwila kovikeya via lepa. Tala Alombo. B14.
^ Ale “Kakuãla kavio kuenda avindi ocimano via kuata oloseteko vimuamue.”
