Esekiele 7:1-27
7 Ondaka ya Yehova yeya vali kokuange yiti:
2 “Catiamẽla kokuove a mõlomunu, eci oco Ñala Tõlo Yehova a sapuila ofeka ya Isareli hati: ‘Esulilo! Esulilo li kasi oku iya kavindi akuãla ofeka.
3 Esulilo lieya kokuove kuenda ndi ka sukumũila onyeño yange kokuove kuenje ndi ka ku sombisa ndomo ci likuata lovilinga viove kuenda ndi ka ku yambula omo liovilinga viove viosi ka via sungulukile.
4 Iso liange ka li ka ku kuatela ohenda; kuenda si ka lekisa ocikembe,+ momo ndi ka nena kokuove onima yi tunda kovilinga viove kuenda o ka liyaka lovitangi omo liovilinga viove ka via sungulukile.+ Kuenje o ka kũlĩha okuti, ame ndi Yehova.’+
5 “Eci oco ca popia Ñala Tõlo Yehova hati: ‘Tala! Ku kasi oku iya ohali, ohali yimue okuti, ka yi sokisiwa.+
6 Esulilo limue li kasi oku iya; esulilo li keya; olio* li ka ku katukila. Tala! Olio li kasi oku iya.
7 Onjanja yove ya pitĩla, ove anungi yofeka. Otembo yi kasi oku pitĩla, eteke liaco li kasi ocipepi.+ Kolomunda kuli esakalalo, hakuliyulako kuesanju.
8 “‘Ndopo ndi ka sukumũila onyeño yange kokuove+ kuenda ndi ka sukumũila muẽle onyeño yange kokuove+ kuenje ndi ka ku sombisa ndomo ci likuata lovilinga viove kuenda ndi ka ku yambula omo liovilinga viove viosi ka via sungulukile.
9 Iso liange ka li ka ku kuatela ohenda; kuenda si ka lekisa ocikembe.+ Momo ndi ka nena kokuove onima yi tunda kovilinga viove kuenda o ka liyaka lovitangi omo liovilinga viove ka via sungulukile. Kuenje o ka kũlĩha okuti ame ndi Yehova, ame ñasi oku ku yambula.+
10 “‘Eteke li kasi oku iya! Olio li kasi ocipepi!+ Onjanja yove ya pitĩla; ombueti ya yova kuenda epela liovanyãli lia livokiya.
11 Ungangala wa livokiya kuenda wa linga ombueti yevĩho.+ Ci kaile ovo, ci kaile ovokuasi avo pamue owiñi ale ekemãlo liavo, ka vi ka puluka.
12 Otembo yi keya, eteke li ka pitĩla. Ukuakulanda ka ka sanjuke kuenda ukuakulandisa ka ka lisiõsiõle, momo kuli onyeño yimue ya wengukila owiñi* wavo wosi.+
13 Momo ukuakulandisa ka ka tiukila vali kocitumãlo a landisa ndaño okuti omuenyo waye wa puluka, momo ocinjonde caco ciya komanu vosi. Lomue o ka tiuka kuenda omo liekandu* liaye, lomue o ka popela omuenyo waye.
14 “‘Va sika olumbeta+ kuenje vosi va lipongiya, pole, lomue enda kuyaki, momo onyeño yange ya wengukila owiñi wosi.+
15 Osipata yi kasi kosamua+ kuenda efengi lonjala vi kasi vokati. Wosi o kasi vusenge o ka pondiwa losipata kuenda onjala lefengi vi ka ponda vana va kasi volupale.+
16 Vana va tẽla oku puluka, va ka enda kolomunda kuenda ndolopomba viovimbota, omunu lomunu o ka leña leña omo lieko liaye.+
17 Ovaka avo osi, a ka pua ongusu kuenda olongolo viavo viosi, vi ka tunda ovava.*+
18 Ovo va ka wala ocikelẽyi+ kuenda va ka kuatiwa* lusumba. Vosi yavo va ka kuata osõi kuenda ovitue viosi vi ka kuata epela.*+
19 “‘Ovo va ka inasi opalata yavo volokololo kuenda ulu wavo u ka va lingisa onyanya. Ndaño opalata yavo ale ulu wavo, ka vi ka tẽla oku va popela keteke lionyeño ya Yehova.+ Ovo ka va kekuta ndaño oku yukisa ovaimo avo, momo opalata lulu wavo via linga ewe liocilondokua li koka oku lueya kuavo.
20 Va lekisa epela omo lieposo liovina viavo vioku liposuisa kuenda va tunga lavio* oviñumañuma viavo viumbondo okuti, oviteka viavo via vĩha.+ Eli olio esunga lieci ndi ka lingisila okuti, ovina viaco vi vĩha kokuavo.
21 Ndi ka vi eca* peka liovingendeleyi kuenda kolondingaĩvi viofeka ndovina via pundiwa kuenda va ka vi vĩhisa.
22 “‘Ndi ka tindula ocipala cange kokuavo+ kuenda ovo va ka vĩhisa ocitumãlo cange* ci kasi vuyombeki kuenda ovimunu vi ka iñilamo loku ci vĩhisa.+
23 “‘Panga elienge*+ momo ofeka ya yukisiwa lesombiso liosonde+ kuenda olupale lueyuka ungangala.+
24 Ndi ka nena alume olongangala vo kolofeka+ kuenje va ka tambula olonjo viavo+ kuenda ame ndi ka nena esulilo kepela lia vana va pama kuenda ovitumãlo viavo vi kola, vi ka vĩhisiwa.+
25 Eci ohali yavo yi keya, ovo va ka sanda ombembua, pole, ka va ka yi sanga.+
26 Ku keya ocilunga cimue kuenda ci ka kuamiwa locilunga cikuavo kuenje omanu va ka sanda ocinjonde ci tunda kuprofeto umue,+ pole, ocihandeleko* cuprofeto kuenda elungulo liakulu vi ka imũha.+
27 Soma o ka lisiõsiõla+ kuenda usongui wa velapo, o ka wala ocinjoko* kuenda ovaka omanu vo vofeka a ka luluma lusumba. Ndi ka va tata ndomo ci likuata lovilinga viavo kuenje ndi ka va sombisa ndomo ovo va siata oku sombisa. Kuenje va ka limbuka okuti, ame ndi Yehova.’”+
Atosi Pombuelo
^ Lit., “lia pasuka.”
^ Okuti ci kaile vana va landa ocipiñalo cimue ci kaile vana va landisa, ka va ka kuatisiwa laco momo enyolẽho li keya ku vosi.
^ Ale pamue, “omo lieko liaye.”
^ Okuti, oku lisunsãla omo liusumba.
^ Okuti, ovitue viavo vi ka pemũiwa esinga omo liesumuo.
^ Lit., “oku sikĩlĩwa.”
^ Okuti, ovikuata viavo viopalata kuenda viulu.
^ Okuti, ovikuata viavo viopalata kuenda viulu va panga lavio oviteka.
^ Citava okuti ci tiamisiwila kohondo yi kola ya Yehova yo vokati.
^ Okuti, alienge wumandekua.
^ Ale “olonumbi.”
^ Ale “upolokoso.”
