Isaya 8:1-22
8 Yehova wa ndi sapuila hati: “Tikula evaya limue linene+ kuenda sonehamo olondaka vi lomboloka ciwa* viokuti: ‘Mahere-Sahalala-Hasi-Basi.’*
2 Kuenje eci ci sapuiwe kokuange luvangi umue wa sonehiwa* lolombangi via koleliwa okuti: Uriya+ ocitunda kuenda Sakariya omõla a Yeverekiya.”
3 Noke nda lipekela* luprofeto ukãi* kuenje eye wemina kuenda wa cita omõla ulume.+ Noke Yehova wa ndi sapuila hati: “Onduko yaye Mahere-Sahalala-Hasi-Basi,
4 momo osimbu kakuenje ka tẽla oku popia hati: ‘A isiange!’ kuenda ‘A ina yange!’ ovokuasi o ko Damasko kuenda ovina via pundiwa ko Samaria vi ka ambatiwa kovaso ya soma yo Asuria.”+
5 Yehova wa ndi sapuila vali hati:
6 “Omo okuti omanu ava ka va tavele ovava a tulumũha o ko Siloa*+Kuenda va sanjukila Recini lomõla a Remaliya,+
7 Omo liaco, tala! Yehova o ka va nenelaOvava Olui* okuti a kuete ongusu yalua hao alua okuti,Soma yo ko Asuria+ kuenda ulamba waye wosi.
Eye o keya kolondui viaye viosi viovavaKuenda kovililo viosi vio kohulo yaco
8 Kuenje o ka nyõla o Yuda.
Eye o ka kala ndetande li ka nyõla o Yuda, li pitahãla toke eci li pitĩla vosingo;+Avava aye a ka nyanyumuĩwa, a ka yukisa upati wofeka yove,A Emanuele!”*+
9 Koki enyõleho, ene amanu, pole, ene vu ka nyãnyuiwa.
Yeveleli, vosi yene vu kasi kolonepa viocipãla vio kilu lieve!
Lipongiyili uyaki, pole, vu ka nyãnyuiwa!+
Lipongiyili uyaki, pole, vu ka nyãnyuiwa!
10 Lingi esokiyo limue, pole, ka li ka tẽlisiwa!
Popi eci vu yongola, pole, ka ci ka kuata onima yiwa,Momo Suku o kasi letu!*+
11 Eci Yehova a sapela lame, eka liaye lia pama lia mbuila kuenda eye wa ndi lungula oco si ka kuame olonjila viomanu ava. Eye wa popia hati:
12 “Ko ka tukuli okuti usuanji ovina omanu ava va kasi oku tukula vati usuanji!
Ko ka kuateli usumba eci ovo va kuetele usumba;Ko ka ci lulumĩli.
13 Yehova ukualohoka eye Una vu sukila oku tenda okuti o kola,+Eye Una vu sukila oku sumbila,Kuenda eye Una vu sukila oku lulumĩla.”+
14 Eye o ka kala ndocitumãlo cimue ci kola,Pole, eye o ka kalavo ndewe limue lioku pondaKuenda ndesenje limue liocilondokua+Kolonjo vivali via Isareli,Ndulivi umue kuenda ndonjanjo yimueKolonungi vio Yerusalãi.
15 Valua pokati kavo va ka lilondoka loku kupuka kuenje va ka teka;Ovo va ka yapuisiwa kuenda va kambatiwa.
16 Yika uvangi wa sonehiwa;Yika ocihandeleko* pokati kolondonge viange!
17 Ndi kamamako oku kevelela* Yehova+ una o salamisa ocipala caye konjo ya Yakoba+ kuenda ndi ka lavoka kokuaye.
18 Tali! Ame kumue lomãla vana Yehova a nyĩha,+ tu kasi ndolondimbukiso+ kuenda ndovikomo ko Isareli vi tunda ku Yehova ukualohoka, una o kasi Komunda Siono.
19 Kuenda nda ovo va ku sapuili vati: “Kũlĩhĩsi vakuakuvangula lolondele ale vakuakutãha vana va sika ovilua kuenda oku ñuñuna,” Suku yene hẽ haeyeko omanu va sukila oku kũlĩhĩsa? Anga hẽ ovo va sukila oku kũlĩhĩsa ava va fa oco va kuatise ava va kasi lomuenyo?+
20 Ka citava okuti ovo va kũlĩhĩsa ocihandeleko kuenda uvangi wa sonehiwa!
Nda ovo ka va vangula ndomo ci likuata londaka eyi, ovo ka va kuata ocinyi* lacimue.+
21 Omumu lomunu o ka pita vofeka lohali kuenda onjala+ kuenje omo okuti eye o kasi lonjala kuenda wa tema, eye o ka siñala soma yaye kuenda Suku yaye osimbu a vanja kilu.
22 Noke eye o ka vanja kilu lieve kuenje o ka mola lika ohali, owelema, otembo yohali, alende a tekãva kuenda ka ku ka kala ocinyi cimue.
Atosi Pombuelo
^ Lit., “olondaka viulume umue o fa.”
^ Pamue yi lomboloka “Oku Yolokela Kovina Via Pundiwa, Oku Iya Lonjanga Kovina Via Kuatiwa.”
^ Ale “oku imba uvangi; oku tava.”
^ Lit., “nda enda ocipepi la.”
^ Okuti, ukãi wa Isaya.
^ O Siloa ya kala olekua yimue.
^ Okuti, o Ferati.
^ Ale “onumbi.”
^ Ale “oku kevelela lombili.”
^ Lit., “oku ca.”
