Ku Tiago 2:1-26
2 A vamanjange, anga hẽ vu kasi oku kakatela kekolelo lia Ñala yetu yulamba Yesu Kristu osimbu vu kasi oku lekisa ocame?+
2 Momo nda omunu umue lolonẽla viulu kovimuine haeye wa wala uwalo wa kemãla iñila vohongele yene, pole, ku iñilavo ulume ukuavo luwalo wa liña,
3 anga hẽ vu sumbila vali una wa wala uwalo wa kemãla, loku u sapuila hati: “Tumãla palo pocitumãlo ciwa” kuenje vu sapuila una ohukũi hati: “Talama vilu,” ale, “Tumãla opo pociliatelo colomãhi viange”?+
4 Nda oco vu linga, pokati kene ka pali hẽ olonepele,+ pamue ka wa lingili hẽ olonganji vi pisa lonjila yimue ka ya sungulukile?+
5 A vamanjange wa soliwi, yeveleli. Suku ka nõlele hẽ vana va tendiwa loluali okuti olohukũi, oco va linge olohuasi vekolelo+ kuenda vakapiñala Kusoma, una eye a likuminya ku vana vo sole?+
6 Puãi ene ka wa sumbilili ohukũi. Ohuasi hayoko hẽ ya siata oku vu kangisi+ loku vu ambati kekanga?
7 Havoko hẽ va popia etonãi onduko yiwa vu tukuiwa layo?
8 Nda vu pokola kocihandeleko cinene ca Soma, ndomo ca popia ocisonehua citi: “Sola u o lisungue love ndeci o lisole ove muẽle,”+ vu kasi oku linga ciwa.
9 Pole, nda vu amamako oku lekisa ocame,+ vu kasi oku linga ekandu kuenje vu pisiwa locihandeleko nda vakuesino.+
10 Momo nda umue o pokola Ocihandeleko cosi, pole, o lueya onepa yimue, eye o lueya Ocihandeleko cosi.+
11 Momo una wa popia hati: “Ku ka linge ukahokolo”+ wa popiavo hati: “Ku ka ponde.”+ Nda ku lingi ukahokolo, pole, o ponda, o sinĩla ocihandeleko.
12 Amamiko oku vangula kuenda oku linga ndava va ka sombisiwa locihandeleko comanu va yovuiwa.*+
13 Momo una ka lekisa ohenda, ka ka sombisiwa lohenda.+ Puãi ohenda yi yula vekanga.
14 A vamanjange, ci kuete esilivilo lie nda umue o popia okuti, o kuete ekolelo, pole, ka kuete ovilinga?+ Anga hẽ ekolelo liaco li pondola oku u yovola?+
15 Nda manji umue ulume ale ukãi ka kuete uwalo,* pamue okulia ku tẽla kueteke,
16 kuenje umue pokati kene u sapuila hati: “Kuende lombembua; li sikĩlĩla, kuta,” pole, ka eci kokuaye eci a sukila ketimba liaye, ci kuete esilivilo lie?+
17 Haicovo, ekolelo nda ka li kuete ovilinga lia fa.+
18 Pole, umue o ka popia hati: “Ove o kuete ekolelo, puãi ame ñuete ovilinga. Ndekise ekolelo liove ka li kuete ovilinga kuenje ame hu lekisa ekolelo liange pocakati covilinga viange.”
19 O tava hẽ okuti kuli lika Suku umosi? O linga ciwa. Ndaño muẽle olondele vi tavavo kuenje vi luluma.+
20 Amunu eveke, kua kũlĩhĩle okuti, ekolelo nda ka li kuete ovilinga ka li silivila?
21 Avirahama isietu ka tendiwile hẽ ndukuesunga mekonda liovilinga noke yoku lumba omõlaye Isake kutala?+
22 Limbuka okuti ekolelo liaye lia talavayela pamosi lovilinga viaye kuenda ekolelo liaye lia kanguiwa omo liovilinga viaye,+
23 kuenje kua tẽlisiwa ocisonehua cokuti: “Avirahama wa kolela Yehova* kuenda eci co tendiwila ndukuesunga”+ kuenje weya oku tukuiwa okuti, ekamba lia Yehova.*+
24 Limbuki okuti omunu o ka tendiwa ndukuesunga omo liovilinga, pole, omo liekolelo lika, hacoko.
25 Lonjila yimuamue, Rahava ocipuepue ka tendiwilevo hẽ okuti ukuesunga omo liovilinga noke yoku yekisa olomunga, loku vi tuma konjila yikuavo?+
26 Cimuamue haico okuti, ndeci etimba ka li kuete efuimo lia fa,+ haicovo okuti, ekolelo ka li kuete ovilinga lia fa.+
Atosi Pombuelo
^ Lit., “ocihandeleko ceyovo.”
^ Lit., “o kasi epẽle.”
^ Tala Alombo. A5.
^ Tala Alombo. A5.
