Yehosua 22:1-34
22 Noke Yehosua wa kovonga va Ruvene la va Gadi kuenda onepa yimue yocikoti ca Manase
2 kuenje wa va sapuila hati: “Ene wa lingi ovina viosi Mose ukuenje wa Yehova a ku handelekeli+ kuenda wa pokoli kondaka yange kovina viosi nda ku handeleki.+
3 Ene ka wa yandulukili vamanjene vokuenda kuotembo yaco yosi, toke etaili;+ kuenda wamamiko oku tẽlisa ocikundi cocihandeleko ca Yehova Suku yene.+
4 Cilo, Yehova Suku yene wa eca epuyuko ku vamanjene ndomo a va likuminyile.+ Omo liaco, tiukili kolombalaka viene vofeka yina Mose ukuenje wa Yehova a eca kokuene oco vu yi piñali konele yikuavo* yo Yordão.+
5 Kuati utate walua woku kapako ociholo kuenda Ocihandeleko cina Mose ukuenje wa Yehova a eca kokuene,+ poku sola Yehova Suku yene,+ poku endela volonjila viaye viosi,+ poku kapako ovihandeleko viaye+ poku kakatela kokuaye+ kuenda oku u vumba+ lutima wene wosi kuenda lomuenyo* wene wosi.”+
6 Noke, Yehosua wa va sumũlũisa kuenda wa va tuma oco va ende. Kuenje ovo va enda kolombalaka viavo.
7 Konepa yimue yocikoti ca Manase, Mose wa eca ocipiñalo cimue ko Basiane+ kuenje konepa yikuavo yocikoti, Yehosua wa eca ofeka konele yo kutakelo wo Yordão+ kumue la vamanjavo. Handi vali, eci Yehosua a va tuma oku enda kolombalaka viavo wa va sumũlũisa
8 kuenda wa va sapuila hati: “Tiukili kolombalaka viene lovokuasi alua, loviunda vialua, lopalata, lulu, losipi, lutale kuenda uwalo walua.+ Litepeli la vamanjene ovina via pundiwa+ kovanyãli vene.”
9 Noke liovina viaco, va Ruvene, va Gadi kuenda onepa yimue yocikoti ca Manase va litepa la va Isareli vakuavo ko Silo vofeka yo Kanana kuenje ovo va tiukila kofeka yo Gileada+ vofeka yocipiñalo cavo, muna ovo va tunga ndomo Yehova a ci handelekele pocakati ca Mose.+
10 Eci ovo va pitĩla kovaimbo o ko Yordão vofeka yo Kanana, va Ruvene la va Gadi kuenda onepa yimue yocikoti ca Manase, va tunga utala umue ocipepi lo Yordão okuti, utala umue unene haiwo u komõhisa.
11 Noke va Isareli vakuavo va ci yeva,+ vati: “Tali! Va Ruvene, va Gadi kuenda onepa yimue yocikoti ca Manase va tunga utala umue kongave yofeka yo Kanana, kovaimbo o Yordão konele yi tiamẽla ku va Isareli.”
12 Eci va Isareli va ci yeva, ohongele yosi ya va Isareli ya liongoluila ko Silo+ oco va ende oku ka liyaka lavo.
13 Kuenje va Isareli va tuma Finehase+ omõla a Eleasa ocitunda ku va Ruvene, ku va Gadi kuenda konepa yimue yocikoti ca Manase kofeka yo Gileada,
14 kuenda asongui ekũi, va endavo kumue laye. Usongui lusongui wa kala ocindekaise cocikoti cimue ca Isareli. Vosi yavo va kala asongui volonjo via va isia pokati kolohuluwa* via Isareli.+
15 Eci ovo va pitĩla ku va Ruvene, ku va Gadi kuenda konepa yimue yocikoti ca Manase kofeka yo Gileada, ovo va popia lavo vati:
16 “Eci oco ohongele yosi ya Yehova ya popia: ‘Momo lie wa lekisili ekambo liekolelo+ ku Suku ya Isareli? Ene etaili wa liwekipo oku kuama Yehova poku litungila ene muẽle utala umue loku sinĩla Yehova.+
17 Anga hẽ ekandu tua lingila ko Peore litito calua kokuetu? Toke etaili lilo, ka tua liyelisile kekandu liaco, ndaño okuti ocilunga cimue ca vetele ohongele ya Yehova.+
18 Kuenje etaili, ene vu yongola oku liwekapo oku kuama Yehova? Nda etaili wa sinĩli Yehova, hẽla eye o ka tema lohongele yosi ya Isareli.+
19 Nda ene vu sima okuti, ofeka yina wa tambuli ndocipiñalo ya vĩhisiwa, enjui vofeka yocipiñalo ca Yehova+ muna mu sangiwa otavernakulu ya Yehova+ kuenda tungi pokati ketu, pole, ko ka sinĩli Yehova kuenda ko ka tu kokeli oku u sinĩla poku litungila ene muẽle utala umue. Momo etu tu kuete ale utala wa Yehova Suku yetu.+
20 Eci Akani+ omõla a Sera a lekisa ekambo liekolelo catiamẽla kovina via nõliwila oku nyõliwa, hacoko hẽ eci ca kokela Suku oku kuatela onyeño ohongele yosi ya Isareli?+ Kuenda eye hayeko lika ulume wa fa omo liekandu a linga.’”+
21 Kuenje va Ruvene, va Gadi kuenda onepa yimue yocikoti ca Manase, va tambulula asongui volohuluwa* via Isareli vati:+
22 “Suku yolosuku, Yehova!* Suku yolosuku, Yehova!+ Eye wa ci kũlĩha kuenda o Isareli yi ka ci kũlĩhavo. Nda ocili okuti tua lekisa esino lekambo liekolelo ku Yehova, Suku ka ka tu popele keteke lietaili.
23 Nda tua litungila utala umue etu muẽle oco tu liwekepo oku kuama Yehova kuenda oku eca ovilumba vioku pia elisi, lovilumba violomema kuenda ovilumba viombembua kokualio, Yehova o ka tu yambula.+
24 Hacoko, etu tua ci lingila omo liohele yikuavo, momo tua sima okuti, ‘Kovaso yoloneke omãla vene va ka popia lomãla vetu vati: “Nye vu kuete la Yehova Suku ya Isareli?
25 Yehova wa kapa o Yordão ndongave pokati ketu lene vu va Ruvene, lene vu va Gadi. Ene ka vu kuete onepa layimue ku Yehova.” Kuenje omãla vene va ka tateka omãla vetu oku fendela* Yehova.’
26 “Omo liaco, tua popia hati: ‘Tu likolisiliko oku tunga utala umue okuti, hawokuecako ovilumba vioku pia elisi ale ovilumba vikuavo,
27 pole, oco u linge uvangi pokati kene letu+ kuenda kovitumbulukila vi keya noke lietu okuti, tu ka tẽlisa upange wetu ku Yehova kovaso aye kumue lovilumba vietu vioku pia elisi, lovilumba vietu vikuavo kuenda ovilumba vietu viombembua,+ oco omãla vene ka va ka popie komãla vetu kovaso yoloneke hati: “Ene ka vu kuete onepa layimue ku Yehova.”’
28 Omo liaco, tua popia hati: ‘Nda va popia letu ovina viaco ale kovitumbulukila vietu kovaso yoloneke, etu tu ka popia hati: “Tali utala va isietu va linga okuti, wa lisoka lutala wa Yehova okuti, hawokuecako ovilumba vioku pia elisi ale ovilumba vikuavo, pole, oco u linge uvangi pokati kene letu.”’
29 Ka ca sungulukile kokuetu oku sinĩla Yehova kuenda oku liwekapo etaili oku kuama Yehova+ poku tunga utala ukuavo woku eca ovilumba vioku pia elisi, lovilumba violomema kuenda ovilumba vikuavo okuti, u vandeka kutala wa Yehova Suku yetu una u kasi kovaso yotavernakulu yaye!”+
30 Eci Finehase ocitunda, lasongui vohongele kuenda asongui volohuluwa* via Isareli vana va kala kumue laye va yeva olondaka vina ovitumbulukila via Ruvene la Gadi kuenda via Manase va popia, ovo va yeva esanju.+
31 Kuenje Finehase omõla a Eleasa ocitunda wa popia lovitumbulukila via Ruvene, via Gadi kuenda via Manase hati: “Etaili tua kũlĩha okuti Yehova o kasi pokati ketu, momo ene ka wa lekisili ekambo liekolelo ku Yehova. Kaliye wa popeli va Isareli peka lia Yehova.”
32 Kuenje Finehase omõla a Eleasa ocitunda kuenda asongui, va siapo va Ruvene kuenda va Gadi vofeka yo Gileada kuenje va tiukila kofeka yo Kanana kuenda va nena esapulo ku va Isareli vakuavo.
33 Kuenje va Isareli va sanjuka omo liesapulo liaco. Noke va Isareli va sivaya Suku kuenda ka va popele vali lacimue catiamẽla koku ka linga uyaki la va Ruvene kuenda la va Gadi oco va kundule ofeka muna va kala.
34 Omo liaco, va Ruvene kuenda va Gadi va eca onduko yimue kutala,* momo “owo wa linga uvangi pokati ketu okuti Yehova eye Suku yocili.”
Atosi Pombuelo
^ Okuti, konele yutundilo.
^ Tala Elomboluilo.
^ Ale “apata.”
^ Ale “apata.”
^ Ale “Ukuonene, Suku, Yehova.”
^ Lit., “oku kuata usumba.”
^ Ale “apata.”
^ Ndomo ca lomboluiwa, utala pamue wa lukiwile okuti Ombangi.
