Yeremiya 3:1-25
3 Omanu va pula vati: “Nda ulume umue o nyãla ukãi waye kuenda noke yoku u siapo o linga ukãi wulume ukuavo, anga hẽ eye nda wa tiukila vali kukãi waco?”
Anga hẽ ofeka eyi ka ya vĩhisiwile yosi?+
“Ove wa linga upuepue lomanu valua,+Kuenje cilo o tiuka kokuange?” oco Yehova a popia.
2 “Petuila ovaso ove koviwulu kuenda tala.
Pi ove kua putuiwile?
Ove wa enda oku tumãla kolonele violonjila oku va kevelela,Ndomunu umue ukuakutungayala* vekalasokoOve o kasi oku amamako oku vĩhisa ofekaLupuepue wove kuenda evĩho liove.+
3 Omo liaco, ombela yalua ka yi kasi oku loka,+Kuenda ombela yomandavela* ka yi loki.
Ove o vanja lonjila yimue okuti, ku kuete osõi* ndukãi umue ocipuepue;Ove o likala oku yeva osõi.+
4 Pole, cilo o vilikiya kokuange loku popia hati:
‘A Isiange, ove wukamba liange tunde vumalẽhe wange!+
5 Anga hẽ o kamamako locikumbiti otembo ka yi pui,Ale oku seleka onyeño otembo yosi?’
Eci oco ove o popia,Pole, ove wamamako oku linga evĩho liosi o tẽla oku linga.”+
6 Koloneke via soma Yosiya,+ Yehova wa ndi pula hati: “‘Ove wa mola ukahonga Isareli a linga? Eye enda kolomunda viosi via lepa kuenda vemẽhi lioviti via pulika oco a linge upuepue.+
7 Ndaño noke yoku linga ovina evi viosi, ame ndamamako oku u sapuila oco a tiuke kokuange,+ pole, eye ka tiukile; kuenda Yuda wamamako oku vanja ovina huvaye ukãi ukuelimbi a kala oku linga.+
8 Eci nda ci mola, nda tuma kupãla Isareli wa linga ukahonga lukanda umue woku linyãla+ omo liukahokolo waye.+ Pole, Yuda ukuosuanji, huvaye ka kuatele usumba; eye wa fetikavo oku linga upuepue.+
9 Eye ka kapeleko upuepue waye kuenda wa vĩhisa ofeka poku linga ukahokolo lovawe kuenda loviti.+
10 Ndaño lovina evi viosi, huvaye Yuda ukuosuanji, ka tiukile kokuange lutima waye wosi, pole, wa ci linga lombambe,’ oco Yehova a popia.”
11 Noke Yehova wa ndi sapuila hati: “Isareli ukuokahonga wa li lekisa eye muẽle okuti ukuesunga okuti, Yuda ukuosuanji ci sule.+
12 Kuende, sapula olondaka evi konele yonano viokuti:+
“‘“Tiuka a Isareli ukuesino,” oco Yehova+ a popia.’ ‘“Si ka vanja lonyeño* kokuene,+ momo ame ndukuacili,” oco Yehova a popia.’ ‘“Si kamamako locikumbiti otembo ka yi pui.
13 Limbuka ño eko liove, momo ove wa sinĩla Yehova Suku yove. Ove wamamako oku eca oviali* viove kovingendeleyi* vemẽhi liuti wosi wa pulika, pole, ove kua pokuile kondaka yange,” oco Yehova a popia.’”
14 “Tiuki ene amãla vakuesino,” oco Yehova a popia. “Momo ame ndi ka linga cime cene* ukuacili; kuenda ame ndi ka vupi okuti, volupale lolupale mu tunda umue kuenda vepata lepata mu tunda vavali, oco ndu vu neni ko Siono.+
15 Ndi ka eca kokuene angombo va linga ndomo ci likuata locipango cange*+ kuenje ovo va ka vu tekuli lolondunge kuenda lelomboloko.
16 Koloneke viaco, ene vu kalua kuenda etendelo liene li ka livokiya vofeka,” oco Yehova a popia.+ “Lomue o ka popia vali hati: ‘Ocikasia covisila via Yehova!’ Ovo ka va ka sokolola vali kokualio ndaño oku ci ivaluka ale oku ci kuatela ongeva kuenje oco ka ci ka pangiwa vali.
17 Kotembo yaco, ovo va ka vilikiya o Yerusalãi kocalo ca Yehova;+ kuenda olofeka viosi vi ka likongela viosi konduko ya Yehova ko Yerusalãi+ kuenje ka va ka kuama vali utima wavo wa siva haiwo wa vĩha.”
18 “Koloneke viaco, onjo ya Yuda kuenda onjo ya Isareli+ vi ka endela kumosi kuenje ovo va ka tunda kofeka yo konano oco va ende vofeka nda eca ku vakukulu yene ndocipiñalo.+
19 Ame nda sokolola ndoco: ‘Nda kuata esanju poku ku kapa pokati komãla vange kuenda nda eca kokuove ofeka yimue yiwa okuti, ocipiñalo cimue ciwa pokati kolofeka!’*+ Nda simavo okuti, ene vu pondola oku ndi vilikiya okuti, ‘Isiange!’ kuenda ka vu liwekapo oku ndi kuama.
20 ‘Ocili okuti, ndeci ukãi umue ukuosuanji a siapo ulume* waye, ove Anjo ya Isareli, wa lekisa usuanji kokuange poku ndi pakula,’+ oco Yehova a popia.”
21 Koviwulu ku yevala ocileñi cimue,Oku lila kuenda apingilo omanu va Isareli,Momo ovo va pengisa onjila yavo;+Ovo va ivala Yehova Suku yavo.+
22 “Tiuki ene amãla vakuesino.
Ndi ka kayisa ekalo liene liesino.”+
“Tu kasi palo! Tueya kokuove,Momo ove, A Yehova, ove Suku yetu.+
23 Ocili okuti, oviwulu kuenda onjuela yo kolomunda, ovina viaño.+
Ocili okuti, ku Yehova Suku yetu, oko ku kasi epopelo lia Isareli.+
24 Pole, tunde eci tua kala amalẽhe,+ ocina ci kutisa osõi,* ca siata oku lia epako liupange wa vakukululu yetu,Oviunda viavo kuenda olongombe viavo,Omãla vavo valume kuenda omãla vavo vakãi.
25 Tu pekeli vosõi yetu,+Kuenda esepu lietu li tu sikĩlĩle,Momo tua lueyela Yehova Suku yetu,+Etu kumue la va isietu, tunde vumalẽhe wetu toke etaili,+Kuenda ka tua pokuile kondaka ya Yehova Suku yetu.”
Atosi Pombuelo
^ Lit., “u Arabia umue.”
^ Ci lombolokavo, ombela yatete.
^ Lit., “upolo.”
^ Lit., “oku kupuisa ocipala cange.”
^ Ale “olosuku viñi.”
^ Lit., “olonjila.”
^ Ale pamue, “alume vene.”
^ Lit., “utima wange.”
^ Lit., “olohoka violofeka.”
^ Lit., “ekamba.”
^ Ale “osuku yimue yi kuete osõi.”
