Yeremiya 42:1-22
42 Noke asongui vosi volohoka kuenda Yohanana+ omõla a Karea, Yisiniya omõla a Hosiaya kuenda omanu vosi, oku upisa kutito toke kunene, veya
2 kuenje va sapuila uprofeto Yeremiya vati: “Linga ohenda, yevelela epingilo lietu liohenda kuenda tu likutilileko ku Yehova Suku yove, poku pingilako ocisupe cosi eci, momo pa supa lika vatito pokati ka valua,+ ndomo o ci lete.
3 Yehova Suku yove, a tu sapuile onjila tu sukila oku endela kuenda eci tu sukila oku linga.”
4 Uprofeto Yeremiya wa va tambulula hati: “Nda ku yevi kuenda ñasi loku likutilila ku Yehova Suku yene ndomo ci likuata lepingilo liene; kuenje ondaka yosi Yehova a ku tambululi, ndu ku yi sapuili. Si ka limbika ondaka layimue kokuene.”
5 Ovo va tambulula Yeremiya vati: “Yehova a kale ombangi yocili haiyo ya koleliwa kokuetu, nda ka tua lingile muẽle ndeci Yehova Suku yove a tu handeleka pocakati cove.
6 Ci kaile okuti ondaka yaye yiwa ale yĩvi, tu ka pokola kondaka ya Yehova Suku yetu, una tua ku tuma oco ovina vi ende ciwa letu, momo tu pokola kondaka ya Yehova Suku yetu.”
7 Noke yoku pita ekũi koloneke, ondaka ya Yehova yeya ku Yeremiya.
8 Omo liaco, eye wa vilikiya Yohanana omõla a Karea kuenda asongui vosi volohoka vana va kala laye kumue lomanu vosi, oku upisa kutito toke kunene.+
9 Eye wa va sapuila hati: “Ca popia Yehova Suku ya Isareli una ene wa ndi tumi oco ndu sapuile epingilo liene liohenda kovaso aye ceci hati:
10 ‘Nda ene wamamiko muẽle vofeka yilo, ame ndi ka vu tumbululi kuenda si ka vu nyõli kuenje ndi ka vu kũli okuti, si ka vu tukũli momo, ndi ka kuata ohenda* omo liefengi nda ku neneli.+
11 Ko ka kuati usumba omo lia soma yo Bavulono una vu yokokela.’+
“‘Ko ka kuati usumba mekonda liaye,’ oco Yehova a popia, ‘momo ame ñasi lene oco ndu vu popeli loku vu yovoli peka liaye.
12 Ndi ka lekisa ohenda kokuene+ kuenda eye o ka lekisa ohenda kokuene kuenje o ka vu tiukilisi kofeka yene muẽle.
13 “‘Pole, nda ene vu popia hati: “Sio, etu ka tu kamamako vofeka eyi!” kuenje vu sinĩla ondaka ya Yehova Suku yene
14 poku popia hati: “Sio, tu enda muẽle kofeka Yegito+ kuna ka tu ka mola uyaki ale oku yeva ocileñi combinga pamue onjala yombolo; oko tu ka kala,”
15 yeveleli ondaka ya Yehova, Acisupe co Yuda. Ca popia Yehova ukualohoka Suku ya Isareli ceci hati: “Nda ene vu tamalãla lasokiyo ene oku enda Kegito kuenda ene vu endako oco vu ka kaliko,*
16 unyãli ene vu kuetele usumba o keya oco a vu katukili losipata osimbu ene vu kasi Kegito kuenda onjala vu yokokela, yi ka vu kuami toke Kegito kuenje oko vu ka fila.+
17 Kuenje vosi vana va nõlapo oku enda Kegito oku ka kalako, va ka fa losipata, lonjala kuenda lefengi.* Lomue pokati kavo o ka supapo ale oku puluka kohali ndi ka va nenela.”’
18 “Momo ca popia Yehova ukualohoka, Suku ya Isareli ceci hati: ‘Ndeci onyeño yange kuenda oku tema kuange via wengukila olonungi vio Yerusalãi,+ haico onyeño yange yi ka vu wengukili nda wa endi Kegito kuenje vu ka linga esiñalo kuenda ocikuata cocinjoko, epembulo kuenda esepu+ kuenje lalimue eteke vu ka mola vali ocitumãlo eci.’
19 “Yehova wa vangula lene, Acisupe co Yuda. Ko ka endi Kegito. Vu sukila oku kũlĩha muẽle okuti, ame nda ku lunguli etaili
20 okuti oku lueya kuene ku ka pumbisa ovimuenyo viene. Momo ene wa ndi tumi ku Yehova Suku yene poku popia hati: ‘Tu likutilileko ku Yehova Suku yetu kuenda tu sapuile ovina viosi Yehova Suku yetu a popia kuenje tu ka vi linga.’+
21 Etaili, ñasi oku vu sapuili olondaka evi, pole, ene ka vu ka pokola kondaka ya Yehova Suku yene, ale oku linga eci eye a numa oku vu sapuili.+
22 Omo liaco, kũlĩhi muẽle okuti ene vu ka fa losipata, lonjala kuenda lefengi kocitumãlo vu yongola oku enda oku ka tunga.”+
