Epindiso limue lia kunamẽla Vembimbiliya, li kuete unene woku pongolola omuenyo womanu. Kũlĩhĩsa eci ca li pita la Ricardo kuenda Andres.

RICARDO: Eci nda kuata 15 kanyamo, nda li kongela kocimunga cimue colongangala. Ndomo ca siata lamalẽhe va kuete utunga ndowu wange, nda kapeleko calua ovisimĩlo viakamba vange vokaliye. Ci molẽha ndu okuti ocisimĩlo cuveke, pole, ocimãho cange ca kala oku kala ekũi kanyamo vokayike! Momo volupale nda kala, omanu va enda oku sumbila loku komõha calua vana va kala otembo yalua vokayike. Kuenje ame nda yonguile oku kala ndomanu vaco.

Vocimunga caco nda linga ovina vialua vĩvi ndeci, oku fenya olodroga, ungangala kuenda evĩho liukahonga. Vuteke umue, nda panga onepa kombuanja yimue ya lingiwa okuti mua kongelele oku liloya. Nda simile okuti ndi fa, pole nda puluka okuti sia lilemẽhele. Noke liovina evi, nda fetika oku sokolola calua kovimãho viange kuenda ekalo liomuenyo nda kala oku ambata. Kuenje nda nõlapo oku linga apongoloko. Ndamupi? Pi nda ponduile oku sanga ekuatiso?

Vangandiange valua ka va kuatele esanju. Ovo va kuatele ovitangi vialua. Pole, epata lia inanu yange lia li tepele. Ame nda kũlĩhĩle okuti ovo va kala omanu vawa va kapeleko olonumbi Viembimbiliya. Eteke limue ovo va ndongisa okuti, onduko ya Suku, Yehova. Noke lioku panga onepa koku liloya, nda likutilila ku Suku poku tukula onduko yaye loku pinga oco a ndi kuatise. Keteke lia kuamamo, nda komõha calua eci ulume umue a totola kepito liange! Eye wa kala Ombangi ya Yehova noke wa fetika oku ndi longisa Embimbiliya.

Noke nda liyaka locitangi cimue cinene. Akamba vange vosimbu, va enda oku ndi telefonalela olonjanja vialua oco ndi tunde lavo. Ka ca lelukile oku popia hati, sio. Pole, nda nõlelepo oku amamako lelilongiso liange Liembimbiliya. Nda linga ciwa omo ndamamako! Omuenyo wange wa pongoloka kuenda nda sanga esanju liocili.

Nda sapelele la Suku catiamẽla konjongole yange yosimbu yoku kala vokayike ekũi kanyamo kuenda oku sumbiwa vocimunga colongangala. Pole, ocimãho cange ca pongoloka. Omo liaco, nda pinga ku Suku oco a ecelele okuti, ndu u vumba vokuenda kuanyamo ekũi loku pita onepa yimue yotembo yange koku longisa Embimbiliya komanu vakuavo. Kuenje Suku wa tambulula ohutililo yange. Pa pita ale 17 kanyamo tunde eci nda fetika upange wakundi votembo yosi! Ciwa ceci okuti, sia la kapiwa vokayike.

Pole, vamue pokati kakamba vange va kasi vokayike vokuenda kuanyamo alua. Vakuavo va fa. Poku sokolola konyima, ndi pandula calua vangandiange Olombangi Via Yehova. Ovo va nõlelepo oku kala omanu va li tepa kuenda oku kapako olonumbi Viembimbiliya komuenyo wavo. Nda va sumbilile calua okuti, ocimunga cimue colongangala ci sule. Ca velapo ceci okuti,  ngueca olopandu ku Suku omo a ñuatisa oku sanga onjila ya velapo komuenyo wange.

ANDRES: Nda citiwila kuenda nda kulila volupale lumue muli uhukũi walua kuenda ovina ndeci, olodroga, ovitukiko, ungangala kuenda upuepue, via siatele calua. Isia yange wa kala oholua kuenda wa enda oku fenya calua odroga yina yi tukuiwa okuti o kokaina. Eye kumue la ina yange otembo yosi va enda oku lihoya kuenda oku litipula.

Nda kala umalẽhe calua eci nda fetika oku nyua ovina vi koluisa kuenda oku fenya olodroga. Olonjanja viosi nda enda oku kala volokololo oku nyana kuenda oku landisa ovina nda nyana. Eci nda kula, isia yange wa seteka oku sapela lame pole, wa ci linga lonjila ka ya sungulukile. Eye wa ndi longisa oku nyana calua, oku landisa olodroga kuenda ovina vikuavo ka via sungulukile. Nda kuata olombongo vialua vokuenda kuotembo yimue yitito. Pole, eteke limue akuenje velombe veya konjo yange oco va ndi kape vokayike. Nda pisiwa oku kala vokayike ci soka anyamo atãlo omo lioku seteka oku ponda.

Eteke limue lomẽle, vokayike mua lingiwa esapulo liokuti olomandekua via lalekiwa oco vi ende oku ka yevelela esapulo Liembimbiliya Olombangi Via Yehova via laikele oku linga. Nda nõlapo oku ka yevelela esapulo liaco. Ovina viosi nda yeva, via sunguluka kuenje nda fetika oku lilongisa Embimbiliya Lolombangi Via Yehova. Ovo ka va vanguile lika eci nda yonguile oku yeva, pole, va ndi lekisa Vembimbiliya ovituwa vi sanjuisa Suku nda sukilile oku kuata.

Nda limbuka okuti, lika liange sia ponduile oku linga apongoloko a sukiliwa. Handi vali, olomandekua vina ka via solele apongoloko nda kala oku linga, via enda oku ndi saluisa. Noke nda likutilila oku pinga ongusu kuenda olondunge ku Yehova, kuenje eye wa ñuatisa. Nda linga apongoloko kuenda nda fetika oku sapuilako olomandekua vikuavo catiamẽla Kembimbiliya.

Eci eteke lioku tunda vokayike lia pitĩla, nda temele calua kuenda sia yonguile oku tunda! Osimbu nda kala oku tunda vokayike, olomandekua vialua via kala oku votola ovaka loku liusika lame. Olomandekua vimue lohenda via ndi sapuila hati: “Kuende konjo ungombo.”

Ndi kuata usumba walua eci ndi sokolola ndomo omuenyo wange nda wa kala, nda okuti sia ecelele Suku oku ndi longisa. Ndi pandula calua Suku omo lioku ndi sola kuenda ka ndi tendele ndocina cimue ka ci kuete esilivilo. a