Ove lohueli yove vu kuete olojongole via litepa via tiamẽla kocina cimue. Ove o kuete olonjila vitatu vioku nõla:

1. O ku lipilika toke eci ovina vi lingiwa ndomo ove o yongola.

2. Oku tava kovina ohueli yove yi yongola.

3. Vosi yene vu sukila oku litava pokati.

‘Pole, ame si sole ocituwa coku litava pokati,’ pamue ove o popia ndoco, ‘soketi lomue pokati ketu o ka tẽla oku linga eci tu yongola!’

Oku litava pokati ka ci lomboloka okuti kavali kene ka vu ka linga ovina via sunguluka. Pole, osimbu ka wa kũlĩhĩsili ndomo ci lingiwa, kuli ovina vimue vu sukila oku kũlĩha via tiamẽla kuloño waco ukuete esilivilo.

Oku litava pokati ci sukila oku talavayela pamosi. Osimbu kua kuelele, citava okuti wa enda oku ñola onjila o yongola oku kuama lika wove. Cilo, ovina via pongoloka kuenda ene kavali vu sukila oku pitisa kovaso olohuela viene okuti, olonjongole viove muẽle vi sule. Ci tenda ndesumũlũho limue okuti, hacitangiko. Ukãi umue o tukuiwa Alexandra wa popia hati: “Omanu vavali eci va li kongela, va tẽla oku tetulula ciwa ocitangi cimue okuti, nda ca kaile omunu lika waye nda ka ci tẽlele.

Oku litava pokati ci sukila oku kuata ovisimĩlo via suguluka. “Ove ku sukila oku tava kovina viosi ohueli yove yi popia, pole, ove o sukila oku lekisa esunguluko poku kapako ekalo liaye” oco usonehi umue ukuakukũlĩhĩsa owoño womanu o tukuiwa hati, John M.Gottman a popia. Eye wa popiavo hati, “nda ove o yevelela lutate eci ohueli yove yi seteka oku sapela love catiamẽla kocitangi cimue, ocitangi caco ka ci ka li sanduila kosamua.”

Oku litava pokati ci sukila oku likolisilako. Lomue o sole oku kala lohueli yimue okuti, olonjanja viosi yi “sima lika oku linga eci yi yongola ale oku sima okuti ka kuli onjila yoku tetulula ovina.” Ci kuete esilivilo nda kavali va lekisa onjongole yoku li kolisilako. Manji June wa popia hati: “Olonjanja vimue ndi lekisa esunguluko oco ndi sanjuise ulume wange, pole, olonjanja vikuavo eye o lekisavo esunguluko oco a ndi sanjuise.” “Eci oco ci sukiliwa volohuela okuti: Oku eca loku tambula, haku tambulako lika.”

Fetika lonjila ya sunguluka. Elaka liondaka o fetika lalio ombangulo yimue haeyo o sukila oku sula layo. Nda wa fetika lolondaka viukãlu ka ci kaleluka oku malusula ombangulo lombembua. Omo liaco, kuama elungulo Liembimbiliya liokuti, “Wali ohenda, ocikembe, lumbombe, lokuomboka kuenda epandi.” (Va Kolosai 3:12) Ovituwa evi, vi ka ku kuatisa ove kumue lohueli yove oku yuvula oku lihoya kuenda oku tetulula ovitangi. —Onumbi Yembimbiliya: Va Kolosai 4:6.

Sanda ovisimĩlo vimuamue. Nda okuti alikolisilo ove oku tetulula ocitangi cimue, a kasi oku ku lingisa o nyeño, citava okuti ene wa tiamisili calua utima kovisimĩlo viene via litepa. Omo liaco, seteki oku sanda ovisimĩlo vina okuti, vu vi tava. Oco ci ku kuatisi oku ci linga, omunu lomunu a seteke ndoco:

Oku soneha ulala wolonepa vivali. Vulala watete sonehamo atosi avelapo kokuove. Vulala wavali, sonehamo atosi alekisa ndomo vu litava pokati. Noke sapeli eci catiamẽla kovilala viaco. Citava okuti, vu katava kovina wa limbuki. Nda oco, oku litava pokati ka ci ka tĩla. Ndaño okuti ka vutava kovina viosi, oku soneha atosi aco vopapelo ci ka ku kuatisa ove lohueli yove oku kuata elomboloko lia suapo liocitangi cimue.

Tetulula ocitangi lohueli yove. Kuli ovitangi vimue okuti via leluka oku vi tetulula. Vikuavo ka via lelukile, pole, nda ulume lukãi va sanda oku tetuluila pamosi ocitagi caco, okuti lomue nda wa tẽla oku ci tetulula lika waye, omunga yi kasi pokati kavo yi pamisiwa. —Onumbi Yembimbiliya: Ukundi 4:9.

Kuata onjongole yoku pongolola ovisimĩlo viove. Embimbiliya liti: “Omunu lomunu pokati kene a sole ukãi waye ndeci a li sole eye muẽle; handi vali, ukãi o sukila oku lekisa esumbilo liocili kulume waye.” (Va Efeso 5:33) Nda ulume lukãi va li sole loku lisumbila pokati, kavali kavo va ka kũlĩhĩsa ocisimĩlo cukuavo kuenje citava okuti, va pongolola ocisimĩlo cavo. Manji umue ohueli o tukuiwa Cameron wa popia hati: “Kuli ovina vimue okuti ove nda kua vi tẽlele, pole, lekuatiso liukãi wove, o pondola oku sola calua ovina viaco.—Onumbi Yembimbiliya: Efetikilo 2:18.